آذوح: آزربایجانین گؤرکملی مدنیت خادیمی، سازی و سؤزو ایله هر زامان میلی داعوامیزین یانیندا اولان، بؤیوک وطن قایغی چکنی سایین عاشیق قافار ابراهیمی دونیاسینی دگیشدی.....
بو بؤیوک ایتکی بوتون آزربایجان تورک میلتینی و البته بیزی کدره و یاسا بوغموشدور.
1954 ایلینده دونیایا گؤز آچتی. بو گونه دک 10لارجا کیتاب، یوزلرجه شئیر و یوزلرجه آشیق‌لیق صنعتی ساحه‌سینده قوپوز(آشیق سازی) اؤیرنجی‌سی یئتیشتیریب. اورگی هر زامان وطن سئوگی‌سی ایله دؤیونوب . بولوندوغو هر اورتامدا خالقی وطن سئورلیک و وطن پرورلیگه چاغیراردی.
دفعه‌لرجه ایران رئژیمی طرفیندن توتوقلانمیشدی. سون دفعه ایسه آتا بابکین دوغوم گونو عرفه‌سینده بیر شئیر آخشامیندا توتوقلانمیشدی. موختلیف اؤلکه‌لرده ساز صنعتینی ایفا ائده‌رک آزربایجانین کولتورونو فرهنگینی و موسیقی‌سینی تانیتمیشدی.
رهمت‌لیک آشیق قافارین دفین مراسیمی حاققیندا حرومتلی اوغلو، عاشیق حجت ابراهیمی بئله یازیر:
عزیز آزربایجان تورک میلتی
آتام آشیق قافار ابراهیمی بو گون دونیاسینی دگیشمیش، تانرینین رحمتینه قوووشموشدور.
بوتون دوستلار و سئونلریمیزه، ایلک دقیقه‌لردن اعتیباراً بیزی یالنیز بوراخماییب، عائله‌میزه بو چتین گونده دستک اولدوقلاریندان دولایی تشککور ائد‌رک، خالقیمیزا بیلدیرمک ایستردیم کی؛
آغساققال و بؤیوکلریمیزین مصلحتی اوزرینه آتامین تشیع جنازه‌سی ۱۸ دی سه شنبه گونو اولاجاقدیر.
تام ساعت و یئری حاقیندا عائله‌میز طرفیندن بیلگی پایلاشیلاجاقدیر.
سایغیلارلا
آشیق حجت ابراهیمی
