گوز تازا گیرمیشدی، مدرسه لر آچیلمیشدی. هاوا سرینلَمگه باشلامیشدی. بئشینجی کیلاسا گئدیردیم. طؤله دامیندا سردیگیمیز قوزلاری آخشام گون باتانا یاخین، گئجه گلن شئه ین قوزلاری تازادان ایسلاتماماسی اوچون، ییغاردیق. بیر آخشام آبا (آنامی آبا چاغیراردیق) ایله بیرلیکده طؤله دامیندا قوزلاری ییغارکن، آبا "آلله نعمتووه چوخ شوکور، بالا آلله برکت وئرسین، ماشاالله بو ایلکی قوزلار هر ایلکیندن داها ایری و ایچی دولودورلار" دئیه شوکور ائدیردی. آبانین آتاسیندان میراث قالمیش بیر زمیسی وار ایدی. آبا اؤزو زمیسینی گؤرمه میشدی. زمینین هاردا اولدوغونو، ائنینین - بویونون نئچه متیراولدوغونو بیلمزدی. زمی سئل چایینین اوبیری تاییندا، قبله داغینا یاخین بیر یئرده ایدی. سو توتمازدی، دئم زمی ایدی. قدمگاهلی شیخ یدالله زمینی یاری کارا گؤتورموشدو. دئم بوغدا، دئم آرپا، بیر پارا ایللرده زَگیرَک اکردی. اؤز انصافینا گؤره حاصیلین بیر بؤلومونو اؤزو گؤتورردی، بیر بؤلومونو ده بیزه گتیرردی. آقا (آتامی آغا چاغیراردیق)  او زمی ایله هئچ ماراقلانمازدی. نئچه ایل اؤنجه شیخ یدالله یا یاری کارا وئرمیشدی. اوندان سونرا دا نه اکیلدیگینه، نه بیچیلدیگینه هئچ دیققت ائتمزدی. زمینین قیراقلاریندا بیر نئچه گیردکان آغاجی دا وار ایدی. بیر پارا ایللرده، شیخ یدالله ائششگین اوستونده بیر چوالین یارسی، یوخسا یارسیندان دا آز گیردکان گتیرردی. بیر پارا ایللرده ده "بو ایل گیردکانلاردا حاصیل اولمادی" دئیَردی. آبا نئچه ایللردن بیری او زمیدن گلن حاصیلین پولونو ییغیب ساخلارمیش. "انشا الله مکه یه گئدجگم" دئیه صاندیغیندا ییغارمیش.

او آخشام  آقا گلدیگینده اؤزو ایله بیرلیکده بیر سئوینج، بیر آیدینلیق گتیردی ائوه. قاپیدان گیرن کیمی آبایا اوز توتوب، "عمی قیزی بو پولو آل قوی صاندیغیووا، اون ایکی مین تومن دیر، سیجییللوو ده گتیر، صاباح گئدیب گذرنامه آلماق اوچون آد یازدیراجاغام.  بو ایلکی حج دؤنمینده انشا الله مکه گئدیریک" دئدی. آبا کیچیک بیر قیز اوشاغی کیمی بیر سوینجه توتولدو. "عمی اوغلو آلله سنه ساغلیق ایله اوزون عؤمور وئرسین، آلله چوخ شوکور" دئیه تشکور ائدرک سئوینجینی و راضیلیغینی بیلدیردی. آنجاق او آخشامدان باشلایاراق اؤز ایچینده پارچالانماغا باشلادی: "آلله منی باغیشلامایاجاق، عمی اوغلونو چوخ اینجیتمیشم."

ائرته سی گون سحر آبا هر گون اولدوغو کیمی بیزدن تئز قالخیب ساماواری یاندیریب، چایی دمله ییب، قاینالتی سفره سینی حاضیرلامیشدی. آنجاق گئجه یوخولامامیش کیمی بیر حالی وار ایدی. آلتی شیشمیش گؤزلری درینه دوشموش و یورغون گؤرونوردو. اوزونون دریسی اؤلو دریسی کیمی روحسوز و جانسیز ایدی. دانیشماق ایسته میردی، ایستکسیزجه دیله گتیردیگی بیر - ایکی کلمه ده ایسه سس تونوندا قورخو ایله پئشمانلیق دویغوسو آچیقجا حس ائدیلیردی. سانکی، "عمی اوغلو، مکه یه گئتمه گی بیراخ، سن منی باغیشلاسان، یئتر." دئمک ایسته ییردی. آقادا دا بونا بنزر بیر حال وار ایدی. صبح نامازینی قیلدیغیندا سس تونو هرگونکو کیمی قولاغا گلمیردی. سسینده بیر شکایت، بیر اینجیکلیک حس ائدیلیردی. آقا نامازینی قورتاردیقدان سونرا سفره باشیندا دری دؤشگینین اوستونه اوتوروب هئچ بیر شئی دئمَدن باشینی آشاغی سالیب، ایستکسیزجه شیرین چایینی قاریشدیردی. اشتاهسیزجا بیر تیکه پنیر چؤرک آغیرینا قویوب، شیرین چاییندان بیر قورتوم ایچرکن، قاچاق بیر باخیش ایله آبانین اوزونه باخدی. سانکی، "گؤتور، او دا سنین مکه پولون، دؤرد ایل عؤمروموزو چوروتدون، گونوموزو قارا ائله ییب، چؤرگیمییزی نار قابیغی ائتدین." دئمک ایسته ییردی. او گونه قدر حس ائتمدیگیم درین بیر یالنیزلیق دویغوسو اورگیمی دولدورموشدو. اونسوز دا یالنیزلیغیم آبا ایله آقانین دؤرد ایل اؤنجه مکه پولو اوستونده داعواسی نین باشلانماسی ایله بیرلیکده، ایکی بؤیوک قارداشیم ایوب ایله داوودون تبریز اونیورسیته سینده درس اوخوماق اوچون ائودن آیریلیب تبریزه گئتمه سینین بیر آرایا گلمه سی ایله باشلامیشدی. آنجاق اوگون سحر قاینالتی سفره سینین باشیندا حس ائتدیگیم کیمی درین و آغیر یالنیزلیق و بیراخیلمیشلیق دویغوسونو او گونه قدر حس ائتمه میشدیم.

