21 آذرقیامی نین 72 ینجی ایل دوُنوُمون گوُنئی آذربایجان توُرک میللتینۀ اوُرۀ کدن تبریک دئییب یاشادیقیمیز بوُ حساس چاقدا میللی فعاللاریمیز ؤ بوُتوُن آذربایجان میللتینۀ بوُیوُک باجاریلارآرزوُ اتمئکلۀ یاناشی بوُ مطلبین دۀ قئید اوُلوُنماسین ضروُری بیلیب ، میرجعفر پیشۀ ورینین سیماسیندا میللی حاکیمییتی یئنی آراشدیریب ، اوُ بوُیوُک حادیثۀ نی بیرداها یئنی دن تانیماقی دا گئنج نسلیمیز اوُچون ضروری حئساب ائدیرۀ م .

کئچمیش اوُزوُن ایللردن بوُ گوُنۀ قئدر گوُنئی آذربایجان میللتی 21 آذرقیامی نین ایل دوُنوُموُن بیر گوُزوندۀ سئوینج ، بیر گوُزوُندۀ کئدرلۀ ایران دئیلن یئرۀ چئتین شرایط لرۀ باحمییاراق قئید ائدرئک ، آذرقیامینین اوُنئملی میللی أهمییتی نین یاد ائدیلمۀ سین نئسیللردن نئسیللرۀ تاپشیرایلمیشدیر .

سوُز سوُز کی میرجعفرپیشۀ وری نین باشچیلیقی ؤ گوُنئی آذربایجان میللتی نین قاباقجیل آزادیخواه لارینین گئنیش ایشتراکی ؤ صمیمی اوُلاراق باشلادیق لاری میللی قیام سادۀ بیر قیام دئییردی ، چوُنکی 21 آذرقیامی بیردن بیرۀ یارانمیش بیر قیام دئییردی، اوُنوُن کوُکلری مشروطۀ اینقلابی ، خیابانی قیامی ، کلنل محمد تقی خان پسیان ؤ بوُتوُنلوُکلۀ گوُنئی آذربایجان توُرک میللتینۀ آردیجیل اعمال اوُلوُنموش ظوُلملردن ؤ حاقسیزلیقلاردان قایناقلانمیشدی .

میللی حاکیمییت هئرهانسی سببلرۀ گوُرۀ ؤ توُرک دوُشمانی اوُلان ایستالینین خئیانتی نتیجۀ سیندۀ ؤ بیرلئشمیش فارس ایرتیجاع سی ایلۀ ، راسیست قارا قوُوۀ لرین هابئلۀ دوُنیا ایمپریالیسمی نین شاه رژیمینۀ یاردیم لاری نتیجۀ سیندۀ دئوریلدیکدن سوُنرا آذربایجان میللتی حقیقی معنادا دهشتلی سوُی قیریما معروُض قالدی ؤ اوُ گوُندن بوُ گوُنۀ کیمی دۀ فارس راسیسمی داواملی اوُلاراق میرجعفر پیشۀ ورییۀ ؤ میللی حاکیمییتین رهبرلرینۀ دوُرمادان ایرنج أهانت لراتمئگۀ داوام وئریرلر.

بئلۀ لیکلۀ فارس راسیست لری ؤ ایرتیجاع قوُولری اوُتانمادان پهلویلررژیمینین خئیانت ؤ سایسیز جینایت لرین اوُرت باسدیراتمئگۀ چالشیرلار! لاکین هئچ زامان قوُلدوُر ریضا خانین اینگیلیس نوُکری اوُلدوُقوُن ؤ یا محمد ریضانین آمئریکا نوُکری اوُلدوُقوُندان حتی بیرکلمۀ دۀ سوُز آچیب دانیشماقا شهامت لری یوُخدوُر!

