آنا دیل گونو مناسبتیله، اون بئش ایل اونجه، یونسکو طرفیندن، رسمی بیر قرار آلینیب.‌ بیرلشمیش میللتلرین چوخونلوغو، او جمله دن ایران حاکمیتی، یونسکونون آلدیغی قرارا قول چکیب. نه یازیق کی بو اوزون مدتده شاهید اولدوق کی ایران دولتدارلیغی طرفیندن، بو قرار بین الملل سویه ده، یالنیز بیر مدنی پرستیژ کیمی آلینیب و عملده غیر فارس میللتلرین آنا دیل حاقیندا عایید هئچ بیر مثبت ایش گورولمویوب.‌

یوز ایل اولار ایراندا، فارس دیلی رسمی اعلام و بوتون غیر فارس میللت لرین آنا دیللری عملا اعداما محکوم اولوب. اللی ایلدن آرتیق جنایتکار پهلوی رژیمی غیر فارس دیل لری بوغوب باتیرماغا چالیشدی، پهلوی لر غیر فارس دیللری یوخ ائتمک قصدیله هر توور پیسلیک لره ال آتدیلار،‌ پهلوی لر زوراکیلیقلا فارس دیلین، بوتون غیر فارس اوشاقلارین بوغازینا تیخدیلار. یازیقلار اولسون، قیریخ ایل اسلام حکومتی دوورونده ده پهلوی لرین همان چیرکین سیاستی دوام ائتدی و همین الان دا دوام ائتمکده دی. بو مدت ده کیمسه غیر فارس میللتلرین، او جمله دن تورکلرین دادینا چاتمادی، حتی اعتراضچیلارین دا یئری زیندان، ایشلری عومور چوروتمک یازیلدی اسلام حاکیملری طرفیندن.

بیز تورکلر، اوزه ل اولاراق آذربایجانیلار، انقلاب دان بو تایا، قیریخ ایلدی ایسلام حاکمیتینه دیل توکوروک، "بیزیم آنا دیل حاقلاریمیزی یئرینه یئتیر و فارس دیلین، بیزیم اوشاقلاریمیزین بوغازینا تیخماقدان واز کئچ". اما بو مدت ده بیزیم حاق سسیمیزی نه دویان اولدو، و نه دویماق ایستیین اولدو بو سیستیمده. گویا اگر بیز تورکلر آنا دیلمیزده ائیتیم آلارساق ایسلام قایدلاری پوزولار بو مملکت ده. فارس بایراغی آلتیندا، ائرمنی اوز دیلینده درس آلیر کیمسه نین قیلی ترپنمیر. اما اگر تورک اینسانی تورکجه درس اوخورسا، دونیا داغیلاجاق سانکی.‌

اما داها بو مملکت ده ایش بو سایاق سوز صحبتدن کئچیب سانیرام. نه یازیق کی بو مملکت ده کیمسه فارس اولمایان میللترین، دوغال حاقلارین باشا دوشمه دی. بلکه ده باشا دوشدو اما وئجه آلمادی.‌ فرق ائتمز عمل و عینیتده بودور کی گورونور. فارس حکومتدارلیغی غیر فارس میللت لرین حاقلارین اوده مکدن عاجیزدی.‌ البته دونیانین بوگونکو دوروموندا بئله بیر عاجیزلیک دیزه چوکوردن بیر عاجیزلیکدی.