بابالاردان قالان، یادیگار ائله

یادلاری چئویریب، قاتانا لعنت

تورکو یئر اؤلکه نین، تورکو اوبانین

آدلارین چئویریب، قاتانا لعنت

بابالار تورکو آد، قویدو هر یانا

اوشاغی یئکه لیب، یوردونو قانا

کئچمیشین بیله او، باش اوجا قالا

بابالار رسمینی، قاتانا لعنت

منیم ده یوردومدو، گؤزل اوجانیم

سهنده دایانیب، اوره ییم جانیم

بوستان آباد دئییر، اوجانی دانیم

اؤز ائلین آیرییا، ساتانا لعنت

سرسکند پوزولدو، اولدو هشتَ رود

آجی چای سیلیندی، اولدو تلخه رود

بیلمیرم سیلَنلر، گؤرورلر نه سود

آنا دیلده آدی، قاتانا لعنت

توفارقان نه ییدی، آذرشهر اولدو

خانا دا چئوریلدی، پیرانشهر اولدو

او گؤزل خییاو دا، مشکین شهر اولدو

دوغما یوردون آدین، دانانا لعنت

ملک کندی یاندی، چیخدی ملکان

بَی کندین چئویریب، اولوبدور بوکان

بزکلی گون دوغان، اولدو کندوان

تورک ائلین آدینی، قاتانا لعنت

اورمودا قوشاچای، آدی سیلیندی

یازدی میان دو آب، تزه دیلیندی

تیکان تپه چؤنوب، تکاب بیلیندی

سولدوزو نقده، قانانا لعنت

قاراداغ دا، ارس بارانا دؤندو

ساری داش سیلیندی، سردشته چؤندو

ساوه لر بزندی، ساووج دا سؤندو

آراز چایین ارس، یازانا لعنت

ساووج بولاق قالسا، هر دین قاریشار

مهاباد اولونسا، ائللر باریشار

سایین قالا اوچوب، شاهین دژ یاشار

یالان دئییب دینی، قاتانا لعنت

قَشه مین میشوو، میشاب یازیلدی

قدس اوجالدی، قره آغاج پوزولدو

زنجان گلدی زنگان، آدی قازیلدی

حاق اولسا هئچ، ناحاق یازانا لعنت

تورکو آد سیلیندی، یالان دووارا

یالان دیلده آدلار، ائله قورولا

اوشاغلار یئکه لیب، تورکدن یورولا

دوز سؤز یئرینده، یالانا لعنت

ایسته دی ائلیمنن، آرالی اولام

یوردومدا تک قالیب، یارالی اولام

اؤزو هارالیدی، اورالی اولام

تورکونو آذری، یازانا لعنت

آچ گؤزونو اویان، تورکون بالاسی

هارای سال تیتره سین، بابک قالاسی

گؤیلره اوجالسین، حقین بیناسی

میللتلر حققینه، باتانا لعنت

آشیق اوغلو دئییر، سؤزلرین عیان

قویما حقین گئده، غفلتدن اویان

تورکو دیلده یاشا، آزاده بیان

دوزو یالان ائدیب، اویانا لعنت