عزیز آغ بیرچکلی آنا ؛ بیلیرم مین بیر آرزی – دیلک له اوغول صاحیبی اولدوز، اولاراق آدینی سیامک قویدونوز. بویا-باشا چاتانا قدر گئجه لر اولدوزلاری سایاراق آیاقلاری نی بئشیک ائدیب تورکجه لای-لای لار ایله توخدادیردین. اوشودوگو چاغدا اوستونه یورقان چکیردین. او گونلری اؤته رک بو گون سورغولانیرام. سیامک دوستوموزون گؤبه یین هارا آتیب سان؟ سیامک اوچون یئریکله ینده نه یئییب سن؟
گونلر اؤتدو. اوغلون ایمکله مه کدن چیخیب اؤیره تدیگین دیلده دیل آچدی. بؤیودو ، یازی – پوزو اؤیره نمک واختی چاتدی. اوخوللارین برنامه سیندن خبرسیز بوتون آنالار تک اوغلووون ساوادلی اولماغینی ایسته دین. بونا رغما اوخولا گؤنده ردین. آنجاق نه لای- لالاریندان خبر وار. نه بایاتی لاریندان. نه تاپماجالاریندان. نه عنعنه لریمیزدن. اوخول دا سنین اؤیره تدیگین دیل یاساق دیر و چانتاسی اؤزگه دیلده یازیلمیش کیتاب لاری داشیماغا قرارلانیب دیر. اوردا قوندارما تاریخ ازبه رله ندیریلیر. اوردا بیزی-بیزسیک ائتمک برنامه سی تؤکولور.
سیامک بی سنین دیله یی نی یئرینه یئتیرمک اوچون اوخولو یاخجی جا باشا چاتدیراراق بیلیم یوردا آیاق قویدو. دؤنه لر جن اوخوللاردا اؤیرتمن لر سیامکی ووروردولار یاخجی یازان اولسون. ایل لر اؤتن دن سونرا سیامک ین قلمی داها اؤز دوغما توپراغینا ایلقارلی اولدو. یاخجی جا یازدی آمما شووونیست اونون بئینیندن آخان مورکبی دؤزه بیلمه یه رک قلمین سیندیرماغا چابا آتدی.
هر آن بئینیمدن سورغولانیرام بو گون سیامک بی ی یاخجی یازماق هوسینه ووران اؤیرتمن اوز-اوزه چیخسالار سیامک بی یه نه جوابی واردیر؟
یازدیقلاری اوچون بیرینجی آتدیم دا یوکسک تحصیل آلماغا، اولدوزلو اؤیرنجی لرین سیراسیندا اولدو. آنجاق یئنه ده سیامک بی دورمادان یازدی. شاعیر دئمیشکن :
سیندیرسان قلم یم
دیرناغیم لا یازارام
داها سومورگه چیلیکی(استعماری) ایلیک-سوموگو ایلیگینه جان دویاراق، میللتینه اولان جفالاردان ییغینجاقلاردا دانیشدی. اؤز تاریخی نین و ادبیات ینین درینله مه یینه جومدو. گونده م توپلومچولوق مقاله لری چئویرمه یه باشلادی. مستعمره دن یازدی و استعمارین اویونلاریندان. بوتون شعیرلرینده بونلاری گؤزه ل جه دویماق اولور. یازدی و یازدی و یازدیغی اوچون بو گون “اوین” ده دیر. او بی ین دیلی ایله دئسم دییه رم: “آغلاما آنا گؤزه ل یئرده یم”
بو گون سیامک لر توپراغینین هر قاریشینی دوغمالاشدیراراق اوشوین لرین اوستونه یورقان چکه رک اویادیب اؤزلوک لریندن دانیشیرلار.
فاشیست ین یاراتدیغی اکونومیک سومورگه چیلیک برنامه سی اوزره وطن داشلاری دک یئراوز ایله یئرآلتی قایناقلارا اصلینده مالیک اولاراق ایش سیزلیک دن دوغما آناسیندان – آتاسیندان و شهرینیدن مجبوریت له اوزاقلاشدیریلیب.(ائیله جه کی بو گون آذربایجان گنج لری حتی اؤز دوغما توپراق لاریندا فهله لیگین حسرتینده دیلر). آمما بو اوزاقلاشمالاردا سیامک لرین اؤزه ل لیک لری باشقا وطن داشلاریندان دوشونجه لرینین ده ییشیلمه مه یی دیر کی نده نی اوره ک لرینین هوپماغی و هر آن آذربایجانا چیرپینماغی دیر.
بو گون عزیز آنا گؤزلریوون یاشینی سیله رک سیامک آددا ایگید اوغول دوغدوغون اوچون ائل ایچینده باشینی اوجا توت. نییه کی سیامک لر دونیانین بئش شایی سیندان اؤته ری و رفاه دا یاشاماق اوچون حاضیر اولماییب لار ظولمه باش ایه لر. ائیله جه کی حقیقتی دانیشماق اوچون حاضیر اولوب میللتی ایله بیر بندیده و بیر سلول لاردا آنجاق اؤزگور یاشایا.
سون سؤزو دئمک ایسته ییردیم اگر بو گون سیامک بی نن قان آنامیز بیر اولماسادا ، آنا توپراغیمیز بیر دیر. توپراغیمیزین آزادلیغی اوغروندا توتدوغوموز قوتسال منطقی و هجوم لو موبارزه یولوندان هر زامان بیر-بیریمیزه آرخا اولاراق جانی میزی قوربان وئرمک حدینه قدر اسیرگه مه یه جه ییک .
ابراهیم نوری