اوندان دؤرد ایل اؤنجه  آقا ایکی قارداشی ایله بیرلیکده توفارقاندان تبریزه، تبریزدن توفارقانا مسافر چکمک ایشینده رقیبلری قووالاییب، بوایشی تک باشینا اله کئچیرتمک ایسته ییردی. بؤیوک بنز اتوبوسو ایله بؤیوک جمس اوتوبوسو ساتیب، اونون یئرینه سکگیز - دوققوز کیچیک مینی بوس ایله ایشلمک یولو ایله، رقیبلره امکان وئرمدن، هر ساعات باشی بیر مینی بوسون توفارقاندان تبریزه ساری، بیر مینی بوسون تبریزدن توفارقانا ساری یولا چیخماسینی، و بئله جه رقیبلره امکان وئرمه مگی فیکیرلشیردی. بو آرادا  پولو اسگیک گلدیگیندن آبایا دیل آچمیشدی، "عمی قیزی، او مکه یه گئتمک اوچون ییغدیغین پولو وئر، ماشینلاردا سنی ده اورتاق ائله یک، پولون پول قازانسین، بیر - ایکی ایل سونرا همی سرمایه وی، همی ده بو آرادا پولوون قازاندیغی پولو گئری وئررم". آبانین ایسه ماشیندان، پولون پول قازانماسیندان هئچ بیر تصورو یوخ ایدی. "عمی اوغلو، من بو قدرینه راضی یام. آلله سندن راضی اولسون، آلله سنه عؤمور وئرسن، قوی او پول ائله صاندیقدا قالسین، نه زامان مکه یه گئتمک اوچون یئترسه، منی مکه یه آپار" دئمیشدی. آبانین ماشیندان پولدان بیر تصورو اولمادیغی کیمی، مکه یه گئتمگین نه اولدوغوندان دا بیر تصورو یوخ ایدی. بئش یاشیندا ایکن آناسی اؤلموشدو. اوندان سونرا دا آجی دیللی بیر اؤگئی نه نه نین الی آلتیندا قالمیشدی. دوققوز یاشیندا ایکن ده عمی سی حسینقولو آتاسینی باتمان داشی ایله باشیندان وورموشدو. بیر نئچه آی سونراسی آتاسی دا اؤلموشدو. آتاسی اؤلدوکدن سونرا، دوققوز یاشیندا بیر قیز اوشاغی اولاراق آنجاق آتاسینی باتمان داشی ایله ووران عمیسینین حمایتی آلتیندا قالمیشدی. دوققوز یاشیندان سونرا، عینی ائوده، عمی سی حسینقولونون تربیتی آلتیندا بؤیوموشدو. اون یئددی یشایندا دا عینی ائوده یاشایان حسینقولو عمیسینین اوغلو رحمانین آروادی اولموشدو. قیسساجاسی قیرخ بئش ایللیک عؤمرونده دونیادان تک بیر حیطین دؤرد دواریندان باشقا بیر شئی گؤرمه میشدی. حس ائده بیلدیگی ایکی گوجلو دویغوسو وار ایدی، بو ایکی دویغودان بیرینجیسی قورخو، ایکینجیسی ایسه گوناه ایدی. هرکسه قارشی دا، کیم اولورسا اولسون، بیر تک توتومو وار ایدی. بو دا، "بله، باش اوسته" ایدی. نئچه میلیارد انسانین یاشادیغی دونیادان تانیدیغی و "محرم" ساییب اوزونه باخابیلدیگی، چکینمدن، قورخمادان دانیشابیلدیگی بئش کیشی وار ایدی. ایکی عمیسی، بیر قارداشی، اری اولدوغو عمی اوغلوسو، و بیرده کورکنی.

آقا آبانی راضیلاشدیرابیلمه یینجه، آتاسی حاجی حسینقولونو آبانین اوستونه گؤندردی. آبا حاجی حسینقولو بابانی گؤرونجه قورخودان آز داها شالوارینی باتیراردی. حاجی حسینقولو بابا آبانین آتاسی اولان جعفرقولو بابانی باتمان داشی ایله ووران آدام ایدی.

حاجی حسینقولو بابانین ائوه گلدیگی گونو یاخچی خاطیرلاییرام. یئنه بیر پاییز گونو ایدی. حاجی حسینقولو  بابا دیزینه یاخین اوزون، سورمه رنگلی کوتو، باشیندا لبه دار بؤرکو و الینده عصاسی ایله ایچری گیردی. آبانین سلامینا دیل دوداغی آراسیندا قیسسا بیر جواب وئردیکدن سونرا اؤزونه مخصوص دیکتاتورجا لحنی ایله، "مشهدی فیضه، چارشابوو اؤرت باشووا گل گئدک" دئیه امیر وئردی. آبا، "عمی هارا گئدیریک؟ نیئه گدیریک؟" دئیه بیر شئ سوروشماغا جسارت ائتمه دی. قورخودان الی آیاغی اسه - اسه  چارشابینی باشینا سالیب، حاجی حسینقولو بابانین دالیسیجا قاپیدان چیخدی. یاریم ساعات سونرا تکرار بیرلیکده ائوه قاییتدیقلاریندا، حاجی حسینقولو بابا بیر آز گولومسه یرک، "یاخچی، ایندی گئت او صاندیقداکی پولو گتیر، بیرده آتا - بابالی بیر چای دمله اوتوراق تازا حیطوون شیرنیسینه ایچک، آل بو دا حیطوون قباله سی. آپار قوی صاندیغا." دئیه الینده گتیردیگی عم جزوه بنزر بیر دفتری آبایا وئریب، حیطده سریلمیش کیلیمین اوستونده اوتوردو. آبا قورخودان تیتره یه تیتره یه ساماوارا اوت سالیب، بیر چای دمله دی. آغلادیغینین حیققیلتیسی ائشیدیلمه سین دئیه چارشابینین اوجونو ییغیب آغزینا تپدیگینین یانیندا، الی ایله ده آغزینی سیخی توتموشدو. قورخودان الی - آیاغی اسدیگی اوچون چای استکانی ایله قنددانی میس مِژمه یی یه قویوب، آغلاییشینین حیققیلتیلاری آراسیندان منه سسلندی، "بالا بو چایی قوی آقاباباوون قاباغینا." یئنه هئچ بیر شئی دئمدن، "عمی نه حیطی؟ نه قباله سی؟" کیمی بیر سؤز سوروشمادان گئدیب صاندیقداکی پولو بوکولدوگو دستمال ایله بیرلیکده گتیریب، آقابایا وئردی. دئملی ثبت احوال اداره سینده آقابانین دستورونا گؤره بارماغینی باسدیغی کاغاذ حیطیمیز ایله دووار بیر اولان حیطین قباله سی ایمیش. آقا بابا سوسغونلوق ایچینده چایینی ایچیب، قالخیب عصاسینی گؤتوروب، گئتدی.

