آذوح: بۇگۆن ۹۵/۰۷/۱۷، اۇرمو بیلیم‌یۇردونون اؤیرنچیلیک دنیز درگیسینین اوْن‌اۆچونجو ساییسی یاییملاندی
تۆرکجه- فارسجا یاییملانان دنیز درگیسینین بۇ ساییسی، اؤزل اوْلاراق یئنی گیریشلی اؤیرنچی‌لره سۇنولموشدور.
آرتیرمالی‌ییق، بۇ درگی کئچن قیشدان باشلایاراق، اۇرمو بیلیم‌یۇردونون درگی‌لره باخان کمیته‌سی طرفیندن ۶ آی بوْیونجا یاییم دۇردورولوشونا اۇغرامیشدی.
دنیز درگیسینین سوْروملو یؤنه‌دیجیسی یاسر رنجبری‌نین، اؤن‌سؤز باشلیغی آلتیندا یازدیغی یازی:
ديَرلی يئنی گیریشلی اؤيرنچی‌لر، آذربایجانین اینجیسی اورمو شهرینه، هابئله اورمو بیلیم‌يوردونا خوش گلدینیز.
اوزون سوره چالیشاراق آغیر بیر سیناغین آردیندان امَه‌يینیزین قارشیلیغینی آلیب، اورمو بیلیم‌يوردونا گیریشینیزی ایچدن دویغولاریملا قوتلايیرام. آرامیزا خوش گلیبسینیز سئوگیلی يولداش‌لار.
بیلیم‌يوردو آدلی قوروم، ياشامینیزین گئری قالانینی بیچیملندیرمه‌نیز اوچون اؤنونوزده چوخ اؤنملی بیر آراج اولاراق دورماقدادیر. بیلیم‌يوردونون ياشامینیزین دؤنوم نقطه‌لریندن بیری اولابیلمه‌سی اوچون، بیلگیلندیرمه‌يی آماجلايان بو قورومدا، دورمادان بیلگیلنمه‌يه دوغرو آددیم آتمانیز گرکلی‌دیر. اؤيرنچیلیک دؤنَمینده ائدینه‌جه‌يینیز هر بیر باشاری، سیزی ياشامینیزدا بیر آددیم اؤنه کئچیره‌بیلر، دئيه دوشونورم. اؤيرنچی‌نین توپلوم اوزَرینده و گلیشیمینده اولان اولوملو ائتکیسی دانیلماز بیر گئرچکدیر. آذربایجان تورکلويونون آيدین گله‌جه‌يه دوغرو ایره‌لیله‌يیشینده اؤنملی قاتقیدا بولونان اؤيرنچی توپلولوغونون میللی کیملی‌یی و وارلیغیيلا اولان باغی‌نین قورونوب گئنیشلندیریلمه‌سی، بو توپلولوغون اوستلنه‌جه‌يی ان ديَرلی گؤرَولردن بیری‌دیر.
میللت‌لرین وارلیغی، دیلی‌نین وارلیغیندان آسیلی دیر. بیر میللتین ییخیلیب، یوخسا دیزه چؤکدورولمه‌سی، دیلی‌نین آرادان گئتمه‌سیيله گئرچکلشَر. بو اوزدن، آذربایجان میللی حکومتی‌نین باشچیسی، سیدجعفرپیشه‌وری، آنا دیلینی اؤلوم- دیریم سورونو اولاراق تانیملامیشدیر. بیر يوزایللیيه ياخین آنا دیلینده يازیب اوخوماسی ياساقلانان آذربایجان تورک‌لری اولاراق، هله ده اؤز دیلیمیزده اؤيره‌دیم حاققینی قازانانمامیشیق‌سا، بو، تورک کیملی‌یینی توشلايان درین و ایيرنج بیر سیاستین، ائله‌جه‌ده قارشیسیندا گرکلی اولانی ياپابیلمه‌دی‌ییمیزین آلتینی جیزماقدا و اؤنَمینی وورغولاماقدادیر.آرتیق اوخولا، بیلیم‌يوردونا، ایش يئرینه،... گئدرکن آنا دیلیمیزی ائویمیزده بوراخماق گئدیشینه دور دئمه‌لی‌يیک.
