یوجه تانرینین آدی ایله

سالام اولسون اولو آذربایجان تورک میللت ینه. آلقیش گئنیش دوشونجه لره و بؤیوک اوره کلره. باش اَییرم یوردومون دؤرد بیر بوجاغیندان، شهرلردن، کندلردن هابئله اوبالاردان، تماس توتوب و بو کیچیک قوللوقچولاری ایله جمعه گونو ۱۳۹۶/۸/۲۶ دا یاخیندان گؤروشه جکلرینی وورغولایان اینسانلارا.

او بؤیوک اینسانلارکی بو کیچیک قارداشلارینین سون یازیسین عمومی بیر چاغریش کیمی ده یرلندیریب، سؤیله نیلن یئرده حاضیر اولاجاق لارینی بویوردولار. بو بؤیوک میللت ین بیر کیچیک قوللوقچوسو اولاراق اؤزومو بو ایلگی یه لاییق گؤرمه دیگیمی وورغولاییب، بو عظمت ین قارشی سیندا باش اییرم. آرزی ائدیرم ائله بیر گون گلسین کی؛ آذربایجان سئوداسی ایله دؤیونن اوره کلر هر شهرین ان بؤیوک میدانیندا توپلانیب بیر یومروق اولوب، اؤزگورلوک هارایلارین دونیانین قولاغینا چاتدیرسینلار و اینانیرام اوگون اوزاق دئییل. بیلدیینیز کیمی ایلک یازیدا، کؤنوللو اولان هر کسین او اوتوروما قاتیلا بیله جگین سؤیله میشدیم آنجاق بو بیر تارتیشما اوتورومو اولدوغونا گؤره محدود بیر فضادا کئچیریله جک.

ایلک یازییا دایاناراق مخاطب یمیز اولان شخصلر وریندن باشقا یئر اعلام اولمادیغینا گؤره، اوتورومون اردبیلده کئچیریله جگی کسینلشیر.

بیلدیینیزه گؤره بو مراجعت ین اصلی مخاطب لری و آماجی ایلک یازیدا گلدیگی کیمی:" اؤزللیکله مجازی فضادا زامان-زامان مونولوگ اورتاملار یارادیب پوپولیستی و عین حالدا متناقض چیخیشلارلا گنج نسلی یانلیشلارا یؤنه لتمگه چالیشانلار و میللی حرکت ین وارلیغین٬ آخیمین و قازانج لارین کوچومسه ین و گنج نسله اومودسوزلوق تزریق ائدنلر، ها بئله حرکت ین ماهیت و مبارزه متدون سورغو آلتینا آپاریب، اؤزلرین و متدلارین بیر آلترناتیو کیمی اورتایا قویان شخصلرین بو اوتورومدا اولماقلاری و افکار عمومی ده یارانان سورغولاری جاوابلاماقلاری داها ضروری گؤرونور."

دئمک بو اوتورومون آماجی، سانال دونیادا بیر سیرا آغیز دولدوران لقب لرله اؤزلرین تئوریسین‌ و یا ایدولوگ کیمی تقدیم ائدنلر، هابئله هئچ بیر دیالکتیک متدا اویغون اولمایان اورتامدا، اؤزه للیکله دئدییمیز کیمی مونولوگ ابزارلاردان(سؤزلو و یازیلی) یارارلانارکن، حتی ان یوموشاق و منطقی‌ و علمی نقدلره ذره جه میدان وئرمه یه ن و اؤز غیر علمی، دایاز، مغرضانه و مسموم ایده لرین میللی حرکته و اؤزه للیکله گنج نسله چیخیش یولو کیمی دایاتانلارلا بیر آرایا گلیب علم و منطیق قالیبینده تارتیشماقدیر. سؤزده ایده و تئوریلرکی؛ معاصر چاغدا، حاکیملر طرفیندن هر بیر جنبش و حرکتی چؤکوردوب و انحرافا چکمیه قوللانیلیب و قوللانیلماقدادیر. سؤزون جانی بوکی: میللی حرکتده ایللر بویو، بیر بیلنگین بارماقلاری اولاراق صداقت و ایناملا چالیشان و هر هزینه و چتینلیگیه قاتلاشان، توم قوروم و قورلوشلار و شخصلرکی اؤزلرین و ایشلرین، حرکت ایچره دوغما جریانلارین و شخصلرین قارشیسندا یوخ! بلکه فارس راسیزمینین قاباغیندا تعریف ائدیبلر و یئری گلدیکده سلیقه تفاوتونا باخمایاراق، میللی سورونلاری چؤزمکده بیر یومروق اولاراق اورتایا چیخیبلار، ایلک یازیمین مخاطبی دئیللر.

