سلام. منیم آدیم آراز دی. بعضاً سیزین اوچون نقاشی چکرم و باجیم دنیز ایله بیرلیکده ناغیل یازاریق. ایندی سیزه بیر موضوع حاققیندا دانیشماق ایستییرم. من باشیمین توک¬لرینی اوزاتماغا قرار وئرمیشدیم. اوزون ساچ منه چوخ یاراشیردی. بونون اوچون اوزون توک¬لریمی سئویردیم. تئز- تئز حاماما گئدیب، باشیمی یووردوم. قوناق-لیق و یا ائشیگه گئدنده، باشیمی داراییب، بعضاً ده ژل ووروب، مدلینی دوزلدیردیم. حاماما گئتماغیم دا لاپ آزی 15- 10 دقیقه چکیردی.

بیر گون آنامین پروفایلیندا بیر شکیل گؤردوم. بو شکیل ده بیر خانم، دبه- دبه سو دولدوروب، ماشینین دالیسینا یوکلویوب، آپارماق ایسته¬ییردی. سوروشدوم:

-آنا! بو خانم کیم دی؟ نه ایش گؤرورو؟

-بو بیر خوزیستان¬لی خانم دی. اؤزلرینه ایشمه¬لی سو آپاریر. آخی اونلارین قیرنالاریندان شُور سو گلر. دئدی آنام.

من دئدیم:

-نییه بس بیزیم قیرنالاریمیزدان شیرین سو گلیر، اولارین کیننان شُور سو؟ آنام غصه لنیب، دئدی:

-آراز! بئله کی قاباغا گئدیر، بیزیم ده گلن ایل¬لرده ایچماغا سویوموز اولمایاجاق. دنیا دا سولار آزالیر. بیزده بونو سایمازدان گلیریک. وطنداش لاریمیزی سوسوز گؤره- گؤره هئچ سایمیریق. هله اورمیه گؤلو گؤزوموزون قاباغیندا قورویور، باری اونا گؤره بیر ال قاباغا وئرمیریک. هر گون بیر چوخ لاری ماشین لارینی ایچمه لی سو ایله یویورلار. کوچه لره شیلانک چکیب، سولاییرلار. من تئز دئدیم:

-اما من او گون بیر لیوان سو دولدوردوم سو سه¬پنه، دستمالی گؤتوردوم، ماشینی اوننان سیلدیم.

آنام دئدی:

-بو چوخ گؤزل ایش دی. اما چوخ آدام سویون قدرینی بیلمیر. حتی سو پولولاری چوخ گلسه ده، اؤنم وئرمیرلر. دوغایا دا یازیق لاری گلمیر، اؤزلرینه ده. سونرا آنام دئدی: آراز! هئچ بیلیرسن اگر هر کس دوش توتماغینین زمانینی بیر دقیقه آزالتسا، بیر آی مدتینده 600 لیتر سویون مصرفینده صرفه جولوق ائلییب؟

من بونو بیلمیردیم، هئچ فکیر ده وئرمه میشدیم. 600 عددینی 12 یه ضرب ائله دیم. اولدو 7200! بو حسابنان اگر من دوش توتدوغوم زماندان بیر دقیقه آزالتسام، ایل ده 7200 لیتر سو اسراف اولماز. دئدیم:

-هر بیر نفر، بیر ایل صرفه¬جولوق ائله¬سه، بیز بحراندان چیخاریق ها آنا! بیلیرسن دا...

او گون حاماما گئدنده چالیشیردیم آز زمان چکسین، اما گینه ده اولموردو. او گؤزل ساچ لاریمی تمیزلمک اوچون هئچ اولماسا ایکی دفعه شامپو ویرمالی ایدیم. گله¬جک ده سویون آز اولماسی، ایچماغا سو نوبه سینه دورماق منی قورخودوردو. کامپیوتری آچدیم، اوشاق لیق شکیل لریمه باخیردیم. آنامین قوجاغیندا اولاندا بیر مسافرته گئتمیشیک. او شکیل¬لریمیزه باخاندا آنامین گؤزلری دولار." آی زمان! سنین سورجینده نه لری ایتیردیم" دئیه¬ر. بو دفعه داها دقت¬له شکیل¬لره باخیردیم. اوندا هله آتام ساغ ایدی. ایکی سی بیرلیکده گمی ده دیرلر، آنام منی قوجاغینا آلیب و اورمیه گؤلونو بارماغی ایله گؤرسه¬دیر. آیری بیر شکیلده منی ساحیلین قوموندا اوتوردوب، قیچ¬لاریمی قومونان اؤرتوب¬لر، داییمین اوشاق¬لاری دا گؤلون ایچینده چیمیرلر. آنام دوز دئییر، زمان سوره جینده اورمیه گؤلونو ایتیرمیشیک. بو ایل اوردان گئچنده سو یوخ ایدی. قیپ- قیرمیزی ایدی. آنام قویمادی ائشیکده قالاق، تئز بیزی ماشینا میندیردی. دئدیم:

-آنا دؤز بیر آز هاوامیز دَییشیلسین.

-بو هاوا دا آدام بوغولار بالا! بوردا هاوا دَییشیلمز. دئدی...

کامپیوتری باغلادیم. او قدر داریخمیشدیم کی، هر دم حیس ائلییرم بؤیویورم. اوندا لاپ داریخیرام. آخی من هله ایستییرم اوشاق قالام. اما دا آز قالیر بویوم آناما چاتسین. بیردن- بیره اؤزوم¬نن قرار قویدوم باشیمین توکلرینی قیسسالدام. بو مسأله¬نی آناما دئدیم. آنام سؤزومو ائشیدیب - ائشیتمه میش:

-مگر قرار دَییلدی کئچل صحبتی ائله مییاخ؟! دئدی. (آخی من هر وقت آواتارین کارتونونا یا بعضی ساواش فیلم¬لرینه باخاندا دئیه¬رم ایستیرم کئچل اولام)

-آنا! اینان بو دفعه آواتار و یا فیلم¬لرده گؤردویوم قهرمان¬لارا گؤره دئمیرم. بو دفعه سو مصرفینده اسراف ائتمه-مک اوچون ایستییرم توکلریمی قیسسالدام.

آنام بو سؤزو ائشیدنده، دورمادان گئدیب، آتامین اوز ماشینینی گتیریب، منیم باشیمی کئچل ائله¬دی.

اوشاقلار یای فصلینده آدامین تئز- تئز حاماما گئتماغی لازم دیر، اما بیز ائلییه بیله¬ریک اونون زمانینی آزالداق و سویون چوخ مصرف اولماغینین قاباغینی آلاق. بلکه گلن هفته¬لر سیز ده باشیزی قیسسالدیب، منیم کیمی سویون چوخ مصرفینه سون قویماق اوچون بیر حرکت باشلادیغیز شکیل¬لریزی مونجوغا گؤندریب، بیزیم¬له پایلاشدیز.

آراز امانی

مونجوق / یکشنبه 17 قوراپیشیرن 1397