دیققت اتمئگ لازیم دیرکی فارس ریجاللاری هئلۀ قاجالار چاغیندان اینگیلیس فراماسوُن محفللری ؤ تشکیلات لارینین فعال عضولری اوُلماقلا ، أن بوُیوُک ؤ باشدا گئلن ؤظیفۀ لری قاجار توُرک حاکیمییتین دئویرمئک ؤ اینگیلیس ایستعمار چیلاری باشدا اوُلماقلا ، بوُتوُن غارتگرلرین منافع لرین حیفظ اتمئکدن باشقا بیر شئی دئییردی ؤ بوُ گوُندۀ موُللا لار رژیمیندۀ بوُیوُک مقاملاری ایشغال اندن آیت الله لار یئنی فراماسوُنلار دیرلار کی اوُنلاردان أن اوُنئملیسی اوُلان ؤ یاخین کئچمیشدۀ دوُنیاسین دئیشمیش اوُلان آیت الله « مهدوی کنی ؤ هئلۀ حئییاتدا اوُلان لاریجانی قارداشلاری ؤ بیرسیرا باشقا قوُندارما ؤزیرلر ، یوُکسئک دوُولت مقاملارین ایشغال اتمیش یئنی ماسوُنلار اوُلاراق اوُلکۀ نین بوُتوُن ثروت لرین منیمسۀ مئکلۀ ، همدۀ غارتچی دوُولت لرین منافعین اتمئک اوُچوُن نوُکرچیلیک ائدیرلر .

آمما گوُروُروُک کی آمئریکا ؤ آوروُپادا یئرلئشمیش فارس راسیستلری بحث ؤ دانیشیق لاریندا ظاهیردۀ یالانجا رژیمۀ قوُندارما اینتیقاد ! ائدسۀ لردۀ لاکین أصلیندۀ رژیمۀ یوُل گوُتریب ، حتی بیر کلمۀ دۀ حقیقی معنادا رژیمی ایشغال ائدن ماسوُنلار حاقدا دانیشماق ، ایفشاگرلیک اتمئک ایستۀ میرلر، چوُنکی بوُنلارین اوُزلرینیندۀ قوُیروُقلاری فراماسوُن تشکیلاتینا باغلی اوُلان عوُنصورلردیلر.     

بئلۀ لیکلۀ بیلدیگیمیزکیمی ایران دئیلئن یئردۀ خومئینی رژیمین ایش باشینا گئتیریلمۀ سی 1341 ینجی ایلدن باشلانمیشدیر ؤاوُنوُن  سوُن پلانی اینقلابدان بیر آی قاباق فرانسانین « گوُوادالوُپ» آداسیندا " جزیرۀ سیندۀ " طراح لیق اوُلوُنموُشدوُر، آمما بو سیر 7 ایل بوُندان قاباقا قئدر اوُستوُ اوُرتوُلوُ قالمیشدی ؤ هئچ ؤجۀ ینن اوُنو بیلدیکلری حالدا ایفشا اتمیردیلر.

ایندی سوُرغوُ بوُردا دیرکی حقیقی آذربایجان وُورغوُنوُ ؤ خالقین اوُرۀ کدن سئون ، دوُنیا مالیندان هئچ بیر ثروُتی ، موُلکوُ اوُلمییان میرجعفر پیشۀ وری بیگانۀ لرین نوُکری ایدی !؟ بیرحالداکی یوُز ایلۀ یاخین آردی آردینا حاکیمییتین حساس مقاملارین ایشغال ائدیب اوُلکۀ نین ثروتلرین غارت ائدن  فارس راسیست لری ؟ 

