آذوح: باتی یؤتالاند آذربایجان ائوی بیرلیگی‌نین قراری و “بابک” آذربایجان کورس‌لار درنکی‌نین تشکیلاتچی‌لیغی ایله ایسوئچین یؤتئبورق شهرینده “آذربایجان تورک‌لری‌نین بویقیریم گونو – 26 آزر/17 دئکابر” مؤوضوسوندا کونفرانس کئچیریلدی. کونفرانس علامتدار بیر چاغا – بمت-نین دونیا اینسان حاق‌لاری بیاننامه‌سینی قبول ائتدیگی 10 دئکابر گونونه سالینمیشدی. چونکی 1946-جی ایل 12 دئکابر – 21 آذر گونو شاه قوشون‌لاری اینسان حاق‌لارینی پوزا‌راق تکجه آذربایجان میللی حکومتینی اورتا‌دان قالدیریب مین‌لرله اینسانی اؤلدورمه‌دی، هم ده بئش گون سونرا – 17 دئکابردا آنا دیلیمیزده اولان کیتاب‌لاری، ال یازما‌لاری، قزئت-درگی‌لری یاندیردی و بونا انگل اولماق ایسته‌ین اؤیرتمن‌لری، شاگیردلری بئله گولله‌له‌دی

          یؤتئبورق‌داکی آنگئرئد بلو ایستئللئت (ماوی ائو) سالونوندا کئچیریلن توپلانتینی “بابک” آذربایجان کورس‌لار درنکی آدین‌دان آذر خانیم حئیدرقیزی آچدی. آذربایجان میللی حکومتی دؤورون‌دکی میللی مارش سسلندیریلدیک‌دن سونرا کیتاب‌لارین یاندیریلماسینی جانلان‌دیران قیسا بیر فیلم گؤستریلدی و داها سونرا سؤز چیخیشچی‌لارا وئریلدی.

          توپلانتیدا آمئا فولکلور اینستیتونون خاریجی علاقه‌لر بؤلمه‌سی‌نین مودیری علی شامیل، اردبیل‌لی تانینمیش میللی موباریز اژدر تاغی‌زاده، اوسکولو ایقتیصادچی عالیم حسین یحیایی، آذوح-اون آوروپا تمسیلچی‌سی سولدوزلو امیر مردانی، “بابک” آذربایجان کورس‌لار درنکی‌نین صدری ائلدار قاراداغ‌لی، یؤتئبورق‌داکی “آذربایجان دئموکراتیا اوجاغی”نین صدری عاریف رحیم اوغلو چیخیش ائتدی، ایراندا آذربایجان تورک‌لری‌نین اینسان و توپلوم حاق‌لاری‌نین اولوسلاراراسی حقوق سندلرینه ضد اولا‌راق یوز ایلدن بری کوبودلوقلا پوزولماقدا اولدوغونو فاکت‌لارلا گؤستردی، بو مسئله‌نین دونیا اجتماعی ریینه دویورولماسی صرورتینی وورغولادی‌لار.

          سوندا کونفرانس ایشتیراکچی‌لاری‌نین قراری ایله قتعنامه قبول ائدیلدی. قتعنامه‌یه گؤره، 26 آزر/17 دئکابر آذربایجان تورک‌لری‌نین بویقیریم گونو اولا‌راق هر ایل قئید ائدیلمه‌لی، بویقیریمی تؤره‌دن فارس شووینیزمی ایفشا اولونما‌لی، دونیادا بویقیریم گونونه سیاسی-حقوقی قیمت وئریلمه‌لی،  26 آزر/17 دئکابر گونونون دونیا عوذره بویقیریم گونو کیمی قبول ائدیلمه‌سی اوچون یونئسکو-یا –  بمت-یه مراجعت اولونما‌لی‌دیر.

https://www.youtube.com/watch?v=no70aF0TdOU&list=PLVPSPW5gFo4oJ2bCI4F9PxY-dT4uCtZ0Z&index=1

 

**********************************************************

باتی یؤتالاند آذربایجان ائوی بیرلیگی‌نین قراری و

بابک” آذربایجان کورس‌لار درنیی‌نین تشکیلاتچی‌لیغی ایله کئچیریلن

آذربایجان تورک‌لری‌نین بویقیریم گونو – 26 آزر/17 دئکابر” کونفرانسی‌نین

قتعنامه‌سی

 

          دیرلی خانیم‌لار و بی‌لر!