بوایل، تبریز بیلیم‌يوردوندا آذربایجان تورک دیلی و ادبیاتی‌نین آلان اولاراق سئچیلیب اوخونابیلمه‌سی، تورک دیلینده اؤيره‌دیمین ساغلانیلماسینا دوغرو بیر آددیم کیمی ديَرلندیریلسه بیله، اؤنملی اولان بو سورَجین نئجه آشیلماسی دیر. باشقا سؤزله، تبریز بیلیم‌يوردوندا تورک دیلی و ادبياتی، بلیرگین اورتاق آذربایجان تورکجه‌سی‌نین واراولوشونا قارشین «تبریز لهجه‌سی» دئيه بیر دانیشیق دیلی‌نین دوغرولتوسوندا اؤيره‌دیله‌جکسه، بو توتوم، آذربایجان تورکجه‌سی‌نین اؤيره‌دیمی آنلامینا دئيیل، بیر دانیشیق لهجه‌سینی قابارداراق ایراندا آذربایجان تورکجه‌سی‌نین اورتاقلاشابیله‌جه‌يینی اؤنله‌مک آنلامینادیر.
اوزَرینده دوراجاغیم سونراکی قونو ایسه، آذربایجان بیلیم‌يوردلاریندا اؤيره‌دیله‌جک «آذربایجان تورک دیلی و ادبیاتی»نین نئجه آدلاندیریلماسی دیر. سويو «تورک»، يوردو «آذربایجان» اولان بیر توپلولوغون دیلی‌نین ده، «آذربایجان تورکجه‌سی» اولاراق آدلاندیریلماسی سؤزسوز و اولدوقجا دوغال بیر توتوم دور. دولايیسیيلا، سؤزوگئدن آلانین آدیندا، «آذربایجان» آدی‌نین «آذری» سؤزویله دَییشدیریلمه‌سی، باغیشلانیلماز بیر يانلیش ساییلیب، کَسین قینانیلمالی‌دیر.
دنیز درگسی‌نین کئچن قیشدان باشلاياراق 6 آي بويونجا يايیم دوردورولوشوندان سونرا، سیزینله بیرداها بولوشابیلمک‌دن موتلولوق دویاریق. بو درگی، 1389 ایلیندن بری تورک اؤيرنچی‌لرین میللی دوشونجه‌سینه آرخالاناراق وارلیغینی سوردورمکده‌دیر. سیز ديَرلی اؤيرنچی‌لرین بیزیمله ایلگی قوروب ایش‌بیرلیک ائتمه‌سی‌نین، دنیز درگیسینین داها گوجلو ایره‌لیله‌ییشینه یاردیمچی اولاجاغینا اینانیریق.ائله‌جه، دنیز درگیسینین چالیشدیریلماسیندا امه‌یی کئچن بوتون یولداش‌لارا درین سایغی و سئوگیمی سونار، یاپدیقلاری قاتقی‌لاردان دولایی تشکرو بیر بورج بیلرم.
سايغیلاریملا
دنیز درگیسینین سوروملو يؤنه‌دیجیسی
درگی‌نین بۇ ساییسیندا یاییملانان باشقا یازی‌لارین باشلیق‌لاری ایسه:
چهار دیدگاه در مورد ریشه‌های لغت آذربایجان/ابراهیم ساوالان
ادبی دیلده یازمالی‌ییق یوْخسا محلی لهجه‌ده؟/حسن راشدی
«تۆرك» آدی‌نین آنلامی/یاسر رنجبری(سوْروملو یؤنه‌دیجی)
https://www.facebook.com/deniz.dergisi/
آذوح
