آنا دیلینده ائیتیم حاقدا یازیر دانیشاندا، چاغیمیزی نظره آلا‌راق، فرق‌لی دویغولار بیر آندا یاشانیر. بیر یاندا اینسانین بلکی ان اساس، آیریلماز، دانیلماز، آلینماز حاققی چیخیر گؤز اؤنونه و اؤبور یاندا، بو حاققی هئچه ساییر، کوچومسه ییر، سوچ بیله ن بیر دؤولت دورور. نئجه ایلگینج ایکی‌لیک واردیر اورتادا! افغانیستان کیمی ساواش ایچینده ییل‌لار بویو یاتان دؤولت بو حاققی اونوتماییر قورویان حالدا، بیز اولموشوق ایران رئژیمیله ال به یاخا، “سیز الله ان آزی بو حاقدا دانیشماغی بئله سوچ بیلمه یین” دئییریک! دورومون وهیملیغی یازییی قارا کومئدی یه سوروکله‌سه‌ده، گرچک بوقدر آجی قارا‌دیر. یاشادیغیمیز توپ‌راق‌لاردا، اونا جان قوربان وطنیمیز گونئی آذربایجاندا، آنا دیلینده ائیتیم آلماق حاققین‌دان مهروم قالیر، حاققیمیزی ایسته سک توتساغیق.

ایران رئژیمی گئنلده قئیری فارس میللت‌لری و آلتینی جیزا‌راق، اؤزل‌لیکله، تورک‌لری بو آنا دوغما حاق‌دان اوزاق ساخلاماسی بیله‌رک‌دیر، قطعیین بیله‌رک‌دیر. بو مساله یی چوخ راحت دئییر اوستون‌دن کئچمملیگیک. گونئی آذربایجان آزادلیق ساواشی‌نین ان اساس پایالاریندان‌ بیری‌سی بو حاققی ایران رئژیمین‌دن آلماق‌دیرسا، ایرانین توتومونو دوغرو تحلیل ائتمه‌دن بیلمه‌دن یولا چیخماق اولماز. “رئژیم یئتگی‌لی‌لری سورونون نه قدر جیددی اولدوغونو بیلمه ییرلر، خبرسیزدیرلر، ایسته ییمیزی چاتتیرارساق قوللوق‌لارینا، کسین بیزه یاردیم ائدیر حاقیمیزی وئره‌جک‌لر” دئیه ن‌لرده آز دئییل‌دیر آرامیزدا. دئمه‌لی، ایران دؤولتچی‌لری 39 ایل اؤنجه اؤز یازدیقا‌لاری آنا یاسایی “بیلمه‌یه‌رک” اونوتموش، یادلارینا گتیریرسک هر یئر گولوستان اولاجاقمیش! اؤزونو یوخویا وورانی اویادماق اولمورسا حاققیمیزی بیله‌رک‌دن آلانیدا یالواریر، خواهیشله دیزه گتیرمک اولماز. بو رئژیم بیر چوخوموزدان داها یاخچی بیلیر آنا دیلین قیمتینی، بیلمزدیرسه شاهنامه نی باش کیتاب فارسجانی بیر و سون دیل ائتمزدی. تورکجه اوشاق آدی آلماغی بئله یاساقلایان سیستئم، بیر چوخوموزدان چوخ یاخچی بیلیر هر میللتین آنا دیلی، او میللتین چیرپینان یورگی وارلیغینی بیل‌دیرن سیمگه‌سی‌دیر.

یوخاریدا قئید اولور توخونولان مسئله، بو سورویا باغ‌لانیر: سن حاققینی ایسته ییرسن می یوخسا “حاققینی آلماق”می ایسته ییرسن؟ ایرانین “بیلمه‌یه‌رک” یالنیش یاپماغینا اینانیریقسا، چیخیش یولوموز دا اولا‌جاق‌دیر حاققیمیزی ساده‌جه “ایستمک” و او حاققی آلماق اوچون جیددی بیر ایشه ال آتمایاراق، بکله مه ک. سن ائوینده اوتورور حاققینی ایسترسن، او دا نئچه زامان سونرا سهوینی باشا دوشور سنین حاققینی سئوه‌رک وئریر. بونا هانسی پالتاری گئیین‌دیرسه‌لرده، آدی “ایسلاهاتچی‌لیق”، ایران هوکومتی‌نین صمیمیتینه اینانماق‌دیر. 100 ایلدن بری هر ایکی دؤولت طرفین‌دن (پهلوی-ایسلام) ایراندا قئیری فارس میللت‌لر آنا دیلینده ائیتیم حاققین‌دان “پلان‌لی شکیلده” پای‌سیز قالیب‌لار. بو گرچه‌یه اینانمایان یالنیز اؤزونو یوخویا وورور، یاخود چیخاری بو سیستئمین بو شکیلده یورودولمه‌سینده اولان بیری‌سی‌دیر. فارس شووئنیزمیله قارشی قارشییا چیخاندا، “حاققینی ایستمک” یئترلی دئییل‌دیر. بیز “حاققیمیزی آلماق” ایسته ییریک. بو حالدا، سنین قارشیندا اولان سیستئم نه ائدیرسه ائتسین، هانسی یالان ودلر وئریرسه وئرسین، سن آلدانمازسان. سن اونون یالانچی اولدوغونو بیلیر، حاق‌لارینی آلماق اوچون سونونا قدر گئده‌جکسن. بودور حاقی آلماق، بودور ایراندا حاقی ایستمگین گرچک یولو. بونو اونوتماماق گرکیر، چالینمیش حاقی کیمسه‌یه گئری وئرمزلر، ساواشیر آلما‌لیسان.