او گوندن سونرا دؤرد ایل بؤیونجا ائوده یئدیگیمیز زهرمار چؤرک ایدی. سحر قاینالتینی آغیر سوسغونلوق ایچینده یئیردیک. گون اورتا چاغی مدرسه دن گلدیگیمده، آبانی یا دیزینی قوجاقلامیش بیر کونجده اوتورارکن گؤرردیم، یا دا آغلایا - آغلایا یورغونلوقدان یوخولامیشدی. بیر اؤنجه کی گئجه دن قالمیش ات پایینی سویوق  سویوق بیر تیکه چؤرک ایله یئیردیم، یوخسا پنیردن - یوغورتدان - دوشابدان بیر شئیلر تاپیب یئدیکدن سونرا، ائوین داریخدیریجی هاواسیندان یئنه مدرسه یه گئدردیم. آخشام شامی دا یئنه عینی آغیر سوسغونلوق ایچینده یئدیکدن سونرا، آقا "مکتب اسلام" مجله سی نین مطالعه سی ایله مشغول اولاردی، یاخود "مفاتح الجنان" یوخسا، "نهج البلاغه" ده ایتیب گئدردی. آقا چوخ سایغیلی وادبلی بیر انسان ایدی. عؤمرومده بیر یول اولسون آبایا، یوخسا اوشاقلارینین هانسی نا اولسون، چیرکین بیر سؤز دئدیگینی خاطیرلامیرام. بوتون عصبانیلیگینی و غضبینی سوسغونلوغوندا گؤسترردی. سوسغونلوغوندا انسانین دریسینی سؤکوب، اتینی کئچیب، سوموگونه ایشله یَن بیر آجی و قَهَر وار ایدی. اورگیمده ائله بیر یالنیزلیق دویغوسو یاراداردی کی، سانکی برهوت چؤلونده، انسان آیاغی چاتمامیش، داغسیز، دره سیز، آغاچسیز بیر دوزنگاهدا، عؤمرومون سونونا دک بیر انسانلا قارشیلاشما اومیدینی ایتیرمیش کیمی یالنیز قالمیش ایدیم. آقانین بئله سوسغون گونلرینده سوموکلریمین دگیرمان داشی آلتیندا اوغولدوغونو حس ائدردیم.

گون اورتادان سونرا داوود گلدی. آبایا  "قالخ گئدک عکسوو سالدیراق." دئدی. آبا ایسه، "یوخ بالا من گئده بیلمرم. من نه تهر قالخیب نامحرملرین ایچینده عکاس خانایا گئدیب نامحرم کیشی قاباغیندا اوزومو آچیم" دئیه عکاسخانایا گئتمکدن امتناع ائتدی. داوود "آی نه نه، آخی عکیس سالدیرمادان، گذرنامه آلمادان مکه یه گئده بیلمزسن کی" دئیه یالواردی. آنجاق آبا عکاسخانایا گئتمگه راضیلاشمادی. داوود  سونوندا گئدیب عکاسی ائوه گتیرمک فیکرینه چاتدی و آبانی چتینلیک ایله بونا راضیلاشدیردی. آخشاما یاخین داوود ایله عکاس ائوه گلدیلر. ایندی ایسه آبانین چتینلیک چکدیگی عکاسین قاباغیندا اوزونو آچماسی ایدی. داوود ایله عکاس ائوده دوز بیر دووار تاپیب، عکاسین گتیردیگی آغ پرده نی میخلاماق اوچون مشغول ایکن، آبا زیرزمی ده قورخا قورخا چارشابینی باشینا اؤرتوب، اوز -  گؤزونو چارشابا بورویوب حیطه چیخدی. ائوده عکاسین گتیردیگی آغ پرده نی میخلاماق اوچون اویغون اولان تک دووار طؤله دامیندا کوچه یه ساری اولان دووار ایدی. عکاس پرده سینی دووارا میخلادی. داوود  گئدیب، ائوده وار اولان بیر تک قارا صندلی نامازخانا دئدیگیمیز دیب اوتاقدان گتیریب پرده آسیلان دووارین یانینا قویدوقدان سونرا آبایا، "آبا گل اوتور بو صندلین اوستونده" دئیه سسلندی. آبا، اوزو چارشابا اؤرتولو، طوله دامینا چیخان پیلله لردن چیخیب، باشینی آشاغی سالیب، عکاسا طرف باخمادان، کئچیب اوزو اؤرتولو شکیلده صندلین اوستونده اوتوردو. عکاس حیرص ایله داوودون اوزونه باخاراق غضبلی بیر سس تونوندا، "بوجور سالیم؟" دئیه سوروشدو. داوود  ایسه عینی غضبلی سس تونوندا آبایا ساری "آبا مکه یه گئتمک ایسته میرسن سه قالخ گئت، عکس سالماغا دا گرک یوخدور" دئیه چیغیردی. آبا قورخا قورخا ساغ الی ایله اوزونده سیخی توتدوغو چارشابینی بیر آز آرالادی. سول گؤزو ایله بورنونون سول طرفیندن بیرآزی، بیرده سول یاناغیندان کیچیک بیر بؤلومو گؤرونمه یه باشلادی. آنجاق قورخودان الی تیتره ییردی. عکاس عصبانی بیر شکیلده اؤنمسیزجه بیر دانا عکس سالدی. دوربینینین آیایقلارینی ییغماغا باشلادی. داوود "آقای منصوری، بیر لحظه صبر ائدین، او عکسی پاسپورت اوچون قبول ائله میزلر" دئیه یالواردی. عکاس عصبانی بیر شکیلده دووارا میخلادیغی آغ پرده یه ووردوغو سانجاقلاری چیخاردارکن، "حاجی خانیم  پاسپورتا وورولماغا اویغون عکس ایسته ییرسه تشریف گتیرسین عکاسخانایا، اوزونو آچسین، من ده عکس سالیم. ساباح بویورون عکاسخانایا اوچ تومن ایکی قیران دا گتیرین عکسینیزی آلین." دئیه جواب ویریب پرده نی قاتلاییب، چانتاسینا قویوب، دوربینینی گؤتوروب تر  تلسیک طؤله دامینین پیلله لرینین ایکسینی بیر ائدرک ائودن چیخدی. آبا هله ده قورخودان تیتریه تیتریه صندلین اوستونده اوتورموشدو. یئریندن قالخماغا جسارت ائتمیردی.  داوود "آقای منصوری! آقای منصوری!" دئیه چاغیرا چاغیرا عکاسین دالیسیجا کوچه یه قاچدی. بیر نئچه دقیقه سونرا نفسی دؤگونه دؤگونه قاییدیب، هله ده اوتوردوغو صندلین اوستونده تر ایچینده قالمیش آبایا، "بویور جاجی خانیم، او دا سنین مکه ن، آلله قبول ائله سین" دئه چیغیردی. آبا چارشابینین قیراغی ایله آلنیندا دامجی - دامجی دوران تری سیلرکن، یالواریرجاسینا، "بالا حاجی خانیم دئمه گوناه اولار" دئدی.

