چاپ

 

دیلیمیز یاساق اولدوغو اوچون تکجه رسمی و اداری آلانلاردا دئییل ، دانیشیق دیلیمیزده ده فارسجانین هئگمونیاسینی گؤ رمک اولار.

کوتله دیلینده سایسیزجا یئر آلان فارسجا سؤزجوکلری قیراغا قویدوقدا بیر سیرا تورکجه سؤزلر اؤز یئرلری و اؤز آنلاملاری دئییل فارسجادا اولان سؤزلره قارشیلیقلی اولاراق قوللانیلیرلار.

اؤرنه یین ساخلا سؤزجویو قورویوب گیزله مک آنلامیندا اولارکن دیلیمیزده تئز_تئز آرابانی دایاندیرماق ، دوردورماق یئرینده یانی فارسجادا اولان نگهدار سوزجویونون قارشیلیقلیغیندا ایشله نیر.

بونلاردان بیریسیده دوشمک سؤزجوگودور.

دوشمک بیردن_بیره اوست دوزئیدن آشاغی دوزئیده یئر آلماق آنلامیندادیر ، فارسجادا افتادن دئییلیر.

ائنمک ایسه تدریجا اوستدن آشاغییا یئر آلماق آنلامیندادیر.

آنجاق بو گونلر آرابادان ائنه جم یئرینه دوشه جم سؤزونو داها آرتیق ائشیتمکده ییک.

اسکی تورکلر یوکسکلیگی سئویب اوجالیقلاری قوتسال بیلرمیشلر.

اونا گؤره ده اوجا تانری سؤزونو تئز_تئز ایشله درمیشلر.

اونلارجا اوجالیقدا اولگن تانری ، ایشیقلیق ، تمیزلیک و خیر یئر آلیرلار.

یول سؤزجوگوده قوتسال سؤزجوک اولموشدور.

اونلار یولو یوکسکلیگه اوجالیغا و ایشیقلیغا دوغرو گئدن بیر مسیر کیمی قاوراییرمیشلار ائله او اوزدن ده اسکی زامانلاردا یولا چیخماق سؤزونو ایشله دیرمیشلر.

یانی مقصد یوکسک یئرده اولدوغوندان اونا چیخمالیمیشلار.

ایندیده چوخ یئرلرده یولا چیخماق یئرینه یولا دوشمک سؤزو فارسجانین راه افتادن سؤزو قارشیسیندا قوللانیلماقدادیر ، حال بوکی اونون اسکی آنلامینین تام ترسینه یانی آشاغی دوزئییه ساری گئتمک آنلامینی داشیماقدا اولور.