شوقیله، آلقیشلیرام بو کوتله وی عصیانی، من

خلق ده، بو قدرت و بو عزم و بو ایمانی، من

خلق الیله ایستیرم برباد اولا ظولمون ائوی

گور مییم قدرتده، بو حکام بی وجدانی، من

هانکی یئرده بیربئله، بیداد و استبداد اولار؟

بوندان آرتیق نیلیرم، شلاقی یا زندانی، من؟

تنگه گلدیم بیر بئله اشکنجه دن، اعدام دن

ایسته مم بوغصه لی، محنت لی بیردورانی، من

گزمیشم بو قورخولی میدان لاری، باشدان باشا

هر طرفده گورموشم، مین قانینه غلطانی، من

سانکی قانیله یازیبلار یوردومون تاریخی نی

توپراق اوسته گورموشم، چوخ لخته لنمش قانی، من

باخمیشام مین دورت یوزایل لیک، خلقی مین تاریخینه

خلقه دوشمن گورموشم، هم شیخی هم سلطانی، من

خادیمم یوخسول لارا، یولداشلاریم دور ایشچی لر

نیلیرم سرمایه داری، پوللونی،اعیانی، من

فعله صنفی اولماسا ظولم و اسارت دن خلاص

نیلیرم تورانی، هندی، چینی یا ایرانی،من؟

یاده ساللام تبریزین گول لی چیچک لی، باغلارین

گول بوداغیندا گورنده، بولبول نالانی ، من

بیر بهشتی روی ایله، وار بوردا انس و الفتیم

زاهدا وئردیم سنه، مین روضه رضوانی، من!

یوخدی باکیم ذره جک، بو قان سوران حکام دن

وئرمیشم جلاده، چوخدان دی، بو شیرین جانی، من