yarı Hənək - yarı Dəyənək
usulı dini hər şeydən üstün görəcəksən
hətta yamağı dinlə söküb sən hörəcəksən
keyfiyəti yox məcbur olub din sevəcəksən
şirin canını bu işə qurban verəcəksən
yoxsa olacaq dünya sənə dar sekular
sekular ay sekular sənə divan tutular
daz et başını, qəmə , bıçaq yükliyəcəksən
şurə gələrək qan damara köklüyəcəksən
zəncirlə çalıb yumruq ilə sən döyəcəksən
ziyalıları təhqir edib ! sən söyəcəksən
yoxsa olacaq dünya sənə dar sekular
sekular ay sekular sənə divan tutular
toxunma dinə qətlinə fərman gələcək
əlqaıdə yox bir dəstə taliban gələcək
şəubi düşün ağlına o iran gələcək
qapı-bacadan hər ləhzə hər an gələcək
tanrı qorusun vah vah amandı sekular
sekular ay sekular sənə divan tutular
demə bitərəfəm heç dinə bel bağlamaram
nohə oxumam , sinə çalıb ağlamaram
əshabidən ötrə sinələr dağlamaram
aşura günü şəlmə başa bağlamaram
bunları demə cürm , günahdır sekular
sekular ay sekular sənə divan tutular
haqq malladadır izni o dindən almış
bir sünnət imiş toz basıb , paslanmış
reforma gəlməyəck uzun sürə sallanmış
gəliri var bu atın ! qızıl , gümüş nallanmış
toxunmaq olmaz ona biməlisən ey sekular
sekular ay sekular sənə divan tutular
bilmirəm yoxdur bizim kültürü sən incələsən
etiraf eşitməzsən ! bəlkə bir az dincələsən
o qədər mən mən eşid ki az qala gicələən
izin yox öyrənəsən çox billəsən dirçələsən
burnunu soxma deyərlər hər işə ey sekular sekular ay sekular sənə divan tutularar
addi adam yoxumuzdur biri onla qonuşa
insaflı tapabilməsən olduğucan o danışa
o qədər filosof var ki az qala ağlın qarışa
hərənin öz planı dünya düzəldən,barışa
şəkk edərsən bu işə riallıq imiş sekular ?
sekular ay sekular sənə divan tutular
hamı oğlan istəyir ! qadınlar oğlan doğacaq
qız doğulsa o gecə , acıq edib boğulacaq
qadın olmayan yerdə kişi hara soxulacaq
bu muəmmanı bilən yox ! sonrası nə olacaq
söyləsən irgənəcəklər dinmə amandı sekular
sekular ay sekular sənə divan tutular
prezident olub şahlıq edir qırx ildi
faciyə oldu bu iş əmcik əmənlər bildi
mafiya gəldi bütün haqqları dibdən sildi
o ölən rüşvə , karublık , bir daha dirildi
sırıya düzmə amandı habelə ey sekular
sekular ay sekular sənə divan tutular
varsa millətdə ağıl hər şeyi asan edəcək
azdıran yolu buraxsa bir başa düz gedəcək
ya nəcat ilə reformu ya ki zillət seçəcək
ya ki tarix boyu o kəllə-mayallaq gedəcək
çox bağırsan boğazın yırtılacaq ay sekular
sekular ay sekular sənə divan tutular
dərdimiz eyndir avarə gəzən ey sekular
hamını eyni problemdi əzən ey sekular
önümüz dağ dərədir arxa düzən ey sekular
gəl Eşilbax təki ol , dodaq büzən ey sekular
yoxsa məyus olacaqsan bilirsən ey sekular