کئچمیش پهلوی رژیمین داغیلماسی ایلۀ مقاملارین ألدن وئرمیش فارس ریجاللاری حاکیم اوُلدوُقلاری اوُزوُن ایللربوُیوُ ایستۀ دیکلری شیوۀ لرلۀ غارت ، ظوُلم اتمئکلۀ بیلرئکدن موُللا رژیمینین یارانماسینا زمین یاراددیلار، اوُنلارین جانیشینلری اوُلانلار40 ایل موُدتیندۀ اوُلکۀ نی ایشغال اتمئکلۀ میللت لرین سئسین بوُغوُب سوُنسوُز جینایتلرینۀ داوام وئرمئکدۀ دیرلر بوُ ساتیلمیش لار ایستر سیویل پالتاریندا اوُلانلار ، ایستر عمامۀ لی ؤ سپاهی پالتاری گئیینمیش لات لوُت لر ؤ جینایتکارلاردرلار کی تئهرانین مشهور جینایتکارلاری ؤ اوُغروُلاری ایدیلار!

بوُ ألی قانلی قاتیللر آذربایجان توُرک میللتی نین وارلیقین گوُرمئگۀ گوُزلری یوُخدوُر ؤ هئر یئردۀ هئرتظاهراتدا میللتیمیزین سئس لئندیردیگی "یاشاسین آذربایجان" شعاری اوُنلارین اوُرۀ کلرینۀ خنجرکیمی باتیر آذربایجان کلمۀ سی هئریئردۀ هئر زاماندا سئسلئندیکدۀ فارس راسیست لرینین گوُزوُنۀ باتان اوُدلوُاوُخ کیمی دیر، اوُز امان کی فوُتبال استایوملاریندا " آذربایجان ایران دئییر" شعاری یازیلدیقدا فارس راسیستلری ؤ حاکیمییت مقاملاری بوُیوُک وحشتۀ دوُشوُرلر ، آمما یوُزمینلرلۀ شهامتلی ؤ قوُرخماز گئنج لریمیزین قارشیسیندا عاجیز قالدیقدا بوُ دفعۀ حقیقت قارشیسیندا سکوُت اتدیلر.

اوُ زامان کی میرجعفرپیشۀ ورینین فارس مجلیسیندۀ  نمایندۀ لیگی ایرتیجاع ؤ شوینیست طرفیندن رد اوُلوُندوُ ، اوُ بوُیوُک اینسان دوُرمادان آذربایجانین تاریخی پایتختی اوُلان تبریزشئهرینۀ ، اوُز خالقینین قوُجاغینا قایدارکن ایلک دفعۀ اوُلاراق " خداحافیظ تئهران " شعارین اوُرۀ کدن دیلۀ گئتیردی ؤ بوُدا ائلۀ همان بوُگوُنکو " آذربایجان ایران دئییر" شعارینین ایلک دوُغوُشوُ دئمئگ ایدی.

بیز بوُتوُن وارلیقیمزلا اینانیریق کی بوُ گوُن گوُنئی آذربایجانین میللی حئرکتی میرجعفر پیشۀ ورینین گئنج ، فداکار ، میللی شعوُرلوُ نوُۀ لرینین ألیندۀ دیر، وطنیمیزین آزادلیقی ، قوُرتوُلوُشوُ صداقتلی أللردۀ هئرگوُن ایرۀ لییۀ دوُغروُ یئنی آددیملار آتماقدا دیرلار، بوُناگوُرۀ دۀ بیز پیشۀ وری یوُلوُنوُن داوامچیلاری اوُلان بوُتوُن عزیزلریمیزۀ بوُ مقدس موجادیلۀ دۀ باجاریلار ؤ موُوفققییت لر آرزوُ ائدیریک .

آذربایجان میللتی یاشادیقجا میرجعفر پیشۀ وری ؤ اوُنوُن همفیکیرلری ؤ سیلاح داشلارینین آدلارین هئر شرایط دۀ اوُجا زیرؤ لردۀ  یاشییاجاق .

یاشاسین آذربایجانین میللی حئرکاتی ؤ بوُ حئرکاتدا ایشتراک ائدن شرفلی آذربایجان گئنج اوُغوُل قیزلاری.

آذرخش ـ 27 / 11 / 2017