ایران‌دا یاشایان غئیری فارس میللتلرین طالئعینه باخاندا چوخ آجیناناجاقلی بیر تابلو سرگیله‌نیر. اؤزگور ایفاده یاساقلانمیش، آزادلیغی ایسته‌مک حرام، کیملیگیندن دانیشان توتساق، زنگینلیغیمیز تالانیر.

ایلیمیز 2019، چاغیمیز سماواتی فتح ائتمکدی، آما حالا بو اؤلکه‌ده بیزلر اوچون، اینسانین کیملیگیندن آیریلماز "آنادیلینده ائیتیم" حاققی، سوچ ساییلیر. دونیانین بیر چوخ اؤلکه‌سینده هر ایل قئیده آلینان، تدبیرلر کئچیریلن، شنلیکلر قورولان گون بیزلر اوچون یئنیدن سند و ثبوتدور، ایران دا اؤزگه‌ییک. دردیمیز باشیمیزدان آشیر، ایگیدلریمیز اسیر، یولوموز اوزاق، آنجاق، اومودوموز دا گون‌به‌گون ایشیقلانماقدا!

سون هفته‌لرده تراختور آزارکئشلرین قالدیردیغی پانکارت، بیر میللتین هارایی‌نی یئنیدن هارایلادی، "گونئی آزربایجان اؤز موقددراتینی بلیرله‌یه‌جکدیر". بو اولایین دونیالیق آنادیلی گونلریله اوست‌اوسته گلمه‌سی هئچ‌ده تصادوفی دئییلدیر. "نه ساغچییام نه سولچو، میللتچیم میللتچی" شوعاریلا ماهیتینی اورتایا قویان گونئی آذربایجان میللی حرکتی، "گونئی آذربایجان ایران دئییل"ایله مقصدی بلیرله‌ییر و ایندیده ان دوغرو و ان دوزگون زاماندا یولو گؤسته‌ریر: "اؤز موقددراتینی تعیین ائتمک".

شرفلی آذربایجان تورک میللتی!

آذربایجان میللی حرکتی ان حساس گون‌لرینی یاشاماقدا‌دیر و بؤلگه‌ده‌کی دئییشیک‌لیک‌لر البته کی بیزیم حرکتی ده اؤز تأثیری آلتینا آلا‌جاق‌دیر. وطن آدینا و میللتین آزادلیغی اوغردوندا میللی ایستکلریمیزی الده ائتمک اوچون ائعتیراض سسیمیزی اوجالتمالیییق و هر زامان کیمی اونوتولمامالیدیر، بیز بیرلیکده گوجلویوک.

بيز آذربايجان سياسي تشكيلاتلاری ایران اسلام رئژیمی‌نین اؤلکه‌ده فارس اولمایان میللت‌لرین دیللرینه قویدوغو قانونسوز قاداغانی قیناییب، ایراندا تورک نوفوسونون سایی‌سینا اساسلاناراق آذربایجان تورکجه سینین رسمی دوولت دیلی اولماسینی ایسته‌ییریک.

کئچن 40 ایلین هر گونو کیمی، ایران رئژیمین آذربایجان تورک فعال‌لارینا قارشی باسغی‌سی داوام ائدیر و لطیف حسنی، عباس لسانی، سیامک میرزایی و... تضییقلر آلتیندا، حبس جزاسی آلیر، ایشکنجه اولورلار. بیز میللی فعاللارا وئریلن آغير حبس جزالاريني شيددتله قينايير، توتساق میللی فعاللارین قئید شرطسیز آزادليغيني طلب ائديريك. میللی فعاللارا وئریلن محکمه قرارلاری درحال لغو ائدیلمه‌لی، اونلاری ایشکنجه ائدیب توتساق ساخلایانلار جزالاندیریلمالیدیرلار.

یاشاسین آذربایجان،

یاشاسین تورک میللتی،

آذربایجان اؤیرنجی حرکاتی (آذوح)

آذربایجان میللی دیرنیش تشکیلاتی (آ.م.د.ت)

گونئی آذربایجان دئموکرات پارتیاسی(گادپ)

2019-02-21