او آرا_سیرا ایشی چتین لدیردی
دوزون ایستییه سیز یاواش_ یاواش ائولنمکدن واز گئچمه یی دوشونورم!
_نییه؟
_آخی کیم منی قبول ائلییه ر؟ عؤمرومون چوخونو ایچه ریده اولموشام، بوندان بویانا دا بللی دییل نئجه اولاجاق؟ هرگون چاغیریرلار، کیم قبول ائلر امانی نن ائولنسین؟
اؤزومو سیندیرمادیم:
_سیز هر کس نظریزده وار دیین من گئدیم دانیشیم، یا هن دییر، یا دا یوخ دا!..
_ایستیرم بیر ائو قیزی ایله ائولنم، نئجه اولسا او ائوده اولار منده چالیشمالاریما باخارام.
بو آدام هر ایش گؤروب، بونو دا گؤرر، قولاقلاریم ائله قیزیشمیشدی، هئچ نه یی دویموردوم. آنجاق یئنه ده اؤزومو سیندیرمادیم:
_بو دا بیر فکر دی، فامئل لریزده بئله بیر قیز وار؟ باجیزدان زاددان بیر نفره تاپشیرین دا… چوخ دا چتین دییل، سیز بؤیودوسوز، سیزی تانییانلار بیلیرلر دا سیز مهندس امانی سیز، یا دییر هن یا دییر یوخ!
اصلا آغزیمین دادین بیله بیلمیردی، من اوننان دا زیرنگ ایدیم. جانا گلمیشدی، او هر ایسته دییی ایشی یئرینه یئتیرردی، ایندی قورخوردو بیر 47 کیلولوق، اؤزو دئمیشکن جیققیلی میققلی قیزدان یوخ ائشیده…
اونو اینجیتمک ایسته میردیم، عؤمرونون چوخونو اینجیمیشدی.
_بیر گون دئدیز ایچگی ایچمییب سیز، ایچمک ده ایسته میرسیز؟ یادیزدا؟
_ هن یادیمدا!
او سؤزدن بیر جیزما_ قارام وار، اوخویوم؟
_جالب دی، سیز دانیشیقلاریمیزی بو قدر دوشونورسوز؟
بو آدام اوز وئرمه لی ده ییل کی! کاش قویئیدیم چاش_ باش قالئیدی، سونونا کیمی سؤزون دئمه یی سالیب، چیخئدی.
_اوخویون، ائشیداخ.
_پئشمان اولدوم، قالسین آیری وقته.
_ نییه؟ اوخویون. بلکه منده یازدیقلاریمنان اوخودوم.
_بلکه نی اکسن چوغوندور چیخار، سیز اوخویان دییل سیز، منن سؤز چکمیین.
_کیم دییر بلکه نی اکسن چوغوندور چیخار؟ یافته های جدید علم کشاورزی بونو رد ائلییر، اوخو!
اکینچیلیک اوخوموشدو، ظرافاتی منی گولدوردو. ایسته میردیم سسیمین تیتره مه سینی بیلسین، بلکه بو شعر اونون قیپچینیب آغزینا گتیره بیلمه دیی سؤزه اعتراف اولایدی منیم دیلمنن.
دئدین:ایلک بارداغی ایچه جکسن
توفنگ ساغلیغینا
و آزادلیق یولوندا دوام ائدن
جنگ ساغلیغینا
و کئفله نه جکسن قورتولوشون قان جوشدوران، بوغازلاری قووشدوران شرابینا!
سن ایچگی ایچمه دین،
سیگارا دادمادین
اویوشدوروجویا آلیشمادین
اما من ایچدیم
ایلک بارداغی وطن ساغلیغینا و وطن اوغروندا جانین اووجونا آلان
اوغول ساغلیغینا
داها فرق ائتمز
ایسترسن سون بارداغی یئتدی گؤزل ایله دولدوروب، قالدیرارام آیریلیق ساغلیغینا…
