آذوح: تورکیه جمهوریتینین باشکندی آنکارادا “خزر مدنیت، کولتور و توپلومسال آیدینلانما درنگی”نین تشببوثو ایله “ابوالفضل ائلچی بی و گونئی آزربایجان مجادله سی” اوتورومو گئیچیریلدی.
اوتورومون باشیندا خزر درنه گی باشقانی سایین مجید جوادی قاتیلمیجیلارا خوش گلدین دئدیکدن سونرا قاتیلیمچیلاری تورک دونیاسی شهیدلری آدینا بیر دقیقه لیک سایقی دوروشونا و تورکیه و قوزئی آزربایجان جمهوریتلری نین ملی مارشلارینی دینلمگه دعوت ائتدی. داها سونرا ایسه رحمتلی ائلچی بیین گونئی آزربایجان تورک گنجلیگی ایچینده یئری و اؤنمینه حاققیندا گؤروشلرینی قیساجا پایلاشاراق قونوشماجیلاری تریبونا دعوت ائتدی.
اوتورومون ایلک دانیشانی، آتا وآناسی ائلچی بیین یاخین چئوره سی و چالیشما ائکیبیندن اولان و بئ ندنله ده اوشاقلیقدان رحمتلی اولچی بی یاخیندان ادراک ائتمیش، تورکیه نین ت-و-ب بیلیم یوردو اوستادی دکتر طوغرول اسماعیل ائلچی بیین سیاسی شخصیتی حاقیندا دانیشدی. اوشاقلیغیندان بری ائلچی بیین میلی مجادله سینه یاخیندان تانیق اولان دکتر اسماعیل ائلچی بییه آتیلان افترالارا جواب وئره‌رک ائلچی بیین حکومتده اولدوغو دؤنمده کی فوق العاده سیاسی باشاریلارینی آنلاتدی.
ایکینجی دانیشان ائلچی بیین دامادی،چالیشما ائکیبینده یئر آلان و “دیرنیشدن باغیمسیزلیغا ائلچی بی” کتابی نین یازاری عاقیل صمدبیلی ایدی. عاقیل صمدبیلی ائلچی بیین تورک دونیاسی ایچینده اؤنمی، باغیمسیزلیق دؤنمینده مجادله سینی و نئچه یؤنلو بیر لیدر اولدوغونو، و گونئی آزربایجانا وئردیگی بؤیوک اؤنمی آنالیز ائتدی.
اوتورومون اوچونجو دانیشانی ائلچی بیین بؤتوو آزربایجان بیرلیگی تشکیلاتیندا گونئی آزربایجان معاونی و “آزربایجان مرکزلی تورکچو دوشونجه” کتابینین یازاری ائلدار بی قاراداغلی ایدی. ائلدار قاراداغلی دانیشماسیندا محمدامین رسولزاده، دکتر جواد هیئت و پروفسور زهتابی نی یاد ائدیب ائلچی بیین بو اوچ بؤیوک انسانی نه قدر سئودیگینی آنلاتدیقدان سونرا گونئی آزربایجان تورکلرینه وئردیگی اؤنمی آنلاتدی.
داها سونرا ایسه ابولفضل ائلچی بیین اکینجیلیک باخانی و آنکاراداکی آزربایجان کولتور درنگی نین باشقانی، سایین جمیل اونال؛ تورکیه اکینجیلیک سندیکاسی باشقانی و تورکیه قامو سندیکاسی (تورکیه کامو-سن) گنل باشقان یاردیمجی سی، سایین احمد دمیرجی و بیلیم یوردو اوستادی و واربیق دزگیسینین امتیاز صاحیبی سایین دکتر محمد رضا هئیت اوتوروم قونوسو حاققیندا گؤروشلرینی پایلاشدیلار.
پروقرامین سونوندا سایین عاقیل صمدبیلی و سایین ائلدار قاراداغلی کتابیلارینیامضالایاراق قاتیلمجیلارا تقدیم ائتدیلر. هابئله خزر درنگی و آزربایجان میلی دیرنیش تشکیلاتی طرفیندن یایینلانان کتاب و یایینلار اوتوروما قاتیلانلارا وئریلدی.
اوتورومدان سونرا ایسه خزر درنگی نین عضولری و قوناقلاری قوزئی آزربایجان جمهوریتی نین قوروجوسو اولو اؤندر محمد امین رسول زاده نین مزارینی زیارت ائتدیلر و بیر سیرا قوناقلار اورادا قیسا چیخیشلار ائتدیلر.
اوتورومون فیلمی آزربایجان تورک میلتی اجتماعیاتینا تقدیم ائدیله جکدیر.