گونئی آذربایجان میللی حرکاتی میللتیمیزین چالینمیش حاق‌لارینی ایران رئژیمین‌دن طلب ائتمیر، ایسته میر، تمننا ائتمیر، “آلماق ایسته ییر”. “ایستمک”، قالدی 26 آذر 1325 گونونده. حاققینی “وئرمیرلرسه”، ساواشیر دیرنیر توتساق‌لانیر گوجونو اورتایا قویور قارشی طرفی مجبور ائدیر “آلا‌جاقسان”. یوخسا اومود بسله ییر بیرگون گلیر ایران رئژیمینده بیر ایگیت چیخیر سیستئمی دییشمه‌یه قرارلانیر قئیری فارس میللت‌لرین حاق‌لارینی سئوه‌رک وئره جه یینی بکله ییریکسه، امین اولاق او بالا نی هئچ بیر آنا دوغمویا‌جاق‌دیر گونوموز گون‌دن گونه قارالا‌جاق‌دیر.

اؤز موقددراتیمیزی بلیرلمه حاققینی الده ائتمک، ایستیقلالچی‌لیق، فئدئرالچی‌لیق یاخود باشقا آدلا چالیشان بوتون میللی فعال‌لارین هر قونودا فرق‌لی باخیش‌لاری اولورسادا ان آزی بیر سؤزده بیرگه ییک بیریک، میللتیمیز اؤزگورجه یاشاسین. و بیلیرکده دیلیمیزین یاشاماغی میللتیمیزین واراولماسی دئمک‌دیر. بئله‌لیکله، آنادیلی هامیمیزی بیرلش‌دیرن اساس قونو اولور. فارس شووئنیزمین اساس پایاسی دا ائله بو حاققی قئیری فارس میللت‌لردن چالماق اوستونده قورولموش‌دور. دئمه‌لی، بیزی بیرلش‌دیرن قونو اساسیندا چالیشیریقسا فارس شووئنیزمین اساس پایاسینی دا ییخیریق. نه موتلو بیزه! دوشمان ذاتاً بیزی بیرلشدیرمیش! بیزه دوشه ن، بو ساواشدا تفرروعاتی بوراخیر اؤنجه وطنی دوشونور بیرلیکده یولا چیخماغیمیزدیر.

آنا دیلینده ائیتیم حاققی آیریجا بیزه قئیری فارس میللت‌لرله ده ایش بیرلیک آلانی یارا‌دیر. بوتون قئیری فارس میللت‌لرین آزادلیق حرکت‌لرینده چالیشان بوتون فعال‌لارین اورتاق دردی واردیر، ایرانین 70%نین چالینمیش حاققی، آنا دیلی. مئهر آیین 1، نه قدر اؤنم‌لی اولدوغو داها اورتایا چیخیر. ایراندا یاشایان‌لارین 70% بو گون آنا دیل‌لرینی ائوده بوراخیر، فارسجا پالتار گئییر، فارسجا دوشونمه‌یه باشلاییر. مئهرین بیرینده تورک، عرب، بلوچ و... فرقی یوخ‌دور و او اوچون ده مئهرین بیری، بیرلیکده حاققیمیزی آلماغا باشلاماق گونوده اولابیلر. ایران رئژیمینی مئهرین بیرینده قئیری فارس میللت‌لره قازدیغی قویویا سالماق اولور، بیرلیکده اولوروقسا، هامیمیز اولوروقسا، ایش بیرلیک اولورسا. تسووور ائدین مئهرین بیری گلیب‌دیر و قئیری فارس بؤلگه‌لرده اوخول‌لارین چوخو، یاری‌سی، اصلن توتالیم یوزدن بیری اعتیراض اولا‌راق بوش‌دور. او گونون دالغاسی تکجه ایران دئییل، اورتادوغونو سیلکه‌له‌یه‌جک‌دیر.

سون اولا‌راق، وورغولاماغی گرکن‌لر واردیر آما هامی‌سینی بوش وئریر بیرینه یئنی‌دن دؤنک. بیرلیک!. بیر اولماساق یومروق اولماریق، بیرلیک‌دن گوج دوغار، بیرلیک گؤزل‌دیر و... سلوقان‌لاردان واز کئچک، گرچه یی دئیه ک! بیر اولمازساق، میللی حرکت هئچ یئره وارمییا‌جاق‌دیر و سونوج اعتیباریله هامیمیز گئج تئز مهو اولور سیلینه جه ییک. وطنده گئده‌جک، میللتده ابدی یاتا‌جاق‌دیر. اؤز شخصی چیخارلاریمیزی بئله دوشونوروکسه ده بونون یولو بیرلیک‌دن کئچیر! آنا دیلی حاققی، اؤزگورلوک، ریفاه، یاشام حاققینی بئله آلماق ایسته ییریکسه تک یولوموز بیرلیکده چالیشماق‌دیر. یوبانما‌دان، گئج اولما‌دان بونو باشارمالیییق یوخسا نه بیز قالاریق نه مشد عبادین بیر عابباسی!

گوج، بیرلیکده‌دیر

امیر مردانی

آذوح سؤزجوسو

- این مقاله از نشریه ی "ایره لی" گرفته شده است. برای دانلود نشریه ی "ایره لی" از لینک زیر استفاده نمایید:

https://app.box.com/s/uxz8dvp662hpvfda35eaobl6exn39s6u