من ائله اوشاخلیخدان کی قار یاغاندا مدرسه‌لر تعطیل اولاردی، قاری چوخ سئوه‌رم! او زمانلار قار یاغاندا چیخیب کوچه‌ده اوشاخلارینان اوقدر قار گوللـه‌سی اویناردوخ کی، اللریمیز دوناردی. سورا دا گلیب دونموش الیمیزی توتاردوخ پونجون ایستی‌سینه، اللریمیز ایستی- سویوخ اولاردی، سوموک‌لردن بیر سانجی قالخاردی کی گل گؤره‌سن!
آخیر سئری کی بئله بیر سانجی چکمیشم، هئش یادیما گلمیر نئچه ایل‌لر بوندان قاباغ ایدی. دئدیم چیلله‌لردی، چیخیم محلله‌‌ده قونشولارینان بیر مصاحبه ائلییم. اولارین دا نظرلرین قارا گؤره سوروشدوم، بو جوابلاری آلدیم:
«احبر باققال»: اوغلان بورون قولاغیمیزا قورد دوشوب. آل‌وئر یوخدی. گینه یایدا میلچح اوچوردوردوخ، ایندی او دا یوخدی. گلیروخ بوردا یولداشلارینان بیر-بیریمیزه قویروخ بتدیروخ، سحری آخشام ائلیروخ، چیخیب گئدیروخ. ایندی بیرده قار یاغسا، او اوچ جوت بیر تک موشتریمیز ده کی وار ائودن چیخماز، بیز قالاروخ سوفته‌سیز. قوی اوتوراخ قردش، قاری نئینیروخ؟
«سیبیل‌لی کیشی»: قردش نه قاربازلیغی دی با؟! قار دئدیغین کئفی‌سازلارینکی‌دی، بال قئیماغی یئسینلر گئدیب دؤشه‌سینلر ایسکی‌یه. کاسیبا دا قارین شخته‌سی قالار! بیرده آی باشی «گاز» قبضی، کی آدام گؤرنده گؤزلری چیخیر تپه‌سینه! باخ بیر منه! قار یاغسا دا یاغماسا دا، یایدا دییه‌جاخلار سو یوخدی. قوی باری یاغماسین بیزیم ده بئش اون قیران یارانه پول‌لاریمیز قالسین جیبمیزده.
«پوزلی قیز»: وای‌ی‌ی‌ی‌ی قااااار چوووخ عالی اولار با! من قارا عاشیقم دا، جان وئرر سئلفی عکس سالماغا، چوخ خاص اولار!
«سه‌تیغ قوجا کیشی»: خئیر آغا! گئتدی او زمانه. گئتدی او زمانه کی، تبریزه ائله قار یاغاردی کی گولن آیاجان اریمزدی، یئرده قالاردی. ایندی‌نین قارلاری قار دییر کی. او زمان قاری داملاردان کورردوخ تؤکردوخ کوچه‌یه، کو‌ده آدام بویوجان قار قالاناردی. ییغیشاردوخ کورسو باشینا، رحمتدیخ آتام بیزه بایاتی اوخویاردی، نغیل دییه‌ردی، تاپماجا سوروشاردی... هئی روزیگار! گئتدی او گونلر.
«الینده کیفی اولان جوان اوغلان»: اوغلان سنین یا کئفین چوخ سازدی، یا دا کی چوخ بئکارسان بوجور سؤزلره فیکیر وئریسن. منی گؤروسن؟ ۳۲ یاشیم وار نه یای گؤردوم نه یارپيز، نه قار گؤردوم نه قارپيز! منیم مین بیر دانا دردیم وار، ائولنه‌جاغام پولوم یوخ، پول قازانماغا ایشیم یوخ، ایش تاپماغا پارتیم یوخ. یادیما دوشن ائله بیر قاردی با!
«پوتا کیشی»: قیدش قای چوخ گؤزل اولای، چوخ یویایی اولای! قای یاغاندا اوتویوب باخاندا، اینسان آیامئشِ دَیونی‌یه یئتیشَی. فقط بیز گیَه‌ح فَیهنگ‌سازی ائلیاخ کی قایلی گونلَیده بعضی ماشین سویَنلَی پیاده‌لَیی میلازه ائله‌سین‌لَی. تاکسی شوفئی‌له‌یی دویوب چاییاه باشیندا دَیبست آختایماسین‌لای!
«سیرتیخ اوشاغین مامانی»: یوخ سن آللاه قار ایسته‌میرم ها! اوشاخلار ائشیهدن گلنده هره‌سی ایاغین آلتیندا بیر باتمان دا قار، زیغ، پالچیخ گتیریر چیخاردیر ائوین یوخاری باشینا. واللاه سیل- سوپور ائله‌ماخدان بئزمیشم. (اوشاغینا) آرمیییییین! ندو ... اونجا یخه، اومدیم دو دَیقه هاوا بخوریم، الان لیز می‌خوری، زمین می‌خوری، سرما می‌خوری منم حرص می‌خورم! بورنومدان گتیرمیین‌جن دیش دورماز کی!
«الینده کدوسی اولان قوجا کیشی»: بو سؤزلری بوشلا با، منه دئ گؤروم بو آیین یارانه‌لرین تؤکوبلر یا یوخ؟ ... تؤکوبلر؟ اوندا بس بالامسان من باشارمارام، آل بو کارتی اوردان بیرآز منه پول گؤتور. ائوده‌کی قودوغوما دییه‌نده، پولو آلیر یاریسین دا قویور اؤز جیبینه، بیلمیسن کی منی دوز بوراما یئتیریب با!
«چیل چیل پیشیح»: آی بالا! نئچه وقتدی هئش پوتا پیشیحدن خبر یوخدی. ماشین آلتیندا قالمیب؟ قاردا شخته‌ده دونمویوب؟
«ساری پیشیح»: اونون کئفی سندن مندن سازدی. خیاوانین اوباشیندا بیر تازا رستوران وار. پوتا پیشیح نئچه وقت گئدیب اوتوردی اورانین قاپیسین آغزیندا، میولدادی، ایندی اولوب اورانین پیشیحی، بیر چالدیریر کی گل گؤره‌سن!
«چیل چیل پیشیح»: نئجه بیزلر یازیغوخ، بوجور ایشلر باشارمیروخ؟!
«آغ قره پیشیح»: ائله بیز اوردا یازیخ اولدوخ کی دئدوخ قازانین قاپاغی آچیخ قالیب، به پیشیگین حیاسینا نه گلیب؟ آما بیلمه‌دوخ کی نعمت هر دو جهان قسمت پررویان است/خون دل می‌خورد آنکس که حیایی دارد!
«قره پیشیح»: چهمرم قصابین میننتینی یئیه‌رم اؤز اتیمی!
«آغ قره پیشیح»: اوغول بالا سن ائله بوجور خوزولاندین کی، ایندی بو قار کولکده کوچه‌ده قالیبسان دا! هله جوانسان، نفسین ایستی یئردن چیخیر. منه تای ۱۰ یاشیوی آشیرسان، صاحاب دورانین دا اولماسا اوندا کئفو سوروشارام!
«قره پیشیح»: دیشاریدا کار یاغیور/ بئنیم ایچیمه یاغمور/ آغلاما گؤز ببه‌ییم/ بیرآز داها دور ... میوووو ...
