چاپ

 

سنسیز ای آرام جان یوخدور داها خوش گونلریم

پارچالاندی جان ائویم همده کی آغزیمدا دیلیم

آتش هیجران چکیب اود   بو   سرای   کؤنلومه

یاندی باغچا حسرتینده داغلار اولدو نیسگیلیم

آغلاییر دیلسیز به بک او خوش نیگاریندان اوزاق

تیغ حسرت قان سالیب دیل اولدو آغزیندا دیلیم

اود توتار باغیرم یانار دوشسن خیالیمدان   اوزاق

اولماز ای روح و روان عشقی بو قلبیمدن سیلیم

آرزیسان   کویوندا جولان ائله ییر   مینلر   اوره ک

مظهر جانسان بو خلقه بحر ثروت   هم   بیلیم

قووزانیب سسلر قیامت دوشدو فریاد و   فغان

گؤز قارالدی صبر جوشدو انتظار اولموش ائلیم

حمله ائتمیش دیو و دد وحشت سالارکن ائللره

ناله دیر مظلوم سسی ظولمات توتوب چنلی بئلیم

سوسدو بولبول آچماییر گول ماتم   اولدو   روزگار

ترسه دوندو چرخ دؤوران سانکی یوز اولدو ایلیم

دؤزمه رم هیجرینده مین ایللرده سورسه آیریلیق

مست ائدیر عطر خیالین هاردا قالدین سئوگیلیم.