بو شعر ایتیحاف اولور دوستاقداکی آذربایجانین میللی مدنی فعالی سیامک میرزایی جنابلارینا
یخیلدی دوشونجه‌مدکی دام دووار
اوچدو بوتون تیکدیگیم بینؤوره لر
سنسیز ائله بیل ،
کئچن عمروموز عمر دئیل
قوجامان شهر یالقیزدیر،سنسیز
یالقیزجاسینا،یالقیزلارین یالقیزیسان
بوتون قایدالاری سیندیردین
گوج بیرلیکدن کوسدو
گوجون،یالقیزلیغینا آنلام وئردین
حکم یاغاندا گولومسه‌دین کلفچه لره
سر حدلره بیر جیزیق چک
سیندیر بوتون ساعاتلاری
جینایت دیر
فلاکت دیر ، بو آجی یاشام
عدالتسیزلیگین سونودور بو سول ایمگه
سوچلاندین سوچسوزجاسینا
یارین،بیرلیکده بوتون شهر اینتیحار ادجک
ایچیمدکی کؤرپه اوشاق هایقیریر
الیمدکی قارا میداد شکلینه آخیر
آق قارا سوزولور
بو گئجه بوتون دووارلار،
شکلینه اؤپوش ایزی بوراخاجاقلار
بو گئجه،هامیمیزین حالی پیسه بنزییر
بوغولور کیملیگین آختاران او قارا بالیق
افسانه دیر ، خیالدیر بلکه
بو زهرلی سؤزلر
فضولی نین مین جانی یوخدور منده،
تا هر بیریله اولام مین کز فدا سنه
علی اکبرصابرین نه ایشیم واری،
سوزولمور اللریمدن
بوکه‌جک عصب سارسینتیلاری بئلیمی
بیر صاباح،
دوستاقلاری سویقیریم ائدجکلر
اؤزگورسوز یاشاملار آیاقلاناجاق
چئشیتلی بایراقلار یئرینه
اینان صاباحین ایشیغینا
اینان بو قلمین دوغرولوغونا
و سونوندا سن...
باغرینا باساجاقسان بو قارالامانی
گؤروشجکسن هنیرتیلرله
اؤپه‌جکسن ویجدانلارین دوداقیندان
افسانه دیر خیالدیر بلکه...
اینان....اینان
