یازیق اولوس دردی بیرداغا دونوب
اومودو تک سوزن قلمه چونوب
تانری بیر قوتسال آند قلمی بیلیب
قلمدیر آللاهین دانیشان دیلی
قلم کوهلندیرر لاپ سولان گولو
هئچ دیل دردی قلم تک ائتمز بیان
قلمدیر آنادان حتی مئهریبان
قلمدیر اَن بؤیوک سیلاح هرزامان
قلمدیر یوخ یئردن وارلیق یارادان
قلمدیر بیر اویاق قروول هرآن
قلمین گؤجویله بؤلونور دووران
قلمنن چوخ شئیلر اومور بو اینسان
بیلمیرلر چوخ قلم توتوبدور آزار
داها درد دئمگه آچمیرلار گوزار
قلم قورخوسوندان گیزلنیب تئزه ر
چرچیلر تاپمایان یئرلره سوزه ر
لال کی تانینماسین ائلده اوبادا
باشینی قاتماغا اوینار یووادا
ایستر آدین قوشا درد بیلن آدا
یازدیغینی گیزلر نئچه لای آلتدا
تاپماغا معناسین لایلاری قاتدا
تاپمایان فیکیره هی دئییر چاتدا
گیجلدیر هی دئییر بویانا آتدا
یامان بو سیاست مئیدان اوخویور
دئییر آچیق دئمه لش تک قوخویور
سؤز اودور کی دؤرد بئش آنلام توخویور
اؤزگورلوک یاساقدیر آدین گتیرمه
وطن یازیب شعرین آبرین گؤتورمه
هانسی شعری باشا دوشسن شعاردی
ساده تشبیه ، تلمیح اوچموش دیواردی
قوشما گرگ سربست تکین یازیلا
لاپ اؤرتولو سؤز قول ـ قولا دوزوله
شعری گرگ عوام باشا دوشمویه
قانیب سؤزو لذت آلیب شیشمییه
خیال مینیب گئچمیشینه گشمییه
شاعیر گرگ اؤزون خلقه قوشمویا
یازیسیندا وطن دردی جوشمویا
جیزیغیندان ایغی چؤله دوشمویه
مین ایل گرگ خلقدن قاباغی یازا
سونرا گلن لرده معناسین یوزا
اوخویان قانمایا فیکیره دالا
گر دئسه بیلمیرم ساوادسیز اولا
ایستمه سه ساوادسیز آدلا
سولا دوشونمه میش گرگ آلقیشا دولا
بئله فیکیر خلقی چوخ اوزاق سالیر
کیتابینی ساتار نه قدر چوبالیر
بیر آزین پای وئریر قالانی قالیر
ائل سئون کیتابین چاپی چوخالیر
چونکو شعرلری اوخویان آلیر
ساده شعر بال تک سینیری جانا
بیر دونه اوخوسان قوشولور قانا
علعسگر هاچاندیر چرشنبه یاریب
ظلیم خان بولاغی کونوللر قازیب
معجزین چوخ شعری آغیزدا گزیر
صابیر دوشونجه سی تورک ائلین بزیر
شجاعت بهمنده روحدا ایز آچیب
حیدربابا دونیایا ایشیق ساچیب
جعفری شعارلا گؤیه اوجالیب سهند ده درد دئیب
گؤنوللر آلیب اؤرپکلی یازیدان یاددا نه قالیب
زهتابی جن کیمین ساوادی واردی
تورک آغاجین ساده سؤزله سوواردی
استعاره تؤکوب شعری یوواردی
اولو اوستاد چکدی خالقین آدینا قالدی
اؤز خالقینین یالنیز قایدینا اَریدی
باخدیقجا گؤزلر یاشینا
ائلده اونو تاج ائلیب باشینا
دوزدور یئنی تشبیه گرگدیر اولا اغراغین
حدی وار عقله ده دولا ائل قانان
