“کارگر ساده نیازمندیم” فیلمی و بونا تای فیلیم لر، برنامه‌لر … بیر بؤیوک سناریونون نه یازیق کی بیر پارچاسی حالینا گلمیشدیر. بو سناریو ایللر اؤنجه انگیلیس و استعمار دؤولتلر طرفیندن یازیلیب کارگردانلیغی فارس شوونیزمینین نوماینده‌سی اولان پهلوی عایله‌سینه تاپشیریلمیشدیر.

بو اویونو بیز تورکلر هر نه‌قدرده اوزوموزه گتیرمه‌سکده یا گاهدان اعتراضلار ائتسکده بو سناریو آددیم آددیم ایرل‌لمکده‌دیدی. ائله ۲۹ بهمن ۵۶ قیامینین اصلی نه‌دنلریندن بیریده او زامان ایران تورک میللتینه اولان میللی توهین و تحقیرلر اولموشدو. ۵۷ انقلابیندان سونرا ایراندا اولان میللتلره اومود قاپیسی یئنیدن آچیلمیشدیر. آما ایران عراق ساواشی بو آرزو ایسته‌کلری مالاسف کؤلگه‌ده بیرآخدی. ساواشدان همن سونرا یئنه میللی ایسته‌ک لر دوغرولتوسوندا سسلر قووزانماغا باشلایینجا پهلویلردن قالان تفککورون قالینتیلاری کی انقلابی نیرولار ایچینه نفوذ ائتمیشدیلر یئنه‌ده بو ایسته‌کلری امنیت میللی سورونو حالینا گتیریب، تعریفله‌ییب بو مسئله‌نین چؤزومون قارشیسیندا دایاندیلار.

حال بو کی ایراندا اولان تورک میللتی هم انقلاب دؤورونده هم انقلابدان سونرا ۸ ایل ساواش مئیدانلاریندا اؤز تاریخی گؤرولرین یئرینه گتیرمیشلردیر. بونون اثباتیدا شهیدلر تجللایی، باکری‌لر، شفیع‌زاده‌لر…. و مینلرله شهیدین انقلابا تقدیم ائتمه‌سینده گؤز اؤنونه سرگیلنمه‌کده‌دیر . آما بلکه پهلوی رژیمین نین قالینتیلاری ایراندا اولان میللتلری اؤزللیکله تورکلری انقلابدا اولان سهملریندن دولایی بو یوللا جزالاندیریللار. نه دئمیشلر چوخ سئون چوخ یانمالی. یانی فعلی دورومدا سیستمین ایشله‌یشی او یؤنده آپارماق ایسته‌ییرلر. بوآرادا بیزیم ۱۰۰دن چوخ تورک میللت نوماینده‌لریمیز قاضی پور، پزشکیان و… بو اویونلارین نه اولدوغونو هرکسدن یاخشی بیلیرلر. آما بو کیمی اویونلارا نییه گرچک بیر جواب یا چاره آرامیرلار بو اونلارین تورک میللتینین ویجدانین اؤنونده یانیت وئرجک سورغولارینداندیر.

آما یول آچار نه‌دیر؟ هاچانادک بیز بو تورلو اویونلارین آلتی اولاجاغیق؟

هاچانادک او فیلمه بو برنامه‌یه او شعارا، بو کاریکاتورا… اعتراض ائدیب بونلارین ییغشیلماسین ایسته‌‌‌یه‌جه‌ییک؟ هاچانادک بیز هزینه وئرمه‌لیییک؟ بیز تورکلر اولاراق تمل سورونو ایران آنا یاساسیندا آختارمالییق. یانی بو جسارتی، میللتلرله توهین تحقیر جسارتین آنا یاسانین حاکیم اولان فارس طبقه‌سینه حددیندن آرتیق حق و حقوق تانییان باشقا میللتلری طبیعی حقوقوندان محروم ائدن آنا یاسانی تنقید ائدیب اوندا اولان نقصانلاری یا دوزونو دئسک توهینلری برطرف ائتملییک. یانی آنایاسانین میللتلره توهین قونوسوندا کسین بیر توتومو، اؤنله‌ییجی بیر توتومو اولمایینجا ، ایراندا اولان میللتلرین اؤزللیکله تورک میللتینین حاق و حقوقو قوروما آلتینا آلینمایینجا بو سناریو دوام ائده‌جکدیر. یانی گرکلیدیر هر بیر ایران وطنداشی آنا یاسایا باخدیغیندا هر هانسی حاکیم طبقه یا حاکیم میللت ذهنیتی اولوشماسین.

بوردا یئنه‌ده گؤره‌و مجلیس نوماینده‌لرینه دوشه‌ر، بو عادیل آنا یاسانین یارانماسینین یولو البته مجلسدن گئچر. اونون اوچون بیر وطنداش اولاراق نوماینده‌لری بویونلارینا گؤتوردوکلری گؤره‌ولرینین اوستونده جیددی اولماغا چاغیریریق.

نه دئمیشلر بیلگه‌لر: عدالت مولکون تملیدیر. یا بیر دئموکرات آنا یاسایا دوغرو آددیم آتمالیییق یا بیر باشقا یول آراییشیندا اولمالییق.

یوخسا بو مودلده آش هامان آشدی کاسا هامان کاسا…

 Iran microscope map