چاپ

 

ایران رئژیمی هر زامان میللی حرکته قارشی، حرکتین ایچینده اولان اولایلاری/سؤیلم‌لری اؤز نفعینه چئویریب قوللانماق ایسته‌ییبدیر. دوغالدیر دا ذاتن! دوشماندان بوندان آرتیغی‌نی گؤزله‌مک اولماز.

تراختور اویونلارینداکی آتموسفئری دئییشدیریب ساده‌جه فوتبول سویه‌سینه ائندیرمک، اورموگولو قورودولماق پروژه‌سینی طبیعتین بیر ساده اولاییینا ائندیرمک، آنادیلینده مدرسه ایسته‌یینی فراکسیون تورک زبانان مجلسه ائندیرمک و... مینلرجه باشقا اؤرنک.

هر بیرینده رئژیم آرامیزدا اولان سؤیله‌می آلیب، چئینه‌ییب آتیب اورتایا بیزی اؤزوموزله مشغول ائدیب.

آما ان باشدا گئدن بو چابالارین بیری، دین/مذهب بحثیدی.

کیمدیر بیلمه‌سین ایران رئژیمی نه اوچون عاشورا فستیوالی‌نی گونئی آزربایجان شهرلرینده بو قدر مؤحتشم قئید ائدیر میللتی “حسین حسین گویان” اولماغا آلیشدیریر. گونئی توپلومونو ایران مرکزلی دوشونجه‌یه باغلایان ان اؤنملی باغ، مذهبدی، شیعه‌چیلیکدی. رژیمده بوندان فایدالانیر. نئجه کی قاراباغ ساواشیندا دا بونو تمامیله آپ آچیق گؤروروک. قاراباغ خاک اسلام است شوعاری دیللردن دوشمور! و بعضی یولداشلاردا بو توزاغا دوشوب هیهات من الظله چکیب صلیبی ساواشین قارشیسیندا جهادا چاغیریرلار!

عزیز یولداشلار، بؤش وئرین بورکینافاسونو، آزربایجانین قولاغینین دیبی، گورجوستانا باخاق. گورجوستان اهالیسی‌نین چوخو، مسیحی. آما بو ساواشدا گورجوستان کیمه آرخا دوروب؟ آزربایجانا.

مجاریستانین اهالیسی‌نین چوخوسو، مسیحی. آما کیمه آرخا دوروب؟ آزربایجانا.

اوکراینانین اهالیسی‌نین چوخو مسیحی، آما کیمه آرخا دوروب؟ آزربایجانا. و...

آیدیندیر کی، تورکلوک (ملت/ائتنیک) فاکتورو دین فاکتوروندان قات قات اؤنده گئدیر.

ارمنی طرفی و اونو قودوردان اؤلکه‌لر، توپلوملارینین داها چوخونو سفربر ائتمک اوچون البته‌کی دین قونوسونا بارماق قویوب گوندمه گتیره‌جکلر. ارمنی لابی‌سی البته‌کی موسلمان-مسیحی ساواشینی یاراتماق‌ ایسته‌یه‌جکدیر، بوندا شوبهه یوخ.

آما اساس ایکی مساله وار:

-قاراباغین آزادلیغی “بیزیم اوچون” وطنین آزادلیغی ساواشیدیر، تورکون آزادلیغی ساواشیدیر. اورا تورکون توپراغیدیر، فرق ائتمز مسلمان یهودی مسیحی و یاخود دین سیز.

-آزربایجاندا یاشایانلارین هامیسی مسیحی اولسایدیلاردا، یئنه قاراباغی ایشغال ائده‌جکدیر ارمنستان. اونلار قاراباغی بیر موسلمان اؤلکه‌نین توپراغی یوخ، بیر “تورک” اؤلکه‌نین توپراغی گؤرورلر.

اویونا گلمه‌یک، انشالله.

امیر مردانی- آذوح سؤزچوسو