آذوح: تورک ایشچی حاقلاری فعالی، محمد جراحی نین دفن توره نینده آذربایجان میللی فعاللاری و بیر سیرا ایشچی حرکتینه منسوب اولان فعاللار آراسیندا دارتیشمالار اولموشدور.

حورمتلی حبیب حنیفلی بئی بو اولایلاری قلمه آلمیشدیرلار. اولایلارین بیر بولومونو آشاغیداکی ویدیولاردان باخابیلیرسیز:

https://www.facebook.com/AZOHqrupu/videos/1392361527484431/

https://youtu.be/ctqvKQv-nYE

یازی نی آینی اولدوغو کیمی پایلاشیریق:

"زحمتکشلر و ایشچیلر صینفی نین حق لرینی مدافعه چیسی اولان رحمتلی "محمد جراحی" بیر عؤمور زحمتله چالیشدی. اؤز اینام و اینانجینین اوزه رینده دایاندی و بو یولدا دا چوخلو چتینلیکلرله ده اوزله شدی و عؤمرونون 5 ایلینده تبریز مرکزی تورمه سینده کئچیردی. اؤتن ایل زینداندان اؤزگورلوغا بوراخیلدی. آمما کانسئر خسته لییی آمان وئرمه دی.

محمد جراحی نین بوندان سونراکی چاغلاری هله بهره لی گونلری واریدی. خلقی نین عشقی ایله چیرپینان اوره ک دایاندی. آمما بونودا اینانیریق کی اینسان بیر ماده دیر تئز و یا گئج بو جسم توپلومو ترک ائدرک آرادان گئده جکدیر. بو عمللر و قویدوغو ایزلر دیر کی, ابدی اولاراق قالاجاقدیر. "محمد جراحی"نین همشه نیک بین عمللری و خاطیره لری دیر کی ایستکلیلری طرفیندن یاشایاجاقدیر.

جمعه گونو 14 مهر آیی 1396 یاییلمیش خبرلره گوره بو ایگیدین تشیع جنازه سی اولمالیدیر. بیر چوخ اینسانلار اؤلکه نین مختلیف یئرلرینده ن گلمیشدیلر.

رحمتلی محمد جراحی نی دفن ائده ن دن سونرا میللی و سول یؤنلو فعال "حسن آغا ارک" دانیشیغا باشلادی: محمد بئی ین پولاد ایراده لیغیندان و فیکریولداشلارینین داها آرتیق یولونون آردینی توتماغیندان دانیشارکن؛ زندان مسئوللارینین بوشلوغوندان و سایمامازلیغیندان دولایی محمدجراحی نین خسته لییی بترله شرک, ایندی هامینی یاسا سالمیش." سنین بوتون فیکرداشلارین ایندی بورایا ییغیشیب لار, سن سفره لی کیشی و همشه قوناق سئوه ر اولموسان "سویله دی و دانیشیغینا سون قویدو.  –

سونرا قرار وئریلدی "شاهرخ زمانی"نین مزاری اوسته گئدیلسین.

بورادا دانیشیقلار بوتون فارسجا گئدیردی, اینسانلارین تکجه نجات یولو سوسیالیزم دیر, سویله ندی. زیندانلار ایشکنجه لر هئچ ایراده میزه تزلزل یارادا بیلمز شعارینی سویله دیلر.

بونلاردان سونرا آذربایجانین قوجامان موسیقی خادیمی و میللی حرکتین آغ ساققلاریندان بیری اولان تانینمیش اوستاد "حسن آغا دمیرچی" تورکجه دانیشیغا باشلادی؛ "آذربایجانیمیزدا بویوک قهرمانلاریمیز آز اولماییب دیر و هامیسیدا ایستر طبقاتی و ایسترسه میللی ملت آزادلیغی یولوندا چالیشیبلار. آمما ایندی آذربایجان اؤزونه حق طلب ائدیر. بو یولدا چوخ اینسانلاریمیز اولوبدو شهیدلر اولموش,زندانلار دا اولوبلار و.... 