طبیعی دیر کی ایچ‌ دانیشیق و دیالوگا کئچمک ایچین بئله بیر مراجعته گرک یوخدور، نییه کی زامان- زامان کئچمیشدن بو گونه چئشیتلی مکانیزملرله میللی حرکت ین ایره لی له مسی ایچین بیر دوشونوب، بیر تارتیشیب و ایش بیرلیگی ائدنلر آرا، تمللی ایلگی یوللاری داها هامار دورومدادیر. آنجاق حرکته اؤزگه اولوب دوغما کیمی گؤرنمگه چالیشانلارلا جدی بیر مباحثه، بو اوتورومون‌ آماجی دیر البته دفاکتو اولاراق. بللی دیرکی بو آنتی میللی جریاندا یئر آلانلار بیر اؤلچو ایله اؤلچولمورلر، نییه کی اونلارین وارلیغی و خلق الساعه اولاراق اورتایا چیخمالاری بیر چوخ ندنلردن آسیلی اولابیلر:

1- محافظه کار اینسانلار کی؛ حرکت ین گئدیش نرملاری ایله آیاقلاشا بیلمه ییب و عین حالدا جاه طلب روحیه لریندن آسیلی اولاراق ظرفیت لرینه اویماییرلار. بو اوزدن ائله بیر مبارزه متدون تئوریزه ائتمگه چالیشیرلارکی اونلارین محافظه کار روحیه لری ایله اویغون اولسون. دئمک اؤزلرین حرکتله یوخ بلکه حرکتی اوزلریله اویغونلاشدیرماق ایسته ییرلر.

2-هیجانی هوش و یا همان EQ یوخسولو اولان شخصلرکی؛ اجتماعی-سیاسی مسائلی آییرد ائتمک باجاریغی و تشخیص گوجلرینین ضعیف اولدوغونا گؤره معقول و منطقی بیر توتوم توتماقدان عاجیز قالیرلار.

3- نارسیسیت شخصلر کی؛ حرکت له یئنی تانیش اولدوقلارینا رغمأ، چوخ بیلمک توهمینده غرق اولاراق ذهنلرینه گلن هر بیر دوشونجه نی میللی حرکته بیر قورتاریجی تئوری کیمی دایاتماغا چالیشیرلار. بوندان غافیلکی، میللی حرکت اونلارین ذهنیندن کئچنی، کئچمیش ایللرده پراتیکده سیناییب و گرکن تجروبه لری قازانمیش دورومدادیر.

4- میللی حرکته احساسلا گلنلرکی؛ میللی حرکت ین ماهیتین درک ائتمدن، بیلگیلری و ایناملاری درینلشمدن، مبارزه عالمی نین ایستی- سویوغوندا پیشگینلشمه دن، اوجا اوچوش هوسینه دوشوب، سونوجدا بیر آز سیخینتی ایله سینیب، امنیتی گوجلرین کنترولونا گئچه رک، کئچمیش دیرلر و دوشونجه لرینین علیه ینه قوللانیلیرلار.

5- و... نهایت؛ سیستماتیک اولاراق گئنیش، درین و بوروشوق بیر پروژه نین قالب ینده آیلار و حتی ایللرجه ائیتیم گؤروب، بیر سورج و پروسه اساسیندا میللی دون گئیدیریلیب، مأمور اولاراق حرکته سیزدیریلانلار.

آچیقلاما

ایلک یازیدا سؤیله دیگیم کیمی بو چاغریشین مخاطبی اولماسالاردا، منیم شخص اؤزومه، هر ندنه گؤره یاراماز سؤزلر قوللانان هر کیمسه، انسانی باخیش آچیسیندان سؤز حاقی وار و اوتورومدا اولوب میللی فعاللارین جدی سورغولارین جاوابلاندیرا بیلرلر. آنجاق بیر شرطله، اودا بوکی: او اوتوروم سوره سینده عادت ائتدیکلری عرفدن قیراق ادبیاتی(یامان- یوووز) قیراغا قویوب و مدنییته اویسونلار. من اؤز حاققیمدان کئچیرم؛ آنجاق بو او آنلامدا دئیلکی بو شخصلرین میللی حرکت ده سابقه سی گؤرونمه ین سیاسی اخلاقسیزلیق ، اهانت و خیانت حدینده اولان داورانیشلاری اونودولاجاق. البته کی میللی حرکت بو دورومدا اولارکن تخریباتا عنادلا دوام ائدن و ایکی گونون بویوندا ۱۳۶۵ نفر میللی فعال و شخصلرین‌ بیر بیانیه ایله قینامالارین و تخریباتا دور دئمکلرین هئچه سایان و هله ده او یانلیشا دوام ائدنلر حاقدا، زامانی گلینجه گونئی آذربایجان میللتی قرار وئره جکدیر. آنجاق بوردا سؤز وئریرم او اوتورومدا او شخص لرین اولوب و تارتیشمالاری سورجده جانیملا و توم گوجومله اونلارین حئیثیتین و حؤرمتلرین قورماقدا هئچ نه دن اسیرگه مییه م.

