زامان- زامان هر بیر میللی فعالین فیکرینده ن او بؤیوک بیرلیک دویغوسو گلیر و گلدیغی کیمیده بیر آندا اونوتولور و بو ایش تمللی هر بیر شخصین فیکرینده اویغولانیر. آمما ندنسه بو چوخ بؤیوک اولای (بیرلیک) هئچ بیر زامان قالیجی اولاراق قالمیر و چوخ کیچیک و دیرسیز نسنه لر و نده ن لرده ن اؤترو آرادان گئدیر.

هر زامان یئنیلیک چی اولموشوق و یئنی اولایلار ، خبرلرگؤزله میشیک و گئچمیشده کی لرین هر بیرین تاریخین فرقلی صفحه لرینه گؤمموشوخ و بیر آنی اولاریاق خاطیرلاییریق.

بو بیلگی و تکنولوژی زامانین دا هر بیر داهی میللی فعالیمیز اؤزونه سانال دونیادا آت چاپدیریر و هر بیر مرجع ده ثبت اولونموش اؤزونه خاص کانال و یا بنزر صفحه لری وار کی اگر اونون فیکرین یانسیتمایان بیر باشقا فیکیرداش او کانال دا بیر اؤنری وئرسه همن خائن و یا باشقا بیر دامغالار ایله سوچلانیر . سانال دونیادا سایسان ساییسیزدیر کانالیمیز و اینترنت صفحه لیریمیز، و بو ایسه گونئی آزربایجان میللی حرکاتی اوچون گوج وئرمک یئرینه داهادا گوجون آزالتماک یؤنونده ایلرله ییر. تاسفلر اولسون کی بیز داها بو گوجلولوک ده تکنولوژی ده ن بو گونه دک چوخ یارارلانا بیلمه میشیک.

سون زامانلاردا بیر خبر سون سرعت ایله یاییلیر و یئنی کامپانیالار یوروتولور و اودا بیر اجی خبر و بیر ضربه اولا بیلر گونئی آزربایجان حرکاتی اوچون و اودا بودور کی ایکی میللی فعالیمیز( سایین سعید بایکال و رحیم جوادبئیلی جنابلاری) سیغینماجی استاتوسوندا اولاراق کی ترکیه ده یاشاییردیلار و بو حرکات اوچون ده دیرلی فعالیت لری اولوب توتوقلانیب لار و بو خبرین ان آجی وئریجی نقطه سی ده بودور کی بو ایکی عزیزیمیزین بیری آز قالا بیر ایل دیر توتوقلانیب دیر آما نه یازیق کی داها یئنی خبردار اولوروق. هر نه اولور اولسون بیزیم بو خبرلری گئج آلمامیزین بیر نده نی اولماسی لازیم دیر بئله بیر بؤیوک خبری بو گونه ده ک نئجه گئنیش قاپسامدا یاییلماییب دوغروسو بیر آز دوشوندوروجودور و باشقا بیر پلان لارین وار اولوشونو ایستر ایسته مز دوشوندورور .

نظره آلمالییق کی بو گونه دک چوخلو هزینه لر وئره رک گونئی آزربایجان حرکاتی گونوموزه دک گلیب دیر و بو هزینه لرین یئرین دولمادان داهادا هزینه وئرمک اویغون اولماز.

گونئی آزربایجان حرکاتیندا هر کس عینی فیکیرین صاحیبی اولا بیلمزلر.

هر باغین هر باخچانین بیر بولبولو شئیداسی وار

هر دویان قلبین عزیزیم، گیزلی بیر سئوداسی وار

بو گؤزه ل شعیره دایاناراق بیر بیریمیزین باخیش آچیسینا سایقی چئرچیوه سینده یاناشمایی اؤیره نه بیلسک بیزده ن داها گوجلوسو أولا بیلمز و بیر یوموروق کیمی هر زورلوغون اؤنونده باشی اوجا قازاناراق میللتیمیزه ، خالقیمیزا و یوردوموزا اوغورلار ارمغان ائده بیلریک.

ایچیمیزه سینسی سینسی سیزیب چیرکین دوشونجه لری یایانلاری توتدوقلاری یولدا مایوس ائتمک هر بیر میللی فعالین گؤره ویدیر. بوتون آیدین لاریمیزین یانیندا دوراراق اونلارا دایاق اولاغین .

آرش مکاریدوست،

"سیغینماجیلار یاردیملاشما مرکزی-گونئی آزربایجان" باشقانی و "آذوح"ون تورکیه تمسیلچی سی