          اؤز میللی کیملیگیمیزی قوروماق و اؤز آنا دیلیمیزده تحصیل آلماق باشقا‌لاری کیمی، بیزیم ده سیرا‌دان بیر اینسان و توپلوم حاقیمیزدیر. آنجاق چوخ یازیق‌لار کی، بیرلشمیش میللت‌لر تشکیلاتی‌نین دونیا اینسان حاق‌لاری بیاننامه‌سینی قبول ائتدیگی بو 10 دئکابر گونونده بیز “آذربایجان تورک‌لری‌نین بویقیریم گونو – 26 آزر/17 دئکابر” کونفرانسینی کئچیریر و همین حاققیمیزین یوز ایلدن بری کوبودلوقلا پوزولماقدا اولدوغونو دونیایا دویورماق ایسته ییریک.

          خاتیرلاداق کی، بیر توپلوم عضو‌لری‌نین عینی بیر ائتنو-میللی کیم‌لیک بیلینجینه سؤیکنه‌رک بوتون‌لشه بیلمه‌سی او توپلومون میللته چئوریلمه‌سی یولوندا آتیلان ایلک اساس آددیم ساییلیر. عینی بیر ائتنو-میللی کیم‌لیک بیلینجی ایسه میللی مدنیتین ائتنیک کؤکن، دیل، تاریخ، ادبیات، موسیقی، مکتب، چاپ، مطبوعات، رادیو-تو وب. تمل‌لری اوزرینده قورولار. ائتنو-میللی مدنیتین بو تمل‌لری‌نین دؤولت دوزئیینده سیستئم‌لی مهوینه یؤنلمیش سیاست علمده داها چوخ کولتورل سویقیریم، یاخود ائتنوسید، آذربایجان تورکجه‌سینده ایسه بویقیریم آدلانماقدا‌دیر.   

          فارس شووینیزمی تورک ائتنو-میللی آدیمیزی دییشدیرمیش، آذربایجان تورک‌لری‌نین ائتنیک کؤکنینی دانمیش، دیلینی یاساقلایا‌راق نینکی آلی و یا اورتا، حتی ایبتیدای مکتبه بئله یاخین بوراخمامیش، چاپ و کوتلوی اینفورماسیا واسطه‌لرین‌دن اوزاق توتموش، موسیقی‌سینی هر یوللا سیخیشدیرمیش، تاریخینی ساختالاشدیرمیش، ادبیاتینی کیچیمسمیش، میللی وارلیغینی لاغ، ایستئهزا هدفینه چئویرمیش، بیر سؤزله، آچیق-آیدین زوراکی‌لیقلا بویقیریم سیاستی یوروتموش‌دور. فارس شووینیزمی‌نین یوروتدوگو بو اینسانلیقدیشی بویقیریم سیاستی‌نین زیروه نقطه‌سی آنا دیلی درس‌لیک‌لری باشدا اولماقلا آذربایجان تورکجه‌سین‌دکی کیتاب‌لارین، الیازما‌لارین، قزئت و درگی‌لرین یاندیریلدیغی، آنا دیلینده درس دئین اؤیرتمن‌لرین اؤلدورولدوگو، اؤز آنا دیلینده بیرجه ایل – آذربایجان میللی حکومتی (1945 - 1946) زامانی تحصیل آلمیش نئچه-نئچه شاگیردلرین قتله یئتیریلدیگی 26 آزر/17 دئکابر گونو اولدو

