بیر یورغان، بیر اؤرتوک
آلتیندا پیچیلداشیریق
من،
آنام.
قورخولوق بالتالی
دوستاقلی،
آغزیمیزدا سؤزلری گیزلتمک گرک
سؤزلرین جزاسی آغیردی ایندی.
باشقا دیللرده دانیشماق،
گولمک،
سئوینمک،
سئومک،
اوز آنا دیلیمیزده سوسموشوق ایندی.
دیلیمیزی آغزیمیزدا
گیزلتدیک بیز.
گیزلینده قونوشدوق
آنام،
من،
دیلداش قارداشلاریم.
قورخولوق کولگه سی
باشیمیز اوسته
سویوقلوق، شاختالی
قارلار ایچینده
آچیلماق ایستیرم بئنوشه کیمی.
من گرک باغچالاردا
اکم سؤزلری،
سارماشیق گوللرده،
سیریمی آچام.
اؤرتوکلر آچیلا،
گونش کیمی
آیی کیمی،
گئجه لر گوندوزلر
آیدین لاشالار.
"چوپورپاسبان"نین
باتوم آغاجی،
باشیمیزدان قالخا
قاپی آچیلا
دوستاقلار داغیلا
دیل لر آچیلا
قوش لاردا اوز دیلینده
سئوه سئوگینی.