او آخشام آقا، بیر اؤنجه کی آخشامین تام ترسه سینه، قاش - قاباغی یئری سوپوره سوپوره ائوه گیردی. هر آخشامکی کیمی حیطده حووضون باشیندا صبیرلی - حؤصله لی، دیل دوداغی آراسیندا، "بسم الله الرحمن الرحیم. انا انزناه فی لیله القدر. و ما ادراک..." اوخویا اوخویا دستامازینی آلیب، گلیب، کیلیمین اوستونده نامازینی قیلدیقدان سونرا دری دؤشکجه سینین اوستونده اوتوردو. آبا ایسه باشی آشاغی، درین بیر سوسغونلوق ایچینده شام سفره سینی حاضیراماقدا ایدی. یئنه اوستومه دایانیلماز بیر آغیرلیق اوتوردو. گؤزومون قابغینا سانکی تار بیر پرده چکیلدی، رنگلر یئنه پوزولدو، سسلری آیدینجا ائشیده بیلمیردیم. دریمی، بدنیمی چولقالایان آغیر بیر چوال کیمی حس ائدیردیم "وای ده ده، یئنه آقانین سوسغونلوغو توتدو، هفته لرجه، آیلارجا بو شکنجه سوروب گئدجگ." دئیه قورخوردوم. شامی ییئیب سفره نی ییغدیقدان سونرا، آقا یاسدیغینا یاسلانیب، بارماقلارینی بیری بیرینه کئچیردیب، باشینی قاوزاییب آبانین اوزونه باخمادان، "عمی قیزی، داوود چوخ عصبانی ایدی. "من ایکی درس ساعاتیمی یئره وورب، قالخیب تبریزدن بورایا گلمیشم، حاجی خانیم دا عکاسا آنجاق بیر گؤزونون گوشه سینی گؤرسدیر. بیرده منه بئله بیر ایش حواله ائله مه" دئیردی." دئدی.  آبا دیل دوداغی آراسیندا ایکی یول "استغفرالله، استغفرالله" دئیه پیچیلدادیقدان سونرا، یئنه قورخو دولو سسی ایله، "عمی اوغلو آلله سنه عؤمور وئرسین، "حاجی خانیم" دئمه گوناه اولار." دئدی. آقا جددیلیگینی پؤزماماق اوچون گولمه گینی ایچینده بوغدو، ساغ الی ایله باشینین هر یانینی دورمادان قاشیماغا باشلادی. سانکی ایچینده، "دور ایندی سنه گؤستررم مکه یه گئتمک نئجه اولار، آرواد نامحرم قورخوسوندان یوز آددیملیق محله میدانینداکی باققلادان بیر کیلو یئرآلما آلیب گتیره بیلمزسن، مکه - مکه دئیه دؤرد ایل بیزیم چؤرگیمیزی نارقابیغی ائدیرسن؟" دئیه انتقام آلیردی. گولمگینین قاباغینی زور ایله آلاراق قالخیب مستراحا گئتمک بهانه سی ایله حیطین اوبیری گوشه سینه ساری یولا دوشدو. حووضون باشیندا آفتافانی گؤتوروب حووضودان دولدورارکن اؤز ایچینده گیزلینجه گولدوگونون قیقیلتیسی ائشیدیلیردی. آقا مستراحدان قاییتدیقدان سونرا، آبا بیر استکان چای دولدوروب اونون اؤنونه قویارکن، "عمی اوغلو، او گوزرمانه دیر، نه دیر، دئییرسوز، اونسوز مکه یه گئتمک اولماز؟" دئیه سوروشدو. آقا گولمگینین قاباغینی آلاجاق قدر اؤزونه حاکیم اولدوقدان سونرا، "عمی قیزی، آلله سنین آتاوا رحمت ائله سین، یالنیز عکیس سالدیرماق دگیل، گذرنامه اداره سینده، گذرنامه مأمورو گرک سنین اوزوو گؤرسون، بیلسین کی بو گذرنامه نین صاحیبی دوغرودان عکیسده اولان آدامدیر، یوخسا آیری آدام. گذرنامه نین آلتینا بارماغوو باساجاقسان. گؤمروک دن کئچنده گرک اوزوو آچاسان باخسینلار گؤرسونلر بو کئچن او گذرنامه نین صاحیبی دیر، یوخسا آیری بیر آدامدیر، اوچاغا میننده گرک اوزو آچاسان، عربستان سعودی نین گؤمروکونه گیرنده گرک اوزوو آچاسان... هله... چوخ یئرده گرک اوزوو آچاسان" دئدی. آبا باشینی آشاغی سالیب، ساغ الی ایله آغزینی توتدو. سانکی بیر اوشاغا، "سوس، دانیشما" دئییرمیش کیمی، دیل  دوداغی آراسیندا "الله اؤزون کؤمک اول!" دئیه پیچیلدادی. آقا ائتکملی بیر سس تونوندا، "ساباح ایوبا سفارش ائدجگم عکاسدان عکیس ماشینی کرایه ائله سین، گتیرسین اؤزو عکسوو سالسین" دئدی. آبا پئشمانلیق دولوسو سس تونوندا، "عمی اوغلو، او عکیسی یئنه نامحرملر گؤجک دا" دئدی. آقا، دؤرد ایللیک گؤزیاشی چؤرگین انتقامینی آلیب بیر راحاتلیغا قاووشموش کیمی، تیز باخیشینی آبانین گؤزونون ایچینه تیکرک، "بلی، مکه یه گئتمگین بو ایشلری ده وار" دئدی. آبا درین بیر آه چکیب، ایستکسزجه، "عمی اوغلو، انشا الله، آلله گوناهیما یازماز، دئیرم گل بو مکه یه گئتمگین یئرینه، ائله بیر یول مکه نییتینه منی آپار خوراسانا، انشاالله آلله قبول ائدر." دئدی. آقا  ایکی الینی یانلارا آچاراق، جیددی بیر سس تونوندا، "عمی قیزی او نه سؤزدور؟  آلله آتاوا رحمت ائله سین، گذرنامه اوچون آد یازدیرمیشام، حمله دارا بیانه وئرمیشم. بو ایشین خرجینین یاریسی بوینوموزا دوشوب - کئچیب." دئدی.

ائرته سی گوندن آبانین دونیاسی آلت اوست اولدو. بیر یاندان نامحرملر ایچینده اوزونو آچماق قورخوسو، بیر یاندان دا مکه یه گئتمک اوچون دؤرد ایل یالوار یاخار ایله، گؤز یاشی ایله ائوین نئشه سینی پوزدوغوندان پئشمانلیق دویغوسو، بیر یاندان دا "عمی اوغلونون" دئدیگینه قارشی گله بیلمه مه سی آراسیندا پارچالانماغا باشلادی. نامحرملر ایچینده اوزونو آچاماق گوناه ایدی، "عمی اوغلونون" احوالاتینی پوزموش اولماق اوندان دا داها بؤیوک گوناه ایدی، ایندی "عمی اوغلونون" مکه یه آپارماسینا قارشی چیخماق دا گوناه ایدی. بو یول دا سحردن آخشاما، "آلله منی باغیشلا، آلله منیم گوناهیمدان کئچ، آلله منی شیطاندان اوزاق ائله" دئیه آغلاییب، گونده اوتوز - قیرخ رکت ناماز قیلماق و بونلا بیرلیکده اؤزونو هئچ بیر زامان "باغیشلانمیش" حس ائده بیلمه مگه باشلادی. گوناهکارلیق و پئشمانلیق دویغوسو انسانی ایچیندن چورودن ان آغیر دویغولاردیرلار. آبا، مکه یه گئدیب گلدیکدن سونرا بئله، عؤمرونون سونونا دک بو ایکی دویغودان یاخاسینی قورتارابیلمه دی. هئچ بیر زامان اؤزونو "باغیشلانمیش" حس ائده بیلمدی.

