آذوح: فئورالین 26-دا باتی یؤتالاند آذربایجان ائوی بیرلیگی ایسوئچین یؤتئبورق شهرینده خوجا‌لی سویقیریمی‌نین 25 ایللیگی موناسیبتیله “خوجا‌لی سویقیریمی – 25” آدلی کونفرانس کئچیردی. اللی‌دن چوخ سویداشیمیزین قاتیلدیغی کونفرانس آزربایجانین میللی هیمنی ایله آچیلمیش، خوجا‌لی سویقیریمینی جانلان‌دیران بدیی فیلمین بعضی فراقمئنت‌لرینی ایزلدیک‌دن سونرا خوجا‌لی و بوتؤو آذربایجان شهیدلری بیر دقیقه‌لیک سوکوتلا یاد ائدیلمیش‌دیر.
کونفرانسین آپاریجی‌سی جاوانشیر جفروو قیسا گیریش سؤزو سؤیلمیش، سونرا سؤز چیخیشچی‌لارا وئریلمیش‌دیر. چیخیش ائدن‌لر – امیر مردانی، آریف رهیموغ‌لو، اولویه روستمووا، راسیم جابباروو، محمود بیلگین، ووساله الیئوا، شفا هاجییئوا، قولامرزا زارئیی، فیرودین السگروو، آذر کازیم‌لی و ائلدار قاراداغ‌لی خوجا‌لی سویقیریمینی XIX یوزیلین سونو – XX یوزیلین باشلاریندان بری آذربایجان خالقینا قارشی تؤره‌دیلن روسیا دستک‌لی ائرمنی فاشیزمی‌نین یوروتدوگو جینایتکار سیاستین بیر بلیرتی‌سی کیمی دیرلندیردی‌لر. آزربایجانین هم قوزئیینده، هم ده گونئیینده یورودولموش بو جینایتکار سیاست سببینه خوجا‌لی دا داخیل ان آزی بئش یوز میندک آذربایجان تورکو وحشیجه‌سینه قتله یئتیریلمیش‌دیر. خوجا‌لی سویقیریمی گونوموزده باش وئردیگی اوچون آرتیق یوز ایلدن چوخ تاریخی اولان بو جینایتکار سیاستین سیموولونا چئوریلمکده‌دیر. آذربایجانا قارشی یورودولن همین جینایتکار سیاستین گونئی آذربایجاندا سویقیریملا یاناشی، هم ده بویقیریم (کولتورل سویقیریم) اولا‌راق فارس شووینیزمی‌نین علی ایله بو گون ده داوام ائتدیریلمه‌سی اوزرینده آیریجا دورولموش‌دور.
چیخیشچی‌لار آزربایجانین حاق سسینی دونیایا، او سیرا‌دان ایسوئچه دویورا بیلمک اوچون تشکیلاتلانمانین، گنجلیگیمیزین میللی روحدا یئتیش‌دیریله‌رک کادرلاشماسی‌نین، گونئی‌لی-قوزئی‌لی بوتؤو آذربایجان اولا‌راق بیرگه فعالیتیمیزین واجیب‌لیگینی وورغولامیش‌لار. چیخیشچی‌لاردان اولویه خانیم و ووساله خانیم هم ده خوجا‌لییا حصر اولونموش تأثیرلی شئیرلر سؤیلمیش، شفا خانیم ایسه گنج‌لریمیزین فاللاشماسی و تشکیلاتلانماسی احتیاجی ایله باغلی ماراقلا قارشی‌لانان فیکیرلر ایره‌لی سورموش‌دور.
سوندا کونفرانس ایشتیراکچی‌لاری ایسوئچ پارلامئنتینه، ایسوئچین بوتون سیاسی پارتیا‌لارینا و اینسان حاق‌لارینی قوروما تشکیلات‌لارینا یؤنه‌لیک قتنامه قبول ائتمیش، اونلاری خوجا‌لی سویقیریمینا اجتماعی-سیاسی قیمت وئرمه‌یه و اونو رسمن سویقیریم کیمی تانیماغا چاغیرمیش‌لار.
آذوح