sekular ay sekular sənə divan tutular
Eşilbax 18.05.2018
یارئ دَیَنَک – یارئ هَنَک
اصول دینی هر شئی دن اُستون گوُره جکسن
حتی یاماغئ دینله سوُکوُب سن هوُره جکسن
کیفیتی یوخ مجبور اولوب دین سئوٌیه جکسن
شیرین جانئنی بو اِیشه قُربان وئره جکسن
یوخسا اولاجاق دنیا سنه دار سئکولار
سئکولار آی سئکولار سنه دیوان توتولار
داز اِد باشئنی قَمه بوچاق یوکلویه جکسن
شوره گَلَرَک قان دامارا کوک لویه جکسن
زنجیرله چالئب یومروق ایله سن دُیه جکسن
ضیالئلاری تحقیر اِدیب سن سوٌیه جکسن
یوخسا اولاجاق دنیا سنه دار سئکولار
سئکولار آی سئکولار سنه دیوان توتولار
دوخونما دینه قتلینه فرمان گله جک
القاعده یوخ بیر دسته طالئبان گله جک
شَعوبی دوُشوُن آغلئنا ایران گله جک
قاپئ باجادان هر لحظ هر آن گله جک
تانرئی قوروسون واه واه آماندئ سئکولار
سئکولار آی سئکولار سنه دیوان توتولار
دِمه بی طرفم هئچ دینه بئل باغلامارام
نوحه اوخومام سینه چالئب آغلامارام
اصحابدن اوتره سینلر داغلامارام
آشورا گوُنو شَلمه باشا باغلامارام
بونلارئ دئمه جُرم گُناهدئر سئکولار
سئکولار آی سئکولار سنه دیوان توتولار
حاقّ ماللادادئ هر ایزنی دیندن آلمئش
بیر سنّت ایمیش توز باسئب پاسلانمئش
رفُرما گلمیه جک اوزون سوٌره ساللانمئش
گَلیری وار بو آتئن قئزئل گوُموش ناللانمئش
دوخونماق اولماز اونا بیلمَلیسن ای سئکولار
سئکولار آی سئکولار سنه دیوان توتولار
بیلیرم یوخدو بیزیم کولتورو سن اینجه له سن
اعتراف اِشتمه سن بلکه بیر آز دینجه له سن
او قَدَر من من اِشیت کی دوغرُدان گیجه له سن
ایزن یوخ اویرَنَسن چوخ بیله سن دیرچه له سن
بورنونو سوخما دییللر هر ایشه ای سئکولار
سئکولار آی سئکولار سنه دیوان توتولار
عادی آدام یوخوموزدو بیری اُنلا قونوشا
انصافلئ تاپا بیلمزسن اولودُغوجان اُو دانئشا
او قَدَر فیلسوف وار کی آز قالا آغلئن قارئشا
هَر کَسین اوز پئلانی دنیا دوزلدن بارئشا
شکّ ِادرسن بو ایش رئالئغ ایمش سئکولار
سئکولار آی سئکولار سنه دیوان توتولار
هامئ اوغلان ایستیر قادئنلار اوغلان دوغاجاق
قئز دوغولسا او گئجه آجئق اِدیب بوغولاجاق
قادئن اومایان یئرده کیشی هارا سوخولاجاق
بو معّمانی بیلن یوخ سونراسئ نه اولاجاق
سویله سن ایرلَنَجکلر دینمه آماندئ سئکولار
سئکولار آی سئکولار سنه دیوان توتولار
پرزدنت اولوب شاهلئق اِدیر قئرخ ایلدی
فاجعه اولدو بو ایش اَمجیک اَمنلر بیلدی
مافیا گلدی بوتون حاقّلاری دیبدن سیلدی
او اُولن رشوه کارروبلوق بیر داها دیریلدی
سئرئیا دوزمه آماندئ هابیله ای سئکولار
سئکولار آی سئکولار سنه دیوان توتولار
وارسا مللتده آغئل هر شئی آسان اِدَجک
آزدئران یولو بوراخسا بیر باشا دوز گئدَجک
یا نجات ایله رفرمو یا کی ذلّت سئچَجک
یا کی تاریخ بویو کله مَیاللاق گئدَ جک
چوخ باغئرما بوغازئن یئرئلاجاق ای سئکولار
سئکولار آی سئکولار سنه دیوان توتولار
دردیمیز عیندیر آواره گَزن ای سئکولار
هامئنی عین پرابلمدیر اَزَن ای سئکولار
اُنوموز داغ درَ دیر آرخا دوُزن ای سئکولار
گَل اشیلباخ تکی اٌوُل دوداق بوٌزن ای سئکولار
یوخسا ماَیوس اولاجاقسان بیلیرم ای سئکولار
سئکولار آی سئکولار سنه دیوان توتولار
اشیلباخ 18.05.2018