بوتون قیش بؤیو آقا ایله آبانین مکه یه گئتمک اوچون حاضیرلیقلاری سوروب گئتمکده ایدی. آبا نئچه یول  اداری ایشلر اوچون تبریزه گئتمه لی اولدو و هر سفرینده ده قاییتدیقدان سونرا اوچ گون خسته یاتدی. نامحرم کیشیلر اوزونو گؤرموشدو، ماشین توتموشدو، باشی گیجلیردی، اورگی بولانیردی، یورغونلوق حس ائدیردی و یاشاماق اوچون هئچ هوسی قالمامامیشدی.  او ایل  قیش چوخ سویوق کئچدی چوخ دا قار یاغیردی. هر یئر قار بوز ایدی. نه یاخچی کی کوچه ده بوز اوستونده زوومک گون اورتا تعطیلینده  ائوده اوتوروب آبانین آه و ناله سینی ائشیتمکدن نجات وئریردی منی. آخشام ساعات دؤردده مدرسه دن قاییتدیقدان سونرا ایسه آبا، "بالا گل کورسوموزون مانقالینی قویوم حیطده سن اودوموزو یاندیر. من ده شامیمیزی پیشیریم دئییردی. آخشام گون باتانا ساری اود یاندیرماغین چوخ کئفی وار ایدی. حؤصله ایله مانقالین کولونو کفگیر ایله مانقالین اطرافیندا دووار کیمی قالاردیم. اورتاسینا اؤنجه بیر خاکآنداز خاکا تؤکردیم، سونرا ایسه خاکانین اوستونده مؤوره، یاخود چیرپی ایله اود یاندیراردیم. . اود یانیب قورتولانا قدر آلتینداکی خاکا قیزاراردی. اوندان سونرا مانقالین قیرقلارینین کولونو یاواشجا اودون اوستونه چکردیم.

تازا قیزمیش کورسوده یورغا نین آلتینا گیریب، خیاللاریما دالماغین دا آیری بیر دادی وار ایدی.  خیاللاریمدا قاناد آچار اوچاردیم. شکیللرده گؤردوگوم قانادلی ملائکه لر کیمی اوچوب  گؤیون ماویلیگینده توفارقانا یوخاریدان باخاردیم. گؤی اوزونده اؤزومه تای قانادلی، باشیندا بنؤشه گوللریندن هؤرولموش تاجی اولان بیر قیز ملائکه تاپاردیم.  قیز ملائکه یولداشیم ایله بیرلیکده گؤی اوزونون ماویلیگینده اوچوب گؤزدن ایتردیک. آغ بولوتلارین بوروقلااریندا، آلچاق اوجاسیندا گیزلنپاچ اویناردیق. گونون سون ایشغی قبله داغینین زیروه سیندکی قاری قیزیل رنگینه چئویردیگینده، قیز ملائکه یولداشیم ایله بیرلیکده ایکی گؤگرچین کیمی قبله داغینین زیروه سینه قونوب، اود یاندیریب، دوروب اودون حرارتینین لذتی ایله بیرلیکده گونشین سون ایشیغینی امَردیک.

آقا ائوه گیردیگینده ائوده کی آغیر سوسغونلوغون باشملاماسی ایله بیرلیکده خیاللاریمدان آییرلاریدیم. ائوین آغیر هاواسی آلتیندا، دریمین یئنه اوستومده گوبوت و آغیر بیر چوال کیمی بدنیمی سسیخدیغینی حس ائتمه یه باشلاردیم.  سوسغونلوق ایچینده شامیمیزی یئدیکدن سونرا آقا اوزونو منه توتوب، "اوغول او عم جزوو گتیر گؤروم دونن اؤیگرتدیگیم  سوره نی اؤیگرنیبسن؟" دئیه  اوتوردوغو مسیبده دالسینداکی تاقچادان قرانینی ائندیریب قاباغینا آچاردی.

تلفضونو و آنلامینی بیلمه دیگیم سؤزلری اوخوماغا چالیشدیغیمدا، هر کلمه سینده اوچ دؤرد یول آقا عصبانی بیر لحن ایله، "اوغول دوز اوخو، گؤرمورسن مگر عینین اوستونده فقحه وار. اوغول دیققت ایله باخ، ب نین اوستونده ضمه وار. اوغول بارماغیوی سورتمه قرانین یازیسینا، خلفه چین ایله گؤستر. اوغول، سینین اوستونده کی او تشدیدی گؤرمورسن؟" دئیه غضبلنردی. اوچونجو دؤردونجو سؤزه یئتیشینجه بوغازیم بیچیلمه گه باشلاردی. "ایسته میرم، اوخومورام آرتیق" دئیه عم جزوو الیمده آچیق شکلینده قارشیمداکی دووارا چیرپماق ایستردیم. عم جوزون دووارا دَیگدگینده کلمه لرین کاغاذدان آییریلیب، دووارین اوستونه چیرپیلمیش جوهر کیمی پارچالانیب، یاییلاجاغینی تجسم ائدردیم. دوواردا پارچالانیب یاییلان جوهره اشاره ائدرک، "هانی فتحه؟ هانسی تشدید؟ او ضممه نی گؤستر گؤروم!" دئیه وار گوجوم ایله آقانین باشینا چیغیرماق ایستردیم. آنجاق آقا منیم ایچیمده کئچنی حس ائتمدیگی کیمی هر سؤزو زیر- زبر، فتحه - ضممه سی ایله، حمزه سی ایله بیرلیکده دوغرو اوخوماغیم گرکدیگینده اصرار ائدردی. آلتینجی یئددینجی کلمه یه یئتیشینجه گؤزوم یاشاراردی، بوغازیم قیفیللاناردی. بوغازیمدان سس چیخمازدی. آنجاق آقا بو یول دا بیر سونراکی کلمه نی اوخوماغیمی گؤزلردی. آرادا بیر "اوغول اوخو آخی" دئیَردی. گؤز یاشیم داملاییب عم جزوون صفحه سینی ایسلاتدیغیندا ایسه آقا، "آهان باخ، جهمین قورخوسوندان آغلاییرسان، اوخو، اوخو، آلله جهمین عذابیندان حفظ ائله سین." دئییردی. آبادان آلدیغی انتقامدان دویمامیش کیمی بو یول دا، بو شکیلده منی شکنجه ائتمگه اوز توتموشدو. بو شکنجه سونراکی ایللرده عَمّ یَتَسَاءَلُونَ دان کئچیب، یُسَبّحُ لله مَا فِی السَّمَاوَات، و  إِذَا وَقَعَتِ الوَاقِعَةُ ، و قرانین سونونا قدر اوزاناجاق ایدی.

