گونون ان قیزیغین اود یاغدیران چاغی. ایستیدن بدنیم قایناییر. باشیمین کاساسیندا قانیمین بخار اولوب اوچودوغون گورورم سانکی. سوسوزام دییه ایچیمده بیر کربلا عطشی وار. عطشدن اورمو گولو گلیر گوزومون اونونه، قوپ قورو دوز باغلامیش ساحیل لر. حسن آزربایجان، تار الینده دیم دیک دایانیب ساحیلین لاپ زیروسینده، تاری باغریندا، گولون گویلون آلسین دییه، تام گوجوایله مضرابلاییر سیملری.
اما نه قدر ده هئیکللی اولوب بو کیشی. کولگه سی بوتون دنیزی چولغالییب. قصدن کورکلرین وئریب گونون قاباغینا گولون سویون قوروسون دییه.
آپاریجی چاغریر، قاسیم وطن اوغلو، سیزلاییر زابلی، حسن آزربایجان ساحیلین زیروسینده تاری مضرابلاییر.
ایستی یه دوزه بیلمیرم، اوزومو چکیرم حسن آزربایجانین دنیزه سالدیغی کولگه نین آلتینا.
آپاریجی چاغیریر بیر آیری دانیشان. سوزلر کلمه کلمه یازیلیر تاریخیمیزین صفحه لرینه. سونرا کی نسل... بیزی نجور قیمت لندیره جک؟ زامان چالخالانیر ایچیمده.
سونرا گلن نسیل لر رژه گئدیر حسن آزربایجانین آبیده سی مئیدانیندا.
نه ده گوزل گوز اوخشایان انتظامی وار بو رئژه نین. صفین اونونده گونئی آذربایجان بایراغی. دالغا دالغا میللی مارشین آهنگی له رقص ائدیر. گوزون ایشلدیکجه میللت وار مئیداندا بایراق اللرینده.
آزربایجان سنسن منیم ،علویتیم شان شهرتیم.
رئژه تاماملاییر، آپاریجی کیمسه نی چاغیریر تریبون آرخاسینا.
...
اولو تانرینین آدیلا.
حورمتلی آزربایجان میللتی
بو گون بیز بورا حسن آزربایجانین ایل دونومو مناسبتیله توپلانمیشیق.
بو گون دولت طرفیندن مباریزه گونو آدلانیب. رحمتلیک حسن آزربایجان بو مباریزه نین نمونه سیدیر. حسن آزربایجان بیر فرد یوخ بلکه بیر میللتین مباریزه سیمگه سیدیر. بیزیم له وطن آذربایجانین بو گونکو سعادت ایله اوزگورلویو کئچمیش مباریزه لر سایه سینده الده اولوب.
گوزلریمده بیر بولوت دولماغا باشلاییر.
آپاریجی چاغیریر، مهندیس تقوی.
مهندیس تقوی دانیشیر.سوزلرین ایچینده عاباس بی لیسانین آزادلیغین ایسته ییر.
یادیما دوشور حسن آزربایجان ین جنازه توره نی.
وحید شیخ بیگلو عاباس لیسانین الیندن یاپیشیب جمیعتین ایچیندن تریبون آرخاسینا چکیر. عاباس بی اورتادا قالیب. بیر ال تریبون آرخاسینا چکیر، بیر ال تریبون آرخاسیندان چکیر. پان فارس ایراده سیله آزربایجان ایراده سی چکیش مکیکشده دی بوردا. او چکیر بو چکیر. نهایت وحید شیخ بیگلو ظفر چالیر.
عاباس بی تریبون آرخاسیندا دانیشیر.
پان فارس چکنمه دی بو اوتوزماغی.
ایندی ایسه لیسانی دوستاقدا. آجلیق آکسیاسی کئچیردیر.
آجلیق آکسیاسی...
امیرستاری تیکیلیر گوزلریمین اونونه. ایگیرمی یاش بیر جاوان. ناحق محکومیت اوچون آجلیق آکسیاسی کئچیردیر. اودا عاباس لیسانی کیمی.
امیرین سولموش سیماسی پرده اولوب چکیلیر گوزلریمه.
داها کیمسه نی گوره بیلمیرم ..کیمسه نین سسینی دویا بیلمیرم.
...
دکتور زوارین الینین آغیرلیغین چیینیمده حیس ائدیرم. حسن بی سنه نه اولوب؟
بیر آغاجین قاچاق کولگه سینده اوتورموشام. بیر چیمتیک سو چیرپدیم اوزومه. زوارین سسی ایچیمده سسله نیر. گون ویریب سنی حسن آقا .دور گئده ک حکیمه دییرسن.
یوخ یاخجیام ایندی دوزه لرم.
(حسن ارک) ۹۸/۳/۳۱.
