هردن اوزوم اوزومدن سوروشورام نه دیر وطن سئوگیسی؟

دوغروسو بیر سوز دییه بیلمیرم.

اما اوزومو تانیدیغیمدان بری،

ایچیمده وطن دییه بیر سئوگی ایله، ال اله، قول قولا یاشامیشام بو عومور سوره جین.

بعضن، یاشامین چتینلیکلری سارسیتماق ایستمیش روحومو، وطن دوشمانلارینین اذیت آزارلاری سیندیرماق ایستمیش اراده می، زیندانلاردا، دار دودوک سویوق بتون سلول لار ایچینده ازیب چوروتمک ایستمیشلر گوودمی..

اما هر زامان هر آن، ایچیمده وطن سئوگیسی، آرخا دوروب، روحومادا، جانیمادا، گووده مده.

سینمادیم، سارسیمادیم، ازیلدیم اما چورومدیم وطن سئوگیسی یاردیمیلا. وطن سئوگیسی بئله بیر شئیدیر.‌

اما وطن سئوگیسی

یالنیز چتینلیکلرده یوخ، سورغولاما سلول لاریندا ایشکنجه لرده یوخ، بلکه هر آن، هر ساعت اینسانین ایچینده بیر بولاق کیمی جوشوب داشماقدا دیر وطن سئوگیسی. خوش ساعاتلاریندا، عائله نین کناریندا اولدوغوندا، سئودیکلرینله بیرلیکده یاشامین دادینی چیخاردان لحظه لرده ده حتی، سنله بیرلیکده وطن سئوگیسی.

وطن سئوگیسی ائله بیر شئیدیر کی، سنی هئچ زامان تک قویماز، حتی اوندا کی دوست اولان وطن سئورلر طرفیندن دویولورسن، اویولورسن، و یا قیسقانجیلانیرسان.‌ حتی بو آنلاردادا، وطن سئورلیک، دوم دولو، دوزوم و صبیر داغارجیغینا دوندورور سنی.‌

وطن سئوگیسی ائله بیر شئیدیرکی، پیسلیکلری سیلیر اینسانین ایچیندن، کینه لری سیلیب آتیر اوره گیندن، نه سنی چوخ سئویب اینانان دوسلاردان اینجیرسن، نه سنی رقیب گورن همسنگرلرین، تکه ریوه آغاج سوخماقلاریندان، حاقینی ناحق، ائتمکلریندن، آرخانجا یالان پیسلیکلر یایماقلاریندان کوسوب گئدیرسن. وطن سئوگیسی گوجدور، تانرینین اتحاف ائتدیگی بویوک نعمت دی آدم اولادینا.

تانری ان چوخ سئودیکلرینه بخش ائدیر وطن سئوگیسین.

بوتون بونلار اوچون تانری سئورلیکدی وطن سئوگیسی، اینسان سئورلیکدی وطن سئوگیسی، چئوره سئورلیکدی وطن سئوگیسی، باریش سئورلیکدی وطن سئوگی. عائله سئورلیکدی وطن سئوگیسی.

پولاد دان برک، ایپکدن اینجه دیر وطن سئوگیسی.

دوشمان قارشیسیندا، سنی یئنیلمز، دوسلار اوره گینده سنی سیلینمز ائدیر وطن سئوگیسی.

تانریم سنه مین شوکور ...منه بخش ائتدگین وطن سئوگیسینه