(این نوشته از صفحه ی فیس بوک ایشان گرفته شده است)

زوروملو عسگرلییی ساتین آلماق اوچون تقریبا ۱۰ آی تبریزین نیظام وظیفه ایداره سینه آیاق دؤیدوکدن سونرا نهایتا معافیت کارتیم آدرسه گلدی (۹۷/۸/۲۷ ده جرمه مبلغینین یوزده اوتوزو/۳۰٪-و: ۶۶۰۰۰۰۰ تومن و ۹۷/۹/۲۹ دا ۴ دانا ۳۸۵۰۰۰۰ تومن قیسطی بیر یئرده: ۱۵۴۰۰۰۰۰ تومن، توپلام ۲۲۰۰۰۰۰۰ تومن ایقتصاد و دارایی ویزارتی نین حسابینا پول توکدوکدن سونرا).

بیر حالداکی کئچن ایل نیظام وظیفه ایداره سینین رئیسی سرهنگ «فلاح نژاد»ا موراجعت ائتدیییمده دئمیشدی: «غیبتیز ۷ ایلدیر، گلن ایل بو قانون قالسا سیزه شامیل اولاجاقدیر». آما بو ایل ده غیبتیم ۹ ایل حساب اولدو و بیر ایله ۱۰٪ آرتیق جرمه یازیلدی! رئیسه اعتراض ائدیب، «بیز ۸ ایل غیبتی نه زمان توتابیلردیک!؟» سوروشاندا جالیب بیر جاواب وئردی: «کئچن ایل غیبتیز ۷ ایل ایدی و قانون توتمازدی، بو ایل ده گرک ۸ ایلدن آرتیق اولایدی کی قانون توتایدی»!! دئدیم: «یانی بویورورسوز او یانا دؤنسک یا بو یانا دؤنسک، دؤولت ۲۰۰۰۰۰۰ تومن آرتیق پول آلاجاقدیر!؟ ائله بیل سیز ده دولارلا ایشله ییرسیز، اونا گؤره قیمتی قالخیزیبسیز!!»

سونرا نظام وظیفه نین بو ایشینه هانکی قورومدان شیکایت ائده بیلرم سوروما، «هئچ یئردن، پولو کامیل تؤکمه لیسیز» جواب وئردی. عسگرلییی ساتین آلماق ایشلَمینین بوقدر اوزون سورمه سینین ندنی ایسه نیظام وظیفه و بیلیمیوردونون (اونیورسیته نین) سهولری اوزوندن اولموشدور؛ بئله کی، نیظام وظیفه فوق دیپلومومو سیستمه کئچمه میشدی! بیلیمیوردو ایسه معافیت تحصیلیمین سوره سینین چوخدان بیتدییینه باخمایاراق ترک تحصیلیمی بو ایله قدر نیظام وظیفه یه بیلیندیرمه میشدی! اونون اوچون نیظام وظیفه نین سیستمی منی لیسانس اوخوماقدایکن گؤستریردی (البته معافیت تحصیلیمین سوره سی بیتدیکدن سونرا نظام وظیفه بیلیمیوردوندان تحصیل دورومومو ایسته مه لی ایدی).

نیظام وظیفه ایداره سینین رئیسی سیستمین دوزه لمه سی اوچون تهرانا مکتوب گؤندرمه لی اولدوغونو دئییب؛ مدرکلریمی ساخلادی. بو دوزلمه ایشلمی نقدر سوره جک سوروشدوغومدا دئییردی: «بیلینمز، دوزلدیکده ایسته ییز قبول اولوناجاقدیر». رئیسه دئدیم: «بلکه ایلین سونونا دک دوزلمه دی، بیز نئیله مه لیییک؟؟» یئنه جالیب جوابلاریندان بیرینی وئردی: «سیستم بو ایل دوزلسه، ایسته ییز آلیناجاقدیر، یوخسا گلن ایل بو قانون اولمایاجاقدیر»!! نَیسه کی نهایتده نئچه آی ایداره یه گئت گلدن سونرا سیستم دوزلدی و ساتین آلماق ایسته ییمی آلدیلار.

تبریز نیظام وظیفه سی ۱۳۸۹ دا داها بؤیوک بیر یانلیشلیق یاپاراق، لیسانس مقطعینه معافیت تحصیلی وئرمه ییب، یوکسک (فوق) دیپلوم مقطعیندن قالان معافیت تحصیلینین دوامیندا لیسانس اوخوماغیما ایزین وئرمیشدی. مسوللارین دئییشینه گؤره لیسانسی بیتیرسه یدیم ده منه مدرک وئریلمه یه جکمیش!! حؤکم آلتیندا اولدوغوم زامان توتولماماق اوچون (عائیله دورومو ایزین وئرمیردی) لیسانسیمی یاریدا قویماق زوروندا قالمیشدیم. ایندی ایسه اوخویوب، بیتیرمه ییم؛ نیظام وظیفه مسوللارینین یاپدیغی ایداری یانلیشلیق اوزوندن ایمکانسیز اولوبدور.

سوندا بونو آرتیریم کی منی کفالت شرایطی توتوردو و ۲۲۰۰۰۰۰۰ تومن دؤولتین جیبینه پول تؤکمک گرکمیردی. آنجاق هر نه اولدو، هئچ اوممادیغیم یئردن اولدو و کفالت آلانمادیم. بعضا آدامین یاخینی، اؤزگه ایله فرقی اولمور. آللاه اینصاف وئرسین، اللریندن گلنی اسیرگه دیلر و بوشونا ۲۲۰۰۰۰۰۰ تومن خرجله مه ییمه راضی اولدولار.

نظام وظیفه نین رسمی سایتیندان:

پايه ريالي جريمه مشمولين غايب

فوق ديپلم ۲۰۰.۰۰۰.۰۰۰ ریال

نکات قابل توجه :

۱- به ازاي هر سال غيبت مازاد بر هشت سال، ده‌درصد (10%) به مبالغ جريمه پايه اضافه می گردد.

۲- مدت غيبت بيش از شش‌ماه، يكسال محسوب مي‌شود.

[عکسلرده «تاریخ شروع به غیبت» ۱۳۸۹/۴/۳۰ دان «تاریخ صدور»ا دک (۱۳۹۷/۸/۳۰) و یا حتی ۹۷/۹/۲۹ دا کلا تسویه حساب تاریخینی نظرده آلساق، حتی ۶ آی دا گئجیکمه اولماییبدیر.]