سون واختلار یارانان و یاشانان اعتراضلار ، وار اولان تبعیض لر ، حاقسیزلیقلار و برابرسیزلیک لردن دوغان حاقلی بیر خالق تئبگیسی کیمی قاچینیلماز بیر رئاکسیادیر. اوزون مودت تضیق لر قارشیسیندا سوسوب ، سس سیز قالان خالق سونوندا پارتلاما نوقطه سینده سون چاره اولاراق عوصیانا باش وورور.
حال بو کی آزربایجان تورکلویو پهلوی رژیمی حاکمییه ته گلدیکدن به ری ایقتصادی ، ایجتماعی وسیاسی اولاراق قات – قات علاوه تضییق و تحقیرلره معروض قالمیشدیر و تاسوفله بو احوالات گؤنوموزه قدر داوام ائتمیشدیر .
آزربایجان تورکلویونون ایران آدلانان اولکه یه بخش ائتدییی اؤنجول و اینکیشافچی گیریشیملری بؤیوک تاسوفله قارشیلیقسیز قالمیشدیر ، اؤیله کی بو گؤن آزربایجان گنجلییی ایران اوغروندا وئریلن مشروطه کیمی جانفشانلیقلاردان اؤزونتو دویقوسونا قاپیلماقدادیر .
توطئه تئوریلرینده بوغولموش گؤنوموز دونیاسیندا کی گؤج و سوپر گؤجلر اینسانلارین طالئعینه یاخین و اوزاق واده لی پلانلار حیاتا کئچیرمکله مشغولدور، شک سیز آزربایجان تورکلویو بو گرگین دورومدا اؤز ملی منافعینی دوشونمک و یالنیز بو دوغرولتودا پلان و حرکت ائتمه سی اه ن طبیعی و گؤزله نیلیر بیر حالدیر.
ایرانی فارسلیقدا خولاصه ائدن مرکزچی شوونیست بیر مفکوره دن آزربایجان تؤرکلویونون حیمایه ائتمه سینی کیمسه گؤزله مه سین . قارشیلیقلی حؤرمتی اولمایان ، دیل و مدنییتی تحقیر اولان ، ایقتصادیاتی ایفلیج ائدیلن ، اورمو گؤلونون قورودولماسینی گؤره ن شرفلی ائلیمیز اؤز طلب لری ایچینده اولمایان هئچ بیر حرکاتا قاتیلماماسی چوخ منطقلی بیر حالدیر.
آزربایجان ملتی هر زامان ملی حاقلاری اوغروندا عرصه لر و میدانلاردا اولموشدور و رئگیون و بؤلگده باش وئرن حادثه لر و گئدیشاتی یاخیندان ایزله مکده دیر و بونا داها تیتیز بیر دیقتله داوام ائده جک ، بئله لیکله ده کئچمیشده اولدوغو کیمی گله جکده ده آزربایجان ملی منافعینی آنا چیزگی اولاراق یول خریطه میز قبول ائدیریک و دونیادا باش وئرنلره بو آچیدان باخماقا داوام ائتمه لییک.
آزربایجان مدنیت اوجاغی
تبریز
1396/10/17
07/01/2018