          فارس شووینیزمی‌نین 1946-جی ایل 26 آزر/17 دئکابر گونونده تؤرتدیگی بو وحشی‌لیک‌دن آرتیق یئتمیش ایل کئچمکده‌دیر و چوخ یازیق‌لار کی، آذربایجان تورک‌لرینه قارشی یورودولن همین بویقیریم سیاستی هله ده بوتون گوجو ایله داوام ائتمکده‌دیر. بیز – بو کونفرانسا قاتیلان‌لار یئتمیش ایللیگی تامام اولان 26 آزر/17 دئکابر گونونو آذربایجان تورک‌لرینه قارشی یوز ایلدن بری اویقولانان بویقیریم سیاستی‌نین سیمگه‌سی اولا‌راق قبول ائدیر و قرارا آلیریق کی، هر ایلین 26 آزر/17 دئکابر گونونو آذربایجان تورک‌لری‌نین بویقیریم گونو اولا‌راق قئید ائدک.

          آلدیغیمیز بو قرارا سؤیکنه‌رک اللی میلیونلوق آذربایجان تورکونون دونیا‌داکی بوتون اجتماعی-سیاسی-کولتورل-ایقتیسادی… قوروم‌لارینا، اؤز میللی کیم‌لیگینه ییه دوران، اونا سایغی دویان هر بیر آذربایجان اینسانینا مراجعت ائدیریک. بیزه گؤره، آذربایجان تورک‌لری‌نین میللی حاق‌لاری اوغروندا آپاریلان موباریزه‌یه دونیا اجتماعی ریینده لئگیتیم‌لیک – مشرولوق قازان‌دیرماق چوخ اؤنم‌لی‌دیر و بو ندنله ده دوشونوروک کی:

          1. هر ایلین 26 آزر/17 دئکابر گونو آذربایجان تورک‌لری‌نین بویقیریم گونو کیمی  قئید ائدیلمه‌لی و بو تاریخی گون خالق ایچری‌سینده گئنیش یاییلا‌راق تانینما‌لی، آنا دیلیمیزین یاندیریلمیش کیتاب‌لاری (الیازما‌لاری، قزئت‌لری، درگی‌لری)، آنا دیلیمیزه اؤنم وئردیگی اوچون اؤلدورولموش اؤیرتمن‌لریمیز، مکتب‌لی اوشاق‌لاریمیز، قاپادیلان مکتبلریمیز… آنیلما‌لی، خاطره‌لری دایم عزیز توتولما‌لی‌دیر؛

          2. 26 آزر/17 دئکابر بویقیریم گونو باشدا اولماقلا آذربایجان تورک‌لرینه قارشی یورودولن بویقیریم سیاستی دونیا اجتماعی ریینه دویورولما‌لی، فارس شووینیزمی‌نین ایچ اوزو هر یاندا و بوتون یؤن‌لر عذره تانیدیلیب ایفشا ائدیلمه‌لی‌دیر؛    

          3. دئموکراتیک اؤلکه‌لرده اجتماعی-سیاسی قوروم‌لارین، اینسان و توپلوم حاق‌لاری اوغروندا موباریزه آپاران آیدین‌لارین، اویغون اولوسلاراراسی تشکیلات‌لارین 26 آزر/17 دئکابر بویقیریم گونونو دیرلندیرمه‌سینه، اونا سیاسی-حقوقی قیمت وئرمه‌سینه نایل اولونما‌لی‌دیر؛

          4. باشدا یونئسکو اولماقلا بیرلشمیش میللت‌لر تشکیلاتینا آردیجیل مراجعت‌لر ائدیلمه‌لی‌دیر کی، 26 آزر/17 دئکابر گونو دونیا عذره بویقیریم گونو کیمی قبول اولونسون و بو ایستک گئرچکلشندک مراجعت‌لرین آردی-آراسی کسیلممه‌لی‌دیر.

یؤتئبورق شهری

2016-12-10 

photo 2016 12 12 05 47 51

photo 2016 12 12 05 47 58

photo 2016 12 14 02 13 19

photo 2016 12 14 02 13 15

photo 2016 12 14 02 13 17

photo 2016 12 12 05 47 55