من اؤلندن سونرا هرکس منه بیر سؤز دئیه جک
کیمی "عارف"، کیمی "مولا"، کیمی "سویسوز" دئیه جک
هرکسین دویغوسو اؤز حالینه اویغون چیخاجاق
بیری غمگین بیر شاد ایسه، بیری "دؤز" دئیه جک
قویولاییب توپراغا بایراق تیکه جکلر گؤتومه
بیری "بایراق نه دیر، اوراقلا چکیج دوز" دئیه جک
بیری دوشمان، بیری دوست ال به یاخا چیغیرشاجاق
بیری رحمت اوخویارکن او بیری "ویز" دئیه جک
بیری اسلام آدینا دفن ائدجک هئیکلیمی
صدر اسلاما دؤنوب بایراما نوروز دئیه جک
منه هئچ بیر سوروشان اولمایاجاق آی اؤلو بیگ
سن ده بیر قالخ نفس آل، بونلارا توت اوز دئیه جک
اؤلو قاخسا آیاغا، " آی گئده لر سیکتیر اولون
من مسلمان دگیلم، اول نامازی پوز" دئیه جک
"مجلیس ختم دیر، یوخسا بو ساواش میدانیدیر؟
آچ گؤزون گؤر بو جهانی، گؤزلیم، قیز" دئیه جک
اؤلجک گوشه میخانه ده یالنیز درویش
سالماییم دوست ایله دوشمان گؤزونه گؤز دئیه جک
کؤلن، یونی 2020
