1374جی گونش ایلی، اردیبهشت آیی، 19-جو گون. یازدی تاریخی آزربایجانین ایگید اؤیرنجیلری. "سن بیر تورکله ائولهنیرمیسین؟" سورغوسو، ان دوغرو شکیلده یانیتلاندی! ایللر بویو تحقیرلره معروض قالمیش بیر میللتین اولادلاری مئیدانا چیخیر "هارای هاری من تورکم" سلوقانلاریلا تیترهدیر ایران شوونیست رئژیمین پایالارینی.

او تاریخی گوندن 23 ایل کئچسهده، داوام ائدیر ساواش، داوام ائدیر میللتچیلیک. هر زامان تاریخ یازیر، حماسهلر یارادیر، میللتین طالئعی اوغروندا جان وئرمهگه حاضیر اولان آزربایجان اؤیرنجی حرکاتی ایران رئژیمین بوتون باسغیلارینا رغمن بیر آدیم گئری آتمادان ساواشدان واز کئچمهدن دایانیب، دایانیر، دایاناجاق، حالا آیاقدا، دیمدیک آیاقدا.

زامان گلیر امنیتی ندنلردن دولایی داها گیزلی شکیلده چالیشیر، گرکیرسه ده هرنهیی گؤزه آلیر آچیقجا آکسییالارا باشلاییر، توتساق وئریر ایشکنجهلر آلیر، ستادیوملاردا "گونئی آزربایجان ایران دئییل" پلاکارینی دالغالاندیریر. بودور وطن سئوداسی، بودور میللی حرکتین جان پارچاسی، اؤیرنجی حرکاتی.

100 ایل کیملیگی دانیلان، ثروتی طالانان، توپراغی پارچالانان میللتین "حاققیمی آلاجاغام" سسینی کیمسه باسدیرابیلمهز. آزربایجان تورک میللتین ایرادهسینی تمثیل ائدهن گونئی آزربایجان میللی حرکتی گوجونو دفعهلرجه سرگیلهییر، چیچکلهنیر سایاگلمز مینلرجه قهرمانلار یئتیشدیرمیشدیر. کیمی تانینمیش آغ ساققال، کیمی آدی بللی اولمایان گیزلیجه چالیشان. آنجاق، هامی بیر اورهک، بیر جان، ییغیشیبدیر آنا وطنی قوروماق اوچون آزربایجان. میللتین آزادلیغی اوچون بوتون چتینلیکلهری جانا آلیر، یولون سونونا قدر واردیرلار. بو توپراقدا زامان گلیر یالنیز بیر "میللی فعال" بئله دیری قالیبدیرسا، اومود واردیر دئمکدیر، میللتچیلیک بایراغی یئنیلمه میشدیر.

آندیمیزدیر: ساواش، آلنیمیزا یازیلیب.

آزربایجان اؤیرنجی گونو، قوتلو اولسون.

آزربایجان اؤیرنجی حرکاتی- آذوح

19 اردیبهشت 1397