آپاریجی: علیرضا قولونجو
میللی فعال امیر مردانی حساب ائدیر کی، “گونئی آذربایجان میللی حرکاتینا” منسوب قووه‌لر آراسیندا ایش بیرلیگی سویه‌سینی آرتیرماق مؤوجود ایختیلاف‌لارین اوستونو اؤرتمکله دئییل، عکسینه ایختیلاف‌لاری دانیشماقلا مومکون اولار.
امیر مردانی آمئریکانین سسینه موصاحیبه‌ده همچی‌نین “گونئی آذربایجان سیاسی قورولوش‌لاری‌نین امکداش‌لیق پلاتفورماسی”نین فعالیت‌لری حاققیندا دانیشیب.
پلاتفورما امیر مردانی‌نین نماینده‌سی اولدوغو “آذربایجان اؤیرنجی حرکاتی - آذوح”، “آذربایجان میللی دیرنیش تشکیلاتی” و “گونئی آذربایجان دئموکرات پارتیاسی”نین ایشتیراکی ایله تشکیل اولونوب.
“پلاتفورما کئچن ایلین آپرئل آییندا باکیدا بیر سئمینار کئچیره‌رک رسمن ایشه باشلادی و ایندییه قدر فعالیتینی داوام ائتدیره بیلیب،” تورک فعال بیلدیریر.
میللی حرکاتا منسوب قووه‌لر آراسیندا بیرلیک و امکداش‌لیق مؤوضوسونا دقت چکن مردانی‌نین دئدیک‌لرینه گؤره، “فردلر و یا تشکیلات‌لار آراسیندا ایش بیرلیگی مئخانیزم‌لری و یا ساده دئسک، بیرلیک مسئله‌سینی چؤزمک اوچون زامان زامان جهدلر اولوب. اما هئچ بیری نتیجه وئرمه‌ییب. نهایت، تشکیلات‌لار دوشونورلر کی، بلکه بیز یئنی فورمات‌لار و یئنی مئخانیزم‌لره باخمالیییق. پلاتفورمانین فیکری ده اورا‌دان چیخدی.”
میللی فعالین فیکرینجه، سیاسی تشکیلات‌لار آراسیندا بیرلیک و امکداش‌لیق پلاتفورما‌لاری‌نین قورولماسی تدریجن و طرف‌لر آراسیندا ائعتیمادین آرتماسی ایله مومکون‌دور:
“میللی حرکاتدا بیرلیک مسئله‌سینه بئله باخیلیب کی، بیرلیگی بیز فیزیکی اولا‌راق شخص‌لرین و قروپ‌لارین بیر آرایا توپلاشماسی ایله یارادا بیلریک. بونا گؤره ده، بوتون چابا‌لار بونا صرف ائدیلیب کی، اینسان‌لار و یا تشکیلات‌لاری راضی سالاق، بیر یئره توپلایاق و اونا بیر آد قویاق. جهبه یا قورولوش، آدی هر نه اولورسا اولسون. اوندان سونرا باشلایاق بو فرق‌لی بعضن ده، تضادلی فیکیرلرده اولان بو قروپ‌لاری بیر آد آلتیندا زورلا ایش بیرلیگینه سؤوق ائدک. بو بیرلیک‌لر هر زامان صونعی شکیلده و اوست‌دن آشاغی یاراندیغی اوچون نتیجه‌یه چاتماییب‌لار.”
اونون سؤزلرینه گؤره، “آذوح، دیرنیش و گادپ کئچمیش تجروبه‌لردن درس آلا‌راق بو قناعته گلدی‌لر کی، آرادا اولان ایختیلاف‌لاری دا نظره آلا‌راق، یعنی او ایختیلاف‌لاری یوخ سایما‌دان، ایشلر و مؤوضولار موعیینلشدیریب و او مؤوضولار اوزرینده یاواش یاواش ایش بیرلیگینه باشلاسین‌لار. و بو داوام ائتدیکجه، آرا‌لاریندا صمیمیت چوخالدیق‌دان سونرا، تشکیلات‌لار آراسیندا گوون پروبلئمی حل اولوندوق‌دان سونرا یاواش یاواش ایره‌لیله‌سین.”
مردانی مؤوجود ایختیلاف‌لارین اوستونو اؤرتمک یئرینه، اونلاری آچیق شکیلده موذاکیره ائتمه یین، هابئله تنقید و اؤزونوتنقیدین داها یارارلی اولاجاغینی وورغولاییر.
“چوخ زامان‌لار آچیق صحبت ائدنده، میللی حرکاتدا دئییلیر کی، آمان‌دیر، بئله آچیق دانیشمایاق. تحقیر و حقارت حساب ائدی‌لر. لاکین بو تابو داغیلما‌لی‌دیر. تنقید و اؤزونوتنقید اولماسا بیز هئچ زامان ساغالماغا گئتمه یه جه ییک. تحقیر و حقارت او زامان اولار کی، بیر اینسانین شخصی حیاتی گوندمه گتیریلیب و موذاکیره اولونسون. بلی بو تحقیر ساییلا بیلر. اما، بیر اینسانین سیاسی دوشونجه‌سینی من تنقید ائدیرمسه و یا اونون یانلیش‌لارینی دئییرمسه، بو تحقیر ساییلماز. آیریجا بون‌لارین گیزلدیلمه‌سی دئمک اولار کی میللی حرکاتا خیانت‌دیر،” امیر مردانی علاوه ائدیر.
https://www.amerikaninsesi.org/a/emir-merdani/5552436.html
