تراختور تاخیمینین قاهرامانلیغی میللتیمیزه ایللرجه اولونان آیریمچیلیقلارا، آشاغیلامالارا، ازمه لره و چکیلن چوخلو چیله یه رغما ۵۵ ایل سونرا تئکرار اله گلدی!
ایران فوتبال فدراسیونو طرفیندن آزربایجانین تراختور و ماشین سازی تاخیملاری علیهینه اوزون ایللر اولونان آیریمچیلیقلاردان دولایی سوپر لیگده آزربایجانی تمثیل ائدن بیر تاخیم اولمادیغی اوچون آزربایجانلیلارین بیر چوخو مرکز تاخیملارینا یؤنلمیش اولسا دا کوتله ایچینده همشه آزربایجان تاخیملارینین سوپر لیگده اویناماسی آرزیسی واردی.
او زمانلار بیر چوخ آزربایجانلینین تهران تاخیملارینین آزارکئشی اولما سببلریندن بیری و ان اؤنملیسی چوخ ساییدا تورک اویونچونون او تاخیمدا توپ وورماسی ایدی. تراختور یاخشی ایمتیاز آلسا و اوست لیگه یوکسلمه شانسی چوخالدیغی زمانلاردا ایسه تبریزده و باشقا شهرلرده جاوانلار قلیانا گلردی، دئمک تهران تاخیملارینین آزارکئشی اولسالار دا میللی حیسیاتلارینین گوجلو اولدوغونو گؤستریردی.
سوپر لیگده اوینادیغی ۱۶ ایلده هر فورصتده هر اویوندا بو قهرمان میللتین غورورونو آیاقلادیلار، ازدیلر، آنجاق میللتیمیز چوخ دؤزوملو و گوجلو دیرنیش روحو ایله ۱۰۰ ایلده فارس شوونیزمی قارشیسیندا دیرندییی کیمی ۱۶ ایلده ده حاقسیزلیقلارا تسلیم اولمادان اومودونو و دسته یینی کسمه دن تراختورون آرخاسیندا بیرلشدی.
همده بو ایللرده باشقا ساحده هر ایل چوخلو باشاریلارا نائیل اولوندو. هر اویوندا اونلار، یوزلر یئنی یئتمه، گنج اؤز کیملییینه دؤنوب، میللی حیسیاتی اویانیر. تراختور ساده بیر فوتبال تاخیمیندان اؤته یه کئچیب آزربایجان تورک میللتینین اویانیش سمبوللاریندان بیرینه دؤنوشوب، میللتیمیزین میللی ایستکلرینی گوجلو شکیلده سسلندیرمه سینه میدان اولوب، بیر باخیمدان اؤزگوونینی دیری توتوب، میللی روحونو دیرچلدیب، بیرلییینی سیخیلاشدیریب و میللتلشمه پروسئسینده اؤنملی رول اویناییبدیر.
بو قهرمانلیغی کیمیسی «VAR» سیستمینین ایران جوغرافیاسینا گلمه سی دولاییسییلا حَکملرین تورک تاخیمینا قارشی راحاتلیقلا سس وئرمه سینین قاباغینی آلدیغینا باغلاییر و یا حتی تورک جومهور باشقانی سئچیلمه سینین ائتگیسی اولدوغونو دوشونورلر ده اولدو آنجاق ان اؤنملی رولو یورولمادان اوسانمادان هر اویوندا استادیوملاری دولدوران قایغیکئش آزارکئشلر و حَکملرین، فئدراسیونون، مرکز مئدیانین هر حاقسیز و غرضلی سسلرینه، قرارلارینا قارشی سوسمایان و هر وسیله ایله اولسون اعتیراض ائدن آییق میللتیمیز اوینادی.
سوندا بیر خاطیره گتیرمک ایسته ییرم. ۱۶ ایل اونجه تراختور آزادیگان لیگینده شاهین بوشهر تاخیمینی تراختور سازی استادیوموندا اودوب، سوپر لیگه گلدییی اویوندا بابک چلبیانی و باشقا بیر میلی فعال دوستوموزلا بیریلیکده بیر بارماق اولچوسونده «تورک دیلینده مدرسه اولمالیدیر هر کسه» یازیلی کاغاذلاری اوست سککیدن آشاغایا داغیلداراق، سسلن‌دیررک سلوقانی یایماغا چالیشیردیق، داها سونراکی اویوندا ایلک دفعه ایکی سککی ده قارشیلیق‌لی اولاراق بو شعار وئریلدی.
