جمعی از زندانیان سیاسی آزربایجان با ارسال پیامی از زندان اوین ضمن حمایت از اتحاد احزاب آزربایجان جنوبی، بر لزوم همکاری فعالین ملی تاکید کردند.
متن این پیام مهم به این شرح است:
اولو تانرینین آدیلا
سلاملار و سایقی لار عزیز آذربایجان ملتینه،حورمته لاییق میللی حرکت فعال‌لارینا.
موعاصر دونیادا چوخلو مدنی موباریزه‌لر آزادلیق، انسانی حاقلار و عدالته دوغرو گئدیر و طبیعی کی بو هدفلر اوچون رسم اولان یوللار اوزوده موعاصیر پرنسیپ‌لره حائیز اولمالیدیر. دویغو ساللیقدان ایراق، شورایی و جمعی مصلحته دایانمالیدیر.
دونیانین گونده‌م اجتماعی حرکت‌لری پارتیالار رهبرلیگی آلتیندا نتیجه‌‌یه منتهی اولموش و بویوک اینسانلاری گئنیش کاریزمالار‌لا تربیت ائتمیش.
بوگون بیزیم تبعیضه معروض قالان وطنیمیزده بو گرک‌لی حقیقتدن آیریلمالی‌دیر. نئجه‌کی ایلک دفعه دموکراتیک فرقه رهبرلیگی آلتیندا بیر ایل آزادلیق، عدالت و انسانی حاق‌لارین و هابئله
اوزگورلوگون عادتینه ال تاپیپ و هله‌ده او سعادتین لذتینی ذائقه‌سینده اونوتماییب.
بو گون بیزه چاتان خبرلر،میللی حرکته منسوب اولان جریان‌لارین بیرداها یوکسک اتحادلاریندان و ایش بیرلیگیندن دانیشیر.
آذربایجان میللی موطالیبه‌لری، سعادتی و اوزگورلوگو یولوندا یارانان تشکیلاتلارا و پارتیالارا، سون درجه سایقیلار و سئوگیلر دیله‌یه‌‌رک و شووینیزمین اسارتینده اولساق دا، وطن سعادتی یولوندا و میللی حرکت اولکلری اوغروندا بیرلشیب متحد چیخیشلارا آددیم آتان عزیز دوستلاریمیزا قوت قلب وئرمه‌یی اوزومیزه میللی وظیفه بیلیب و محبت و صمیمیت‌له اللرینی سیخیریق.
عزیز دوست لار نئجه‌کی دونیانین دیگر ترپه‌نیشلری دموکراتیک پارتیالار، تشکیلاتلار و جبهه‌لر پتانسیلی ایله اوزاق اوزاق یوللاری اوز خالقلارینا یاخینلادیبلار،یئنی یارانان اتحاد و بلکه گله جکده بویوک جبهه سه‌ویه‌سینه ایرتیقا تاپماق گوجونه مالک اولان بیرلیکلره صمیمی تبریکلریمیزی گوندریریک. هابئله گله‌‌جکده بیرداها یارانابیلن یئنی پارتیالارا و جبهه‌لره‌ده اورگیمیزین سئوینجی‌ایله اینتیظار چکیریک.
شوبهه‌سیز بو حقیقته ایناناراق دئییریک هر یئرده جمعی مصلحته دایانمیشیق، داغی داغ اوسته قویماق گوجونه مالک اولموشوق. شبهه‌سیز کئچمیش گونلرده یارانان بیرلیگیده بو یولدا گوروب تقدیره لاییق بیلیب، بوتون قایغی‌کئش دوستلاریمیزا و اولکه‌‌میز آذربایجانا سعادت و اوغورلار دیله‌ییریک.
عدالت، آزادلیق و انسان حاقلارینا دایانیب اوز طالئیینی رقم ویران حرکتی کیمسه دایاندیرا بیلمز.
شعاریمیز اولان ائل گوجو، سئل گوجونو عمل درجه‌سینه چاتدیرمالییق.
یاشاسین وطن، یاشاسین وطن ائولادی.
ائوین زندانیندا محبوس اولان میللی فعال لار
۱.ودود اسدی
۲.محمود اجاق لو
۳.مرتضی پروین
۴.سالار طاهرافشار
۵.عبدالعزیز عظیمی قدیم
۶.طاهر نقوی