بورادا تهراندان گلمیش ایشچیلر و سوسیالیست فعال "جعفر عظیمزاده" دوزه بیلمه ییب اوستادین سؤزون کسه رک , سؤزه باشلادی؛" بونلار برابرلیغا آزادلیغا چالیشیبلار.آقای جراحی بیردانا کارگر ایدی, 5ایل زینداندا قالدی فقط بونا خاطیر کی, کارگر بیر اینسان کیمی یاشاسین. بیزه فرقی یوخدو آذربایجانلی- لور - فارسدا هامیمیز کارگرییق ,آقای جراحی نین باخیشی بوایدی. بیز کارگرلرین میللییتی یوخدو, تمامی دونیادا کارگرلر بیر طبقه دییک."

حسن آغا دمیرچی گوزلدی بو جنابین سؤزلری سونا چاتاندان سونرا دئدیلر؛ " آذربایجاندا اینقلابلار آز اولماییب آمما آخر منافع او, بیریلرینه چاتمیش صحبت بوندان کئچیر".

سونرا سول یونلو و اجتماعی فعال تبریزلی احمد آغا دئدیلر؛" عدالت اجتماعی یه چالیشماق آذربایجانین یوخ بوتون میللتلرین میللی ایستکلریندن هئچ زامان آیری اولماییب دیر. شاهرخ زمانی و محمد جراحی کارگرلرین حقلرینی دیله ییبلر.آمما بو کی, دئییلسین کی, بونلار  آذربایجانلی دئییل لر  ویا آذربایجان اوچون چالیشماییبلار بونلارین حاققلاریندا ظلم دور.محمد جراحی هم عدالت اجتماعی و همده آذربایجانین میللی مسئله سینه باغلی دیرو هئچ زامان آیری اولماییبلار. هر کس ایسته ییب میللی ایستکلری ,عدالت اجتماعی دن آیری بیلسین نهایتده دیکتاتورلوغا سوق وئریلیب دیر ".

بو آندا اوستاد حسن آغا دمیرچی آذربایجان میللی مارشینی باشلادی، اورداکی لاردا سس -سسه وئره رک مارشی اوخوماغا باشلادیلار. آمما تاسفله جعفر آغا عظیم زاده و یانداشلار بو حین ده سایغیسیزلیق ائدرک، او مکانی ترک ائتدیلر. بیرداها "محمد جراحی " مزاری اوستونه گئتدیلر. اورادا بیر نئچه نفرله انترناسیونالیزم سرودند اوخودولار.

بورادا اوزومو توتورام، جناب جعفر آغا عظیم زاده و فیکرداشلارینا و بیر نئچه سورغوم وار:

1- سیز نئجه "انترناسیونال سرود" ون اوخویورسونوز و میللت لر حقلریندن سوز آچیرسینیز، بیر حالداکی، آذربایجان میللی مارشی اوخوناندا دوره بیلمه ییب و سایغیسیزلیق ائدرک صحنه نی ترک ائدیرسینیز؟ اولمایا سیزین نظرینیزجه  آذربایجان میللتی دونیا میللتلریندن آیری دیر و هئچ بیر میللی حقی یوخدور؟

2-سیز دئییرسینیز:" بیز کارگرییق ،طبقاتی مبارزه آپاریریق، آمما نییه کارگرلرین اوز آنا دیلینده یازا بیلمه اوچون هئچ سوز آپارماییرسینیز.اولا بیلسین کی، دئییه سینیز ؛ اگر سوسیالیسم قورولورسا تماما میللی مسئله حل اولوناجاق. نئجه کی 1357 نجی ایلده بو سوزلر دئییلیردی. آمما1369نجو ایلده شورالار اولکه سی داغیلاندان سونرا گوروندو کی، عملده هئچده دئیله نر کیمی دئییلدی.

یازیمی" لنین" نین - ملی سیاست و پرولتارییا بین الملل چیلیگی مسئله لری"کیتابینین بیر پاراگراف ایله سونا چاتدیریرام.

"کیم ملتلرین و دیللرین حقوق برابرلییینی قبول و مدافعه ائتمه ییرسه،هر جور میللی ضولمه ویا حقوق برابر سیزلیگینه قارشی مبارزه ائتمیرسه، او، مارکسیست دئییل. او،حتا دئموکرات دئییل ".

حبیب حنیفلی