قیشین سونلارینا یاخین آقا ایله آبا مکه یه گئتدیلر. بو اوچ هفته نی من داییم گیلده قالدیم. دایی گیلده ائوین هاواسی بیر آیری جور ایدی. هاوا داها راحاتجا آخیردی بورنومدان جیگرلریمه، باش آغریلاریم آزالمیشدی، رنگلر داها پارلاق و جانلی ایدی. یئمکلرین لذتی دویولماز ایدی. سو ایچمک بئله لذتلی ایدی. دریم یاغلی و یوموشاق بیر اؤرتو کیمی منی قوجاقلاییردی. اؤنجه کیلر کیمی کیچیک - کیچیک قابارلار ووروب قاشینمیردی. رادیو هر زامان آچیق ایدی. موسیقی دینلمک اوچون گیزلینجه رادیونون سسینی قیسیب، قولاغیمی رادیو یا دایاماغا گرک یوخ ایدی. رادیو تاقجادا اوجا سس ایله دانیشیر و یا ترانه پخش ائیدردی. موسیقی سسی ائوین هر یئریندن قولاغا گلدیگی ائوچون آیری بیر لذت وئریردی. مدرسه ده اوشاقلارین سس کوو میخ کیمی بئینیمه باتمیردی آرتیق. معلمدن اؤنجه کیلر کیمی قورخموردوم. معلم بیر شئی سوروشاندا بیلدیکلریمین هامیسی یادیمدان چیخمیردی. گون اورتاچاغی مدرسه دن گلدیگیمده ائوده یئمک پیشیریلیب، سفره آچیلمیشدی. آقادایی نین آروادی و ایکی اوغلو،  بیر قیزی ایله بیرلیکده سفره باشینا اوتوراردیق. رادیونون ملاییمجه یایدیغی موزیک یوخسا صحبتی دینله یرک ناهارمیزی یئییردیک.  آخشاملاری آغیر سوسغونلوق ایچینده یئییلن شامدان سونرا عَمّ یَتَسَاءَلُونَ شکنجه سی باشلامیردی. اونون یئرینه حؤصله ایله مدرسه تکلیفلریمی یازارکن میدادین الیمده یاغ کیمی آخماسی خوشوما گلردی. تکلیفلریمی یازدیقدان سونرا آقادایی نین اوشاقلاری ایله کورسونون اوستونده آرخایینجا کیربیت چؤپو اویناییردیق.  گئجه یاتاندا  قیرمیزی ایشقلی گئجه چیراغی نین مولاییم ایشیغی آلتیندا گؤزلریمی یوممادان سقفه باخاراق خیاللاریمدا درینلشردیم: "انشا الله آقا ایله آبا هئچ واقت مکه دن قاییتمازلار، همیشه لیک آقادایی گیلده قلارام" دئیه خیال ائدردیم

آنجاق بو شیرین یاشام و اونلا بیرلیکده شیرین خیالاریم چوخ تئز سونا چاتدی. اوچ هفته سونرا  آقا ایله آبا مکه دن قاییتدیلار.  من ده آقادایی گیلدن ائویمیزه قاییتماق زوروندا ایدیم.  بیر نئچه گئجه کیچیک - بؤیوک  قوناقلیقلار وئریلدی. ائوه چوخ گلیب گئدن اولدو. آبانین مکه دن گتیردیگی خاطره لری چوخ آز وچوخ قیسسا ایدی. چارشابا بورونوب گئتمیشدی. گؤمروکدن کئچنده قورخا قورخا، تر باسا باسا اوزونو آچمیشدی و  یاندیران گونشین آلتیندا، بوغوناق ایستدی ده قالمیشدی.  بیر خئیلک جماعاتین ایچینده، باسا باسدا قورخا قورخا کعبه نین باشینا طواف ائتمیشدی. بوندان آرتیق بیر خاطره سی یوخ ایدی. بو حج سفرینده گؤردوگو ان جالب خاطره،  ساچلاری فیر، بورونلاری یاستی، دوداقلاری شیشمیش قارا رنگلی آروادلار ایدی. بونلاری دا "بلکه بونلار امام حسینه شماتت ائله ینلردیرلر، آلله ووروب قارالدیب" دئیه آنلامیشدی. بو آروادلاری ایلک گؤردوگونده چوخ قورخومشدو. آقادان، "بو قارا آداملار امام حسینه شماتت ائدنلردیرلر می؟" دئیه سوروشموشدو. آقا دا "یوخ، عمی قیزی، اونلاردا بیزیم کیمی مسلماندیرلار، گون قاباغیندا چوخ قالدیقلاری اوچون دریلری قارادیر." دئمیشدی.  بیر نئچه هفته دن سونرا یاواش یاواش هر شئی معمولی حالینه دؤنوشدو. گلیب گئدنلرین آیاغی چکیلدی. ائو خلوتلشدی و  آبانین  باغیشلانمازلیق قورخولاری تازادان باشلادی.  آبانین تازادان باشلایان قورخولارینین، بو یول آیری بیر رنگی و آیری بیر نئجه لیگی (کیفیتی) وار ایدی. مکه یه گئدیب قاییتدیقدان سونرا آبا آرتیق بوتون آرزولارینا یئتیشدیگینه و قالان تک آرزوسو ایسه راحات اؤلمک اولدوغونا اینانیردی.  بیر حمد اوچ قول هوالله لی نامازلارینی قورتاردیقدان سونرا "آالله منی عمی اوغلودان تئز اؤلدور"، الله منی تئز اولدور، الله منی راحات اؤلدور" دئیه آغلادیغینی هرگون و هر گئجه گؤرمک منیم اوچون آرتیق داریخدیریجی بیر عادت اولموشدو. دریم یئنه گوبوت بیر چووال کیمی اوستومه آغیرلیق ائدیردی، کیچیک کیچیک قابارلار چالیب قاشینیردی، قاشیدیغیمدا ایسه کیچیک قابارلاردان سو چیخیردی، یئری یارا اولوردو. مدرسه ده اوشاقلارین سسی اؤنجه کیندن ده داها اینجیدیجی بیر شکیلده میخ کیمی بئینیمه باتیردی. معلمی گؤرنده قورخودان الیم آیاغیم اسمگه باشلاییردی. آخشام مدرسه دن گلینجه کیتاب دفتریمی هارا قویدوغومو اونودوردوم. آنجاق گئجه یاتانا یاخین، "ای وای، تکلیفریمی یازمامیشام." دئیه قورخولارا توتولدوغومدا آغلایا آغلایا کیتاب دفتریمی آخاداریردیم. تر- تلسیک، قورخولار ایچینده تکلیفلریمی یازماغا چالیشارکن بارماقلاریم اودون کیمی قورویوردو، تئز - تئز میدادین اوجو سینیردی. و ائرته سی گون کیلاسدا " الله معلم مندن درس سوروشماسین" دئیه، بیر حمد اوچ قل هو الله اوخویوردوم.