ایلک یازی یاییلاندان سونرا باشدا آچیقلادیغیم کیمی بیر چوخ زنگ گلدی. و بیر سورغو منیم ایلگیمی چکدی: "سیز توتوقلانما احتمالی وئریرسیز و اگر ائله بیر احتمال وارسا ندن بو اوتوروما چاغریش وئردیز؟" بو سورویا بونو دئمه لییم کی: بیزیم یولوموز مبارزه یولودور و هر آددیمیمیز آذربایجان میللت ینین آزادلیغی دوغرولتوسوندادیر، بو اوتورومدا بوندان استثنا دئییل.

بیلدییز کیمی، میللی حرکتین وارلیق فلسفه سی آذربایجان میللتینین فارس راسیزمینین آیاقلاری آلتیندا تاپدالانان حاقلارین گئری آلماقدیر و بللی دیرکی، بیلره ک حاق یییه نلردن، دیله نرک حاق آلماق اولاماز، صرف انتزاعی بحثلرله مجازی فضادا حق آلماق اولماز.نظرلر عمل عرصه سینه کئچملی دیر و بونون هزینه سی اولاجاق. پس طبیعی دیرکی بو اوتورومدا توتولماق احتمالی وار!

بو سورغونون جاوابی باشقا بیر سورغو اورتایا چیخاردیر، اودا بوکی: ندن معمولا مجازی فضادا گئجه-گوندوز بعضیلر یازیب و سخنرانلیقلار ائدیرلر آنجاق امنیتی گوجلر گؤزلرینده پیله میر ...ندن؟

من بو سورغونو بوتون میللی فعالاردان ائدیرم. ندن آنا دیلینه قورولان مراسیمده شرکت ائدنلره اون ایللر دوستاق کسیلیر آنجاق سانال دونیادا بعضیلر سورکلی چیخیشلار و سخنرانلیقلار ائدرکن، امنیتی گوجلر و یا قضاییه قوه سی وریندن مجرمانه فعل تانینمیر؟

بو سورولارا بیر چوخ جاواب وار، یالنیز ایکی مورده اؤتری اولاراق ایشاره ائدیرم و اوتورومدا داها گئنیش بو قونویو آچاجایام.

او چیخیشلارین(سوزلو-یازیلی)اطلاعات وریندن توخونولماز چیزگینین ایچینده یئر آلماق ندنی بودور: میللی حرکته مسموم‌ دوشونجه لری یئرلشدیریب، بونونلا مباریزه روحون و شعورون بو حرکتدن آلیب و خاصیت سیز بیر آد حددینه دوشورمکدیر. ائله کی: معامله نی، تعامل. قورخودان تؤرنن انفعالی، عقلانیت. قورخوسوزلوق و جسارتی، کور احساس. بوتون دونیا اینسانلاری آرا قداستله یاد اولان آزادلیق اوغروندا وئریلن هزینه لری، گرکیسز و حماقت. بیر جنبشه لازیم اولان چانه زنی گوجون و شرایطین الده ائتمه دن جناحلار و حاکمیتین قاپیسیندا دیلنمگی، سیاست و... گوسترمکله شوم هدفه چاتماق ایسته ییرلر.

اطلاعاتین بو قونودا استراتژیلریندن بیریده بوکی: گرچک دونیادا سیخینتینی او قدر چوخالدا تا انسانلار مجازی فضانی داها امن بیر یئر گوره رک حقیقی فضانی بوراخیب و مجازیده اولماغا عادت ائده رکن عملسیزلیگه یؤنلسینلر. او فضادا تقریبا امنیتی گوجلرین یئترلی اشرافیتلری وار و معمولا حاکمیتی ایلگیلندیرن مجازی فعالیتلری یا مدیریت ائدیرلر یا ائتگیلی ایشلر گؤرولنده مختلیف یوللارلا داغیدا بیلیرلر.

البته بونلارلا بئله؛ بیلیم و بیلگی کهکشانی اولان سانال دونیاسی، بو اَتُمیک سو استفاده لرله، سونسوز دیری، ذرجه دیدیکلنمز. گؤردویوموز کیمی میللی مسئله میزده، بو توکنمز خزینه دن پایین آلیر. نئجه کی: دیل، ادبیات، اقتصاد، سیاست و... ساحه لرینده چوخ دیرلی مقاله لر و اثرلر اورتایا چیخیر. هابئله مجازی فضانین اؤنم ینده بو یئترکی: رسانه انحصارین حاکملر، قدرت و ثروت صاحبلرینین الیندن چیخاردیب.

سون اولاراق وورغلاییرام، بوتون سؤیله ننلره رغمأ حرکت ین ایچ و دوغما تشککولر و شخصلریندن بو اوتورومدا اولوب، هم تارتیشماغا قاتیلا بیلرلر و هم بیر تانیق کیمی آددیملاری گؤزوموزون اوسته اولاجاق.

سایقیلارلا

عباس لیسانی