گل بۇ داغدان آشاخ گئدک
بۇلاق اوْلوب داشاق گئدک
يوْل لار باغلی،حاصار اوْلسا
یئل کیمی دیرماشاق گئدک.
گل اوْچاق اوْ اۇجا داغا
باخاق داغدان يانیق باغا
باغلی قالما سۇلا-ساغا
آچ قانادین اوْچاق گئدک.
گل دانیشاق بیر سئویشدن
بیر باریش دان، بیر دؤيوشدن
"خان چوْبان"نان، سوْن گؤرشدن
"سارا" اوْلوب آخاق گئدک.
مۇغان دئمه قان چاناغی
تئلین ده وار يار داراغی
"خان" ائوینده ظۆلم اوْجاغی
گل اوْجاغی ياراق گئدک.