*********************************************

گونلر، هفته لر، آیلار، ایللر سووشدو. هر شئی دگیشدی، آنجاق آبانین "آلله منی عمی اوغلودان تئز اولدور" آرزوسو و ساعاتلارجا ناماز قیلیب، نامازدان سونرا آلله دان ایستدیگی  و ان درین آرزوسونون تکراری ایله آغلاماسیندا بیر دگیشیکلیک اولمادی.

اون ایل سونراسی، فروردین آیینین یئددینجی گونو آخشام ساعات اون بیر یاریمدا تبریز واغزالیندان آنکارا مقصدینه قاطارا مینجک ایدیم. آرتیق بؤیوموشدوم. بو آرادا درس اوخوتدورولموش و دیپلم آلدیتدیریلمیشدیم. دئملی اؤزوم اؤز ایستگیم ایله درس اوخومامیشدیم و اؤز ایستگیم ایله دیپلم آلمامیشدیم، ترسینه آتامین و قارداشلاریمین زور و اجباری آلتیندا بو ایشلری گؤرموشدوم. اؤزومه قالسا ایدی، کامیونچو، یوخسا اکینچی اولماق ایسته ییردیم. نه ایسه بونلاردان سونرا بو یول دا درس اوخوتدورولماق اوچون تورکیه یه گؤندریلمکده ایدیم. واغزالدا دبیریستان یولادشلاریمدان بیریسینه توش گلدیم. آنجاق او منیم کیمی یالنیز دگیل ایدی. اون - اون بئش نفر، جوانلی قوجالی کیشی، آرواد، اوشاق ایله بیرلیکده دئییب گولرک واغزالدا گزیردیلر.

- سلام سعید، نه وار نه یوخ، سن ده تورکیه یه گئدیرسن؟

- من آنکارادا، دانشگاه خاورمیانه ده مهندسی برق اوخویورام. بایرام اوچون تعطیله گلمیشدیم.

- خانواده لیکجه گئدیرسوز؟

- یوخ جانیم، بونلار فامئللریم دیرلر، منی یولا سالماغا گلیبلر.

"بیر نفری یولا سالماق اوچون ایگیرمی - اوتوز نفر ده آدام گلر؟" دئیه فیکیرلشرک تعجب ائله دیم.  سعید سؤزونون دالیسینی توتدو، "رستوران خیامی بو آخشام دربست کیرالامیشدیق، فامللرین هامیسی قوناق ایدی. یئرین بوش، چوخ گؤزل بیر آخشام ایدی." اؤزو- اؤزومه تعجبلنرک، "نمنه؟ رستوران خیامی دربست کیرالامیشدیق؟، ائیی ها...!" دئیه داهادا تعجبلندیم. بیزیم خانواده فرهنگینده بئله شئیلر یوخ ایدی. بیر اؤنجه کی گون آبا ائوده یئنه یالنیز باشینا نامازلارینی قیلیب، اؤلوم آرزوسو اوچون  آغلایاراق آلله آ یالوارمیشدی. اوگون سحر ایسه آقا قاینالتی سفره سینده اوزونو منه توتوب، "اوغول، باخ، قوربته گئدیرسن، ایکی سؤز تاپیشیریرام سنه، بونلارا یاخچی دیققت ائله، بیرینجیسی هئچ واقت آلله ی یادوندان چیخارتما، نامازوو قضایا وئرمه. الله بویورور کی "ان السلات تنها من المنکر."، دئملی انسانی پیس یولدان، منکردن قورویان بیر تک نامازدیر. ایکینجیسی ایسه، ناباب ایله اوتورورب دورما. ناباب یولداش انسانی یولدان چیخاردار، معصیته چکر. دیققت ائله نه دئییرم. معصیت باتلاق کیمی دیر. بیر یول دوشدونسه بیر داها چیخابیلمزسن، ائشیتدین؟" دئمیشدی. آقانین بیلدیگی، بلکه ده اؤزوندن چیخارتدیغی، بیر پارا آیه لر وار ایدی. بو آیه لری عؤمرومده آقادان باشقا آیری بیر آدامدان ائشیتمه میشم. اوخودوغوم و بیلدیگیم قدر،  قرانین هئچ بیر یئرینده ده بو آیه لری گؤرمه میشم. قرانین گلجگی گؤردوگونو وورغولاماق اوچون، (تاکید ائتمک اوچون) چوخ تکرار ائله دیگی بیر آیه ده "اذا رکب الحدید بالحدید، فقرب البعید" ایدی. "اوغول آلله قرانیندا بویوروکی، دمیر دمیره میننده، اوزاقلار یاخینلاشار، بو دا همان قاطاردیر. قاطار دمیردیر، قاطار یولو دا دمیردیر" دئیردی. بو آیه نین آتامین اؤزونه وحی اولدوغونا اینانیرام. بیلمیرم، بلکه "ان السلات تنها من المنکر" ده اؤزونه وحی اولان آیه لردن ایدی.  او گون ایسه آقا ان اؤنملی سایدیغی ایکی سؤزونو منه تاکید ایله  تاپیشیریب، قاینالتیدان سونراهرگونکو کیمی ائودن چیخارکن، "اوغول، تازا چمدان آلماغا گرک یوخدور، وساییلوو ییغ بیزیم او چمدانلارین بیریسینه، گؤتور گئت." دئییب، قاپیدان چیخمیشدی. "بیزیم او چمدانلارین بیریسی" دئدیگی مکه سفریندن قاییدان ایکی چمداندان بیری ایدی. قهوه رنگی کارتوندان ایکی چمدان ایدیلر، کول رنگلی، دئملی کیچیک آغ و قارا لکه لردن اولوشان بیر رنگده کؤینکلری ده وار ایدی. چمدانلارین اوستونده اولدوغو کیمی، کول رنگلی کؤینکلرینین اوستونده ده آغ رنگده یاغلی بویا ایله "کاروان حجّ سیّد عربی" دئیه یازیلمیشدی. بو ایکی چمدان و اوستلرینده کی یازی قارا گونلریمین، ائوده یالنیز آغیر سوسغونلوق و آه و ناله یاشادیغیم گونلرین سمبولو ایدی. آنجاق زامانین کئچیشی هر شئیین اوستونو باستیریر. هر شئی اونودولوب، بیلینجدن چیخسادا بیلینج آلتیندا ایزلری قالیر. بو ایزلر یاشامین اوندان سونراکی بؤلومونده انسانین آلین یازیسینی بَلیرلیَن اِنگراملار اولور. انسان ایستگینین، اراده سینین خاریجینده بو انگراملار طرفیندن یؤنَلتیلیر.  

گون اورتادان سونرا وساییلیمی او چمدانلارین بیرسینین ایچینه دولدوروب، تبریزه گلمیشدیم. ائودن چیخارکن آبا بیر الینده قران، بیر الینده ده بیر چاناق سو ایله قاپیا قدر گلیب، قرانی باشیمین اوستونه توتددوقدان سونر چاناقداکی سویو دالیمجا یئره سپمدن، یالواراراق، "بالا قوربته گئدیرسن، نامازوو قضایا وئرمه، نامحرمه باخما، نه اولار" دئمیشدی.

سعید بیر، یانیمدا یئره قویدوغوم چمدانا، بیر ده یانینداکی ال چانتاما باخدی، بیرده منی "بونا باخ!" دئییر کیمی بیر باخیش ایله باشدان آیاغا سوزدو، درینیندن بیر "پیق - پیق" چیخدی، گولمگینی مندن گیزلتمک اوچون تلسیکجه، "ایندی گلرم" دئییب دؤنوب فامللرینه ساری گئتدی. چمدانیمین یانیندا بیر نئچه آددیم ساغا، بیر نئچه آددیم سولا وار -  گل ائتمه گه باشلادیم. ساعات اون ایکی یاریمی کئچیردی. ساعات اون بیر یاریمدا گلجک اولان قاطار یولدا یوبانمیشدی. دئیلنلره گؤره ساعات ایکی  - ایکی یاریمدا یئتیشجک ایدی.  سعیدین باشی فامللری ایله دئییب دانیشیب گولمه گه قاریشمیشدی. آرادا بیر باخیشلارینی گیزلتمگه چالیشاراق، دؤنوب منه ساری باخیب، اؤز آرالاریندا پیققیلدایا پیققیلدایا گولدوکلرینی گؤروردوم. "آی آلله بونلار منیم نه ییمه گولورلر؟" دئیه فیکیرلشمه گه باشلادیم. آنجاق اؤزومده غیرعاددی بیر شئی تاپابیلمدیم. یالنیزلیقدان باغریم چاتلاییردی. بئله بیر آخشامدا، دئملی عؤمرومده بیرینجی یول خانواده دن آییریلیب اوزون دؤنملی قوربته گئتدجگیم زامان، قاطار انتظاریندا قالماق دا اوسته لمه بیر سیخینتی ایدی. آخشام تبریزده داوود داداش گیلده شام یئدیکدن سونرا، داوود داداش خیریم  - خیردا، بیر شئیلر وئرمیشدی، ساققال قیرخماق اوچون گرکن تیغه، اودکولون، کرم، بیر حوله، صابون قابی کیمی شئیلر ایله بیر آزدا داوا، قرص، کپسول. چمدانیمدا یئر اولمادیغی اوچون، "دور من سنه اؤزومون کیفیمی وئریم. من سحر آیریسینی آلارام." دئیه او زامانلار دوقتورلارین معاینه وساییلینی ایچینه قویدوقلاری کیفینی بوشالدیب منه وئرمیشدی. قاطارین گلمک ساعاتینا یاریم ساعات قالاندا داوودون آغ پیکانی ایله قوت میدانیندان واغزالا سورموشدوک. قاطارین یوباندیغینین و نه زامان گلجگینین بیلینمه دیگینین خبرینی آلدیغیمیزدا، "داوود داداش، سن گؤزلمه، گئت، سحر ایشه گئدجکسن." دئیه ساعات اون ایکی ده یالوار - یاخار ایله ائوه گئتمه سی اوچون راضیلاشدیرمیشدیم.

قاطارا مینیب، بلیطیمده کی نومره لره گؤره واگونومو، کوپه می تاپیب، کوپه یه گیردیم. ساغداکی یوخاری تختده بیر نفر یاتمیشدی. سولداکی آشاغی تختین اوستونده ایکی نفر جوان اوغلان قارشی قارشی یا اوتورموش، ورق اوینایردیلار. ایچری گیرینجه جوان اوغلانلارین بیری، بیر منه باخدی، بیر الیمده کی چمدانا، یولداشینا گؤز ووراراق، "حاجی آقا اشتباه سوار شدین!" دئدی. بیلیطیمین اوستونده کی نومره لره بیر داها باخدیم.، باشیمی چؤوروب، کوپه نین قاپسینین یانینداکی کیچیک تابلوداکی نومره لر ایله قارشیلاشدیردیم. او زامانکی غلیظ تورکو لهجم ایله، "آقا مگر اینجا واگن نومره چاهار، کوپه نومره دوازده نیست؟" دئیه سوروشدوم. جوانلارین ایکیسی ده بیری - بیریلرینه باخاراق گولوشدولر. ایکینجی اوغلان، "نه حاجی آقا، قطارو اشتباه سوار شدین." دئدی. "مگر این قطار به تورکیه نمی رود؟" دئیه سوروشدوم. جوانلارین ایکیسی ده گولوشدولر. "اؤزو اؤزومه، "بو گئده لرین میرتینین باشی یاریمدیر" دئیه اونلاری اؤنمسه مه مگه چالیشاراق چامادانیمی قاوزاییب چامادان رفینه قویوب، کوپه دن چیخیب، قاپینین آغزیندا یئره قویدوغوم ال چانتامی ایچری گتیردیم. جوانلار الیمده کی چانتانی گؤرونجه قاققا باسیب گولدولر. بیریسی گولمکدن یان یانا یاتیردی. اوبیریسی یئنه منه اوز توتوب سوروشدو، "آقای دکتر، شما واقعاً ترکیه میرین؟" بو یول آرتیق عصبانی اولماغیمین قاباغینی آلابیلمدیم. بیر آز دا اوجا سس ایله، "آقا به تو اصلا چه مربوط است من به کجا میروم آخه." دئدیم. اوغلانلار اؤزو اؤزلرینه گوله گوله وراق اویونلارینا دوام ائتدیلر. بیر نئجه ساعات سونرا گؤمروکدن کئچدیک. یورغونلوقدان آرتیق دورابیلمیردیم. بوش اولان تختین اوستونده اوزانیب یوخلادیم.

اویاندیغیمدا گون اورتادان سونرا ساعات اوچه یاخین ایدی. اویانیب تختین اوستونده اوتوروب، گؤزلریمی اوغوشدوراراق یوخولولوغون و یورغونلوغون کاللیغیندان بیر آز آییلیب، قالخیب  گئدیب قاطارین توالاتینده الیمی اوزومو یودوقودان سونرا کوپه یه گئری گلدیگیمده، کوپه نین قاپیسین ائشیک طرفینه یاپیشدیریلمیش بیر کاریکاتور دیقتیمی چکدی. کاریکاتوردا کؤهنه، ییخیق، بیر قاتلی بیر ساختمانین کؤهنه و جیریق جیریق قاپیسینین اوستونده "مطب دکتر سیّد عربی" دئیه یازیلمیشدی.

"الله چوخ شوکور، اونیورسیته یه گئتمگه، درس فیلان اوخوماغا گرک قالمادی آرتیق. الحمدلالله، تورکیه یه گیردیگیم ایلک گونومده دوقتورلوق مدرکیمی آلدیم" دئیه سئویندیم.

کؤلن، نوامبر 2017