ديرلي سويداشلار،
سئويملي آذربايجان تورک ميلتي!
هر گون ايره‌ليله‌مکده اولان آذربايجان ميللي حرکاتينين ميللي-سياسي درينليگي يئني آشامالارادان کئچير. دونيا، بؤلگه و اؤلکه اوزره گئدن سياسي ستراتئژيلرين مرکزينده ائتنيک ياپي دورماقدادير. گونئي آذربايجان، دونيا گوجلرينين ايستي و سويوق ساواشينين تام مرکزينده دايانماقدادير. بؤلگه‌نين گله‌جگي ايله باغلي سؤز صاحيبي اولما چابالاري بوتون بؤلگه خالقلاري کيمي آذربايجان تورک ميلتيني ده ان ايچدن ايلگيلنديرمکده‌دير. قاراباغ، کرکوک و آدديم-آدديم اورمو کيمي دوغما مرکزلريميز ياد ائللي قونشولار طرفيندن باسقي يا آلينميش و يا ايشغال سورجي ياشاماقدادير. آرتيق، "بيز اولوب ياشاماق، يوخسا بيزليکدن اوزولوب سارسيلماق"! آستاناسينداييق. تک بير سؤزله تورک ميلتينين ازهلي-ابدي اولان وطن آنلاييشي بؤيوک تهديد آلتيندادير. پانفاشيست فارسچي رئژيمين گونئي آذربايجان تورک ميلتينه قارشي اولان فاشيستجه داورانيشي گون کئچديکجه آپ-آيدين دؤولت ستراتئژيسي کيمي گؤزوکمکدهدير. تورک ميلتي بؤيوک دوشمن چنبري آراسيندا قوشاتيلميش دورومدادير. آنجاق، بونا باخماياراق، آيقلانميش اولو ميلتيميزين ميللي داواسي دا دايانمادان سورمکدهدير. هئچ شوبههسيز، تورک ميلتي اؤز حاقلي ساواشيني قازاناجاقدير. بو ساواش سورجينده ميلتيميزين موطلق اؤرگوتلنمهسي گرهکير. بو اوزدن، "گونئي آذربايجان دئموکراتيک تورک بيرليگي" گادتب بيز اولوب ياشاماق! ايرادهسيني اورتايا قويان قهرمان تورک گنجليگيميزه دستک اولماق آماجييلا ميللي ساواش مئيدانينا آياق قويماقدادير .
گونئي آذربايجانين تام باغيمسيزليغيني اؤزونون اولوسال آماجي اولاراق اورتايا قويان گادتب اوچون آذربايجان تورکچولوگو واز کئچيريلمز دوشونجه قايناغيدير. آماجلاريميز دوغرونتوسوندا قورولاجاق چاغداش، دئموکراتيک، لايک و بوتون ياشام آلانلاريندا گليشميش "گونئي آذربايجان تورک جومهوريتي" عئين آندا بوتؤو آذربايجان دؤولتچيليگينه ده گئدن يولدور.
گادتب، گونئيين اؤزگورلوگو اوغروندا موجاديله ائدن تورکچو-ايستيقلالچي قوروملارين وارليغيني اوجا توتماغا چاليشير. اونلارلا "ديلده،دوشونجهده، ايشده بيرليک" ايلکهسي اوزرينده هر تورلو ياخين ايليشکي يوللاريني ايزلهيير.
سؤزسوز کي، بيرليکدن گوج دوغار دوشونجهسيله گونئي آذربايجانين ميللي اؤزگورلوگونو آماجا اولوشدورماق اينانجي ايله يولا چيخان گادتب-نين يولونا ايشيق ساچاجاق قارداش قوروم-قورولوشلارين دا خئير-دوعاسينين آرخاميزدا اولاجاغيندان امينيک.
سئويملي آذربايجان تورک ميلتي!
ياخين گلهجکده گادتب-نين گئنيش پروقرامي و دوزوک تاسلاغي سيزين بيلگينيزه سونولاجاقدير. بلگهلريميزين ياييلماسييلا گادتب-نين گئنيش قورتولوش سورجي و دؤولتچيليک پروقرامييلا تانيش اولاجاقسينيز. سيزين بوتون فيکيرلرينيز بيزيم اوچون يول آچاري اولاراق ديرليدير.
ياشاسين آذربايجان تورک ميلتي،
وار اولسون گونئي آذربايجان تورک جومهورييتي!
گونئي آذربايجان دئموکراتيک تورک بيرليگي-
قوروجو يؤنتيم باشقاني اژدر تقيزاده!
2017.09